Фото: FIFA
Англия – Конго Демократиялық Республикасы
Елорда уақытымен сағат 21:00-де Англия мен Конго Демократиялық Республикасының құрамасы кездеседі.
Англия құрамасы әлем чемпионатының топтық кезеңінде L тобында 7 ұпай жинап, бірінші орынмен плей-оффқа шықты. Ағылшындар Хорватияны (4:2) және Панаманы (2:0) жеңіп, Ганамен (0:0) тең түсті.
Ал Конго К тобында 4 ұпаймен үшінші орын алып, рейтинг бойынша плей-офф кезеңіне жолдама алды. Топтық кезеңде Конго құрамасы Өзбекстанды (3:1) жеңіп, Португалиямен (1:1) тең ойнап, Колумбиядан (0:1) жеңілді.
Әлем чемпионаты: Өзбекстан капитаны топтық кезеңде үздік гол авторы атанды
Бельгия – Сенегал
2 шілдеге қараған түні сағат 01:00-де Бельгия мен Сенегал құрамалары кездеседі.
Бельгия құрамасы топтық кезеңде G тобында бес ұпай жинап, бірінші орынмен плей-оффқа шықты. Бельгиялықтар соңғы турда Жаңа Зеландияны 5:1 есебімен ойсырата жеңсе, Египет (1:1) және Иранмен (0:0) тең түсті.
Ал Сенегал құрамасы I топта үшінші орынмен плей-офф кезеңіне шықты. Африкалық команда Иракты 5:0 есебімен жеңгенімен, Франция (3:1) мен Норвегиядан (3:2) жеңіліс тапты.
АҚШ – Босния және Герцеговина
Тағы бір плей-офф кездесуінде АҚШ құрамасы Босния және Герцеговинаға қарсы ойнайды. Ойын сағат 05:00-де басталады.
АҚШ құрамасы D тобында Парагвай мен Австралияны жеңіп, мерзімінен бұрын бірінші орынмен плей-оффқа жолдама алды. Соңғы турда Түркияға қарсы матчта бас бапкер Маурисио Почеттино негізгі ойыншыларға демалыс беріп, құрамға өзгерістер енгізді.
Ал Босния және Герцеговина В тобында үшінші орын алып, плей-офф кезеңіне шықты. Сергей Барбарез жаттықтыратын команда Канадамен 1:1 есебімен тең түсіп, Швейцариядан 4:1 есебімен жеңілді. Алайда шешуші кездесуде Катарды 3:1 есебімен жеңіп, келесі кезеңге жолдама алды.
Еске сала кетейік, әлем чемпионатының матчтарын «Qazaqstan» және «Qazsport» телеарналары тікелей эфирде көрсетеді. Сонымен қатар ойындар qazaqstan.tv, qazsporttv.kz ресми сайттарында, «Qazaqstan.tv» мобильді қосымшасында және «Birge.tv» платформасында онлайн форматта қолжетімді болады.
