Қоғам • 17 Шілде, 2020

42 500 теңгеге өтінім қабылданады

875 рет
көрсетілді
5 мин
оқу үшін

Карантин режімі шілденің соңына дейін созылуына байланыс­ты мұқтаж жандарға төленетін 42 500 теңгеге бүгіннен бас­тап өтінім қабылданады. Бұл туралы кеше Орталық коммуникациялар қызметі алаңында Еңбек және халықты әлеуметтік қорғау министрі Біржан Нұрымбетов мәлімдеді.

42 500 теңгеге өтінім қабылданады

Оның айтуынша, жалпы негізгі қағидат бойынша бұл тө­лем жұмыс істеп жүрген және карантиннің күшейтілген шараларына қатысты табысынан айрылған азаматтарға төленеді. Алдымен, бұл жәрдемақы ақы­сыз демалысқа жіберілген жалдамалы жұмыскерлерге бері­леді. Мұнда өтінімді тек жұмыс беруші жібереді. Қойылатын бір ғана шарт – жұмысшылардың жұмысы карантинде тоқтап қалса ғана беріледі. Оны жер­гілікті аудан, қала бойынша штаттар, «Атамекен» ҰКП өңір­лік өкілдері тексереді. Себе­бі қазіргі шектеу шаралары же­ңіл­­деу болғанымен, әр өңірде бас санитарлық дәрігерлер өз шек­теулерін қойып жатыр.

Екіншіден, карантинде жұ­мысы тұралаған жеке кәсіп­керлерге және жеке практикамен айналысатын азаматтарға 42 500 теңге төленеді. Олар өтінімді өзде­рі береді. Бұл жолы оларға зейнет­ақы жарналарының, әлеу­меттік жарналардың төленуі немесе төленбеуі туралы талап қойыл­май­ды.

Үшіншіден, азаматтық-құ­қық­тық сипаттағы келісімдер бойынша жұмыс істеп жүрген фрилансерлер де жәрдемақы ала алады. Ол үшін өтінімді тікелей өздері береді. Мұнда осы жылдың 6 айының ішінде бір рет болса да зейнетақылық жар­наларын аудару туралы ғана талап қойылады.

Сондай-ақ өз бетінше жұмыс істеп жүрген азаматтар жұмысы тоқтап калса, төлем ала алады. Олар­ға алдыңғыдай бірыңғай жиын­тық төлем (БЖТ) төлеудің қажеті жоқ.

Ал мемлекеттік бюджет есе­бінен зейнетақы, мемле­кет­­тік жәр­демақылар, атаулы әлеу­мет­тік көмек немесе сақтан­дыру қоры­нан тиісті көлемде көмек алып жүрген азаматтар карантин кезінде берілетін біржолғы төлемді ала алмайды.

Бұған қоса министр жақын арада жұмыстан шығып кеткендер Жұмыспен қамту орта­лығына хабарласу керек екенін айтты. Бұл орталық тұрғындарға бос вакансияларды немесе бас­қа да жұмыспен қамту шара­ларын ұсынады. Егер де еш жұ­мыс лайық келмесе, үш күн­де жұмыссыз ретінде тір­келе­ді және автоматты түрде Мемле­кеттік сақтандыру қо­рынан жұ­мыс­сыздыққа қатысты басқа төлем 6 ай бойы төленеді.

«Студенттер мен декреттегі әйелдерге тағы да түсіндіріп кетсем. Бұл біржолғы төлемде «студент», «декреттегі әйел» деген санаттар жоқ. Яғни студентке студент болғаны үшін жәрдемақы төленбейді. Өткенде де солай болған. Бірақ студент жалданып жұмыс істесе, карантин кесірінен ақысыз демалысқа жіберілсе, ол үшін жұмыс берушісі өтініш бере алады. Ал егер студент жеке кәсіпкер болып, ай сайын БЖТ төлеп жүрген кәсіпкер болса, ол жағдайда да 42 500 теңге алады. Ал енді осы күнге дейін бейресми жұмыс істедім деп бір рет БЖТ төлеген студенттер 42 500 теңге ала алмайды. Декреттегі әйелдерге қатысты ереже өзгеріссіз қалатын болды. Ол дегеніміз – бала 1 жасқа тол­майынша мемлекеттен жәр­демақы немесе сақтандыру қорынан жәрдемақы алып жүреді. Сондықтан 1 жасқа толғанша төлемге үміттене алмайды. Ал 1 жастан асса, егер жұмысқа шығып, ТЖ бойынша ақысыз демалысқа шықса, әрине ала алады. Жеке кәсібі болып немесе БЖТ төлеп жүріп, жұмысы тоқтаса, ала алады», деді Б.Нұрымбетов.

Сонымен қатар министр 42 500 теңгелік көмекке өтінімді қандай портал арқылы ұсыну керек екенін атап өтті.

Жалақысы сақталмайтын демалыста жүрген және төлемге құқығы бар қызметкерлердің тізімін жұмыс берушілер

egov.kz және 42500.enbek.kz портал­дары арқылы ұсынады. Олардың қызметінің шектелу фактісін құрамына ҰКП мен кәсіподақтардың өкілдері кіретін аудандық және қалалық штабтар растайды. Басқа санаттар төлемдерді тағайындау үшін өз бетінше өтініш береді. Ол үшін біз бірнеше жолды қарастырдық. Жалдамалы қызметкер болып саналмайтын, төлем тағайындауға жататын азаматтар: egov.kz – «элек­тронды үкіметтің» веб-пор­талы; 42 500.enbek.kz пор­талы; «Элек­тронды үкімет» telegram-bot-ы; Aitu мес­сенджерінде

42 500.enbek.kz қосым­шасы; екін­ші деңгей­дегі банк­тердің мобильді қосым­шалары мен интернет-ресурстары арқылы өтінім бере алады.

Сондай-ақ төлемдерді проак­тивті форматта тағайындау қарас­тырылады. Қызметі шектелген, соңғы рет төлем алған азаматтардан SMS арқылы табысы тоқтағанын растау сұралады. Оң жауап пен проактивті түрде тағайындауға келісім болған жағдайда, төлемдер өтінімсіз тағайындалады.