Жезқазғанда эпиджағдай тұрақтанды

Аймақтар • 03 Тамыз, 2020

Жезқазғанда эпиджағдай тұрақтанды

8 рет көрсетілді

«Жезқазған өңірі бойынша кейінгі күндері жедел медициналық жәрдем қызметіне жүктеме біртіндеп төмендеп келеді. Соңғы аптада вирустық инфекция және оның асқынулары бойынша шақырулар саны 24,1%-ға қысқарды», дейді Қарағанды облыстық денсаулық сақтау басқармасы Жезқазған аймақтың өкілдігінің басшысы Ләззат Ранова.

Қайрат Әбілда

– Өңірде індеттің өршуі біршама бәсеңдегенмен, коронавируспен күрес аясындағы іс-шараларды ұйымдастыру жұмыстарында босаңсу жоқ болар? Осы орайда, қазіргі эпидемиялық жағдайға қысқаша шолу жасап өтсеңіз.

– Жалпы, дәл қазіргі уақытта Жезқазған өңірі бойынша 2389 адамның коронавирус инфекциясын жұқтырғаны ресми түрде тіркелген. Нақтырақ айтсақ, Жезқазғанда – 849, Сәтбаевта – 559, Ұлытауда – 17 адам. Науқастар санының өсуі 0,26%-ды құрайды.

Өкінішке қарай, 52 адам індет салдарынан қайтыс болды. Көп жағдайда олардың 60 жастан асқан және созылмалы аурулары бар адамдар екенін айта кеткен ләзім. Ал инфекция жұқтырғандарды тіркеу басталған сәттен бергі уақыт ішінде 1465 пациент сауығып кетті. Бүгінде стационарларда 218 науқас ем алуды жалғастыруда.

Барлық провизорлық төсек саны 300 болады. Қазіргі уақытта оның 89-ы ғана бос емес. Яғни төсек жүктемелігі азайған. Соңғы екі аптадағы талдау эпидемиялық жағдайдың жақсарып, ауырғандар санының азайғанын көрсетті.

Жедел жоспарға сәйкес провизорлық және инфекциялық госпитальдардың төсек саны 810 орынға дейін арттырылған. Атап айтқанда, Сәтбаев қалалық орталық ауруханасы, Жезқазған қалалық медициналық орталығының Сәтбаев клиникасы, облыстық фтизиопульмонологиялық орталығының Сәтбаев бөлімшесі, Жезқазған қалалық көпбейінді ауруханасы, Жезқазған университетінің жатақханасында орналасқан инфекциялық госпиталь, Жезқазған қалалық көпбейінді ауруханасының пульмопровизорлық бөлімі толық қуатында жұмыс істеп тұр. Бұдан бөлек, «Кеңгір» қонақүйінде медициналық қызметкерлерге арналған 100 төсектік карантиндік стационар бар.

– Коронавируспен күресте медициналық мекемелердің техникалық тұрғыда жарақтандырылуы маңызды рөл атқарады. Жалпы, өңірдегі стационарлар мен госпитальдар тиісті аппараттармен, құрал-жабдықтармен қандай дәрежеде қамтамасыз етілген?

– «Қазақмыс» корпорациясының және шағын бизнес өкілдері мен жекелеген азаматтардың демеушілік көмегі есебінен Жезқазған және Сәтбаев қалаларында пандемия кезінде 6 өкпені жасанды тыныстандыру (ӨЖТ) аппараты, 174 оттегі концентраторы, 28 пульсоксиметр алынды. Алдағы уақытта Қарағанды облыстық денсаулық сақтау басқармасы тарапынан 3 ӨЖТ аппараты және 70 пульсоксиметр сияқты қосымша жабдықтар сатып алынбақ.

Бұдан басқа, медициналық газ берудің орталықтандырылған жүйесін орнату арқылы пациенттерді оттегімен қамтамасыз ету мәселесі шешілді.

Жезқазған өңірінде екі компьютерлік томография кабинеті жұмыс істейді. Алдағы қазан айында Жезқазған және Сәтбаев қалаларында қосымша тағы да екі компьютерлік томограф орнатылады. Сонымен қатар қыркүйек-қазан айларында екі заманауи цифрлы рентген аппаратын сатып алу жоспарда бар. Мұның өзі тексерудің қолжетімділігін арттырады, ауруды дер кезінде анықтауға, ауыр түріне ауысуына жол бермей, ем жүргізуге мүмкіндік береді.

Жезқазған өңірінің барлық тұрғындары арасында коронавирус инфекциясының таралуын ерте анықтау және алдын алу мақсатында, әлеуметтік бағытталған компания ретінде «Қазақмыс» корпорациясы» ЖШС-ның қолдауымен «Жезқазған медициналық орталығы» ЖШС базасында қуаты тәулігіне 500 зерттеу тестісін анықтауға жететін ПТР-зертхана ашылды.

Қазіргі уақытта барлық стационарда жеке қорғаныс құралдарының айлық қоры бар және қосымшасына тағы тапсырыс берілген. Жезқазған, Сәтбаев қалаларының стационарларында дәрілік препараттармен қамтамасыз ету 95%-ды құрайды. Барлық бастапқы медициналық-санитарлық көмек көрсететін медициналық ұйымдар бойынша құрамында жалпы практика дәрігері, фельдшер, мейірбикелер, жүргізуші бар 12 мобильді бригада жұмыс істейді. Олар автокөлікпен және басқа да қажетті құралдармен толықтай жабдықталған.

Әңгімелескен

Қайрат ӘБІЛДА,

«Egemen Qazaqstan»

Қарағанды облысы,

Жезқазған қаласы