Татарстан дәрігерлері Жамбыл облысына келді

Аймақтар • 28 Шілде, 2020

Татарстан дәрігерлері Жамбыл облысына келді

25 рет көрсетілді

Бүгінде әлемді әбігерге салып тұрған қауіпті індетке байланысты медициналық көмек көрсетудің маңызы зор. Осы орайда коронавирус инфекциясы мен пневмонияны емдеу бойынша тәжірибе алмасу мақсатында Татарстан мемлекетінен Жамбыл облысына бір топ дәрігерлер келді, - деп хабарлайды Egemen.kz.

Хамит ЕСАМАН

Аталған шара Жамбыл облысының әкімі Бердібек Сапарбаевтың Татарстан Президенті Рустам Миннихановпен келісімі бойынша Қазақстан Республикасы Ресей Федерациясындағы Елшілігінің және мемлекет қайраткері Иманғали Тасмағамбетовтің қолдауымен ұйымдастырылған.

Татарстан дәрігерлерін Тараз қаласындағы "Әулие-Ата" халықаралық әуежайынан облыстық денсаулық сақтау басқармасының басшысы Марат Жұманқұлов және "Тараз" әлеуметтік-кәсіпкерлік корпорациясы" ұлттық компаниясы" АҚ басқарма төрағасы Олжас Каржауов күтіп алды. Шет елден келген дәрігерлердің қатарында дәрігер-инфекционист, анестезиолог-реаниматолог, эпидемиолог және амбулаториялық-емханалық секілді қызметтің мамандары бар. Облыстық әкімдіктің мәліметінше, бүгінгі күні өңірде тұрғындардың коронавирустық инфекциямен жәнепневмониямен сырқаттану жағдайы тұрақты. Дегенмен, шетелдік дәрігерлердің тәжірибесі де өз нәтижесін береді деп күтілуде. Сонымен қатар, Марат Жұманқұлов Татарстаннан келген мамандар коронавирус пен пневмония аймағындағы емдеу хаттамаларымен танысып, жергілікті дәрігерлерге консультациялық және әдістемелік көмек көрсетеді.

"Келгендердің барлығы жоғары санаттағы білікті мамандар. Олар облыстық денсаулық сақтау жүйесінің, коронавирус және пневмониямен ауыратын науқастарды емдеумен айналысатын ұйымдардың жұмысымен танысатын болады. Бұл ауруханалардан бөлек емханалық нысандарды, орталық аудандық ауруханаларды да аралау жоспарланған. Ресей Федерациясында қауіпті індетті емдеудің жақсы тәжірибесі қалыптасты. Менің ойымша, ресейлік мамандардың келуі бізге кейбір мәселелерді қайта қарап, осы бағыттағы жұмыстарды жақсарта түсуге мүмкіндік береді", дейді Марат Жұманқұлов.

Ал, Татарстан Республикасы Денсаулық сақтау министрлігінің Республикалық клиникалық онкологиялық диспансерінің анестезиолог-реаниматологы Александр Ванюшин бұл екіжақты сапар екенін жеткізді. "Біз біреуге бірдеңе үйрету үшін емес, коронавирустық инфекцияны емдеудегі тәжірибелерімізді салыстыру, ауыр науқастарды күту моделі, медициналық көмек көрсету құрылымының қалай ұйымдастырылғанын көру және өз тәжірибеміздің тиімді тұстарымен бөлісу мақсатында келдік", дейді ол. Бұл ретте Олжас Қаржауов Татарстан Республикасы басшылығымен дәрігерлер арасында ғана емес, сонымен қатар екі елдің бизнес өкілдері арасында да екіжақты ынтымақтастық туралы келісім орнатылғанын айтты.

Сонымен қатар, ол әзірге індетке байланысты бұл келісімнің толығымен жүзеге аспай отырғанын, болашақта Татарстанға тәжірибе алмасу мақсатында жамбылдық кәсіпкерлердің, оның ішінде фармацевтикалық компаниялардың өкілдерінің және дәріханалар желісінің иелерінің баратынын жеткізді.

Жамбыл облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз