Озық технология өрісіңді кеңейтеді

Сұхбат • 31 Шілде, 2020

Озық технология өрісіңді кеңейтеді

20 рет көрсетілді

Қазір цифрландыру – қарқынды дамып жатқан салалардың бірі. Ал төрткүл дүниені шарпыған коронавирус пандемиясы цифрландырудың мемлекеттік органдармен қатар барлық сала үшін өте маңызды екенін дәлелдей түскендей болды. Президенттің жастар кадрлық резерві арқылы іріктелген мамандар арасында да осы салада тиімді жұмыстар атқарып жүргендер аз емес. Мәселен, отандасымыз Тілектес Адамбеков «Қазпошта» АҚ-ның уақыт талабына сай жұмыс істеуін қадағалап, шетелде жинаған тәжірибесімен құрылым жұмысын ілгерілетіп келеді. Бүгін біз «Қазпошта» АҚ-ның ІТ және инфрақұрылым бойынша атқарушы директоры Т.Адамбековпен жүргізген әңгімемізді назарларыңызға ұсынып отырмыз.

Светлана ҒАЛЫМЖАНҚЫЗЫ

– Қазіргі қызметіңізге қандай тәжірибемен келдіңіз? Қайда білім алдыңыз?

– «Болашақ» бағдарламасының түлегімін. Шанхай қаласындағы Тонгдзи (Tongji University) университетінде телекоммуникация мамандығы бойынша білім алдым. Оқуды аяқтаған соң Қазақстан-Қытай «Жібек жолы» ынтымақтастық орталығының бас директоры болып қызмет еттім. Аталған компанияда жұмыс істей жүріп Қытайдан инвестициялар тартумен, бизнес-кеңес берумен айналыстым. Қазақстан қалаларының және облыстарының әкімдері үшін Қытайдың ірі корпорацияларымен және ҚХР үкімет өкілдерімен іссапарлар ұйымдастырдым. Жалпы, Қытайдан елге көптеп инвестиция тартуға тырыстым. Одан кейін «Astana Innovations» АҚ-ның инвестиция жөніндегі басқарушы директоры қызметіне ауысып, Нұр-Сұлтан қаласындағы Инвесторларға қызмет көрсету орталығының жұмысын қолға алдым. Одан бөлек, білгеніммен бөліскенді жөн санап, студенттерге дәріс оқуға бел будым. Қазақстанның мемлекеттік және жекеменшік жоғары оқу орындарында қытай халқының мәдениеті, психологиясы, кәсіпкерлігі туралы дәріс оқып жүрмін.

– Президенттің жастар кадрлық резерві туралы естіген кезіңізде оған қатысуға бірден бекіндіңіз бе?

– Президенттің кадрлық резервіне іріктеу басталғаны жөнінде достарым хабарлады. Сөйтіп, мен де бағымды сынап көргім келді. Іріктеу барысында қойылатын көптеген сұрақтан сүрінбей өту үшін күндіз-түні дайындалдым. Бұл жобаға республикамыздың түкпір-түкпіріндегі білікті әрі білімді жастары қатысқаны белгілі. Кадрлық резервтің ерекшелігі әрі мақсаты – түрлі саладағы білімі мен тәжірибесі ұштасқан азаматтарды біріктіріп, ел мүддесіне қызмет етуге жұмылдыру.

Резервшілердің қатарына өткен соң бізді әртүрлі мемлекеттік органдар сұхбатқа шақырды. Сол кезде «Қазпошта» АҚ басшылығымен кездесіп, әңгіме барысында ойларыммен бөлісіп, жоспарларымды ұсынуға мүмкіндік алдым. Нәтижесінде, «Қазпошта» АҚ-ның IT және инфрақұрылым бойынша атқарушы директоры лауызымына жұмысқа орналастым. Қазір құрылым жұмысын цифрландыруға, IT инфрақұрылымның дамуына жауапты қызметті атқарамын. Сонымен бірге блокчейн технологиясының ілгерілеуіне де атсалысудамын.

– Бүгінгі қызметіңізде не байқадыңыз? Нені өзгерткіңіз келеді?

– Әлемде орнаған коронавирус пандемиясы еліміздегі цифрландыру саласының артта қалғанын көрсетті. Мемлекеттік органдардың жұмыс жүйесінде де, банк саласында да цифрланудың деңгейі төмен екенін, шикіліктің бары анық байқалды. Сол олқылықтардың орнын толтырып, жақсы жобаларды жүзеге асыру мақсатында «Қазпоштада» Цифрлық банк, сонымен бірге Smart contract деген жаңалықтар енгізіп, барлық қазақстандықтарға, әсіресе бизнес өкілдеріне пайдалы болатын жобаларды ұсындым. Әлі де көп жұмыс жүргізу қажет. Өйткені цифрландыру саласы күн санап ілгерілеп, дамуда. Яғни бір жаңалықты оқып болғаныңша басқа деңгейдегі толықтырулар енгізіліп жатады. Сондықтан бұл сала ұдайы ізденісті қажет етеді.

– Келешекке қандай жоспарыңыз бар?

– Блокчейн саласын зерттеп жүргеніме 4 жылға жуық уақыт болды. Блокчейн технологиясын өз елімізге әкелу арқылы осы саланы дамытып, оған қоса блокчейннің қыр-сырын меңгерген білімді мамандар мен бағдарламашылар даярлағым келеді. Яғни өзім ғана біліп қоймай, білгенімді отандастарыма үйретіп, жаңа мамандар даярлау қажет деп ойлаймын. Қазірдің өзінде жаңа жүйеге, халықаралық деңгейдегі жұмысқа көшуіміз керек екенін өзге жастарға түсіндіріп, команда құруды қолға алдым. Eurasia Blockchain Fintech Group компаниясында қызмет етіп жүргенімде канадалық серіктестермен бірге «Астана» халықаралық қаржы орталығы базасында компания құрдық. Оған 1 миллион АҚШ долларына жуық инвестиция тарттық. Енді ТМД елдері арасында блокчейн саласындағы тұңғыш лицензияланған биржа ашып жатырмыз.

Әңгімелескен

Светлана ҒАЛЫМЖАНҚЫЗЫ,

«Egemen Qazaqstan»