Алматы қаласының халықаралық әуежайына дәрілік препараттар тиелген екі бірдей ұшақ келіп қонды. Ресейден 55 тонна медикамент жеткізілді. Әуе лайнерімен келген жүк құрамында әлеуметтік маңызды 10-нан астам препарат, шамамен 3 млн қаптама, соның ішінде дене қызуын түсіретін және COVID-19-ға қарсы басқа да дәрілік құралдар бар. Тізімде азитромицин, цефтазидим, ибупрофен, фраксипарин, метронидазол, цефтриаксон, гепарин, нимесулид, левофлоксацин, меропенем ұнтағы, эноксапарин-бинергия және басқа да дәрілер қамтылған.
Медициналық препараттарды азаматтық авиация комитетінің арнайы борттарымен жедел жеткізу – Үкіметтің нарықты ең қажетті дәрілермен шұғыл толықтыру үшін жүзеге асырған шараларының бірі. Ендігі жерде нарықты қамтамасыз ету үшін және дәріхана желілерін қажетті препараттармен үнемі толықтырып отыру үшін осындай рейстер тұрақты түрде орындалады.
Денсаулық сақтау министрлігі Тауарлар мен қызметтердің сапасы мен қауіпсіздігін бақылау комитетінің хабарлауынша, дәрілік құралдар мен препараттар декларациялау арқылы үш күн ішінде сертификатталады.
Алматыға әкелінген дәрілік препараттарды төрт ірі фармацевтикалық компания дәріханаларға жеткізумен айналысады. Бұл «Медсервис плюс» КФК» ЖШС, «Химфарм» АҚ, «Нобель Алматы фармацевтикалық фабрикасы» АҚ, INKAR желілері. «Химфарм» АҚ өкілі:
– Компания барлық қажетті шараны қолға алып, тек өз кәсіпорнында дәрі өндіру көлемін ұлғайтып қана қоймай, сонымен бірге Ресейдегі серіктестерімен – вирусқа қарсы препараттар шығаратын «Акрихин» компаниясымен байланысқа шықты. Олар өндіретін вирусқа қарсы препараттар қазақстандық «Химфарм» компаниясында шығарылмайды. Осы серіктестіктің, сондай-ақ Мәскеуден көліктік әуе бортын ұйымдастыру үшін екі мемлекеттің көрсеткен жедел қолдауы арқылы Қазақстанға «Осельтамивир» препаратының үлкен партиясы бар рейс келді. Аталған препарат дистрибьютерлік компанияларға дереу беріліп, еліміздің дәріханаларына жақын күндері жеткізіледі, – деп мәлімдеді.
Бір атап өтерлігі, Ресей Федерациясынан келген жүктен өзге, Алматыға шілденің соңына дейін шамамен әлеуметтік маңызы бар 4,2 млн қаптама дәрі-дәрмек жеткізіледі деп күтілуде.
– Үкіметтің қолдауының нәтижесінде ең қажет препараттар жеткізілді. Мұнда өте қажет дәрі-дәрмектің 13 түрі бар. Үндістаннан да жүк келеді деп жоспарланған, – деді «INKAR» ЖШС бас директоры Әлия Ерімбетова.
Алматыда қала әкімі Бақытжан Сағынтаевтың тапсырмасы бойынша дәрі-дәрмектерді іркіліссіз жеткізу үшін өндірушілермен, ірі жеткізушілермен және дәрі-дәрмек дистрибьютерлерімен белсенді жұмыс жүргізілуде. Барлық фармкомпаниялар 1 шілдеден бастап дәріханаларға әлеуметтік маңызы бар 581 мың дана препарат жеткізді. Оның ішінде парацетамол, аспирин, ингавирин, ибупрофен, азитромицин және басқа дәрілер, сонымен қатар термометр бар.
Дәрі-дәрмекке деген сұраныс артқан кезде қала әкімдігі, жеткізушілер мен дәріханалар желісі өзара келісімге қол қойып, нәтижесінде әлеуметтік маңызы бар дәрі-дәрмектің 41 түрі дереу жеткізілетін 105 дәріхана нақтыланған болатын. Дәрі-дәрмек жеткізу, бағасын көтермеу және бір қолға үш қаптамадан артық дәрі бермеу тәртібі ретке келтірілуде. Сонымен қатар аталған 105 дәріханада дәрілердің өту процесіне, олардың 10 түрінің және термометрлердің қанша қалғанына күн сайын мониторинг жүргізіледі.
Қала әкімі Б.Сағынтаев Алматыда дәрі-дәрмектің тұрақты қорын құру үшін 5 млрд теңге бөлінгенін хабарлады. Бұл қаржы жеткізушілердің ағымдағы бағамен 6-8 айға жететін дәрі-дәрмек сатып алуына және оны халыққа қолжетімді бағамен өткізуіне бағытталуда.
АЛМАТЫ
