Бүгінде ісмер азамат жүзден астам тапсырысты тиянақты етіп орындап шыққан. Тұтынушылар тарапынан өкпе-реніш, ескертпе болмапты. Қайта, алғыстарын жаудырып, талапты жастың құлшынысы мен ынтасын арттырып қойған.
Мақсат бұл істі Балқаш қаласы әкімінің бизнесті дамытуға арналған грантын жеңіп алғаннан кейін бастапты. Енді ол ілгерілеудің жайын ойлап, өз ісінің ауқымын кеңейтуді жоспарлап жүрген көрінеді. Жас кәсіпкер жұмысының ырғағы сырттан қарағанда былайша түзіледі: кесте машинасының бағдарламасына тапсырыс беруші таңдаған эскиз жүктеледі. Қысқа ғана жазба немесе сурет салу жарты минут уақытты алады, ал тұтас суреттер бір сағатқа дейін кестеленеді екен.
– Біз өнімге Made in Balkhash деген жапсырмаларды міндетті түрде тігеміз. Бұл заттың қайда жасалғанын көрсетеді. Сондай-ақ тапсырыс берушінің өтініші бойынша әртүрлі сөздер мен суреттер саламыз, – дейді әмбебап маман.
Бүгінде Мақсат бұл істі отбасылық бизнеске айналдырған. Шағын шеберханасының жұмыс істеп тұрғанына жарты жылдай болып қалыпты. Ең басты және сенімді көмекшісі – анасы Гүлнәр Сыздықова. Ол кісі минутына төрт мың айналым жасай алатын өндірістік тік бұрышты станоктың құлағында ойнайды. Бұл машина үш сағат ішінде матаның кесіндісін дизайнерлік жейдеге айналдыра алады екен.
– Егер алаңсыз жұмыс істейтін болсақ, күніне үш-төрт футболка тігуге болады. Біз, әрине, ең алдымен сапаға мән береміз. Сондықтан тек түрік маталарын пайдаланамыз, – дейді Гүлнәр Сыздықова.
Қазіргі уақытта Мақсаттың футболкалары әлеуметтік желілер арқылы сатылады. Өтімі жаман емес: бүгінге дейін жүзден астам футболка мен қалпақ тұтынушысын тапқан.
Жақында жас кәсіпкер Балқаш қаласы әкімінің бизнесті дамытуға арналған 2 млн теңге грантын жеңіп алды. Бұл қаржы, әрине, өріс кеңейтіп, жаңа деңгейге шығуға мүмкіндік береді. Мысалы, бұған дейін футболкаға ғана кесте тігіп келген Мақсат енді қалпақша, күрте, тіпті аяқкиімге дейін кестемен түрлі таңба түсіріп, жазу бедерлей алатын болады. Бұл үшін жас кәсіпкер өнеркәсіптік кесте тігу өндірісін жолға қоймақ.
Несі бар, талапты жастың Made in Balkhash затбелгісі еліміздегі танымал брендтердің біріне айналып жатса, таңдануға болмас. Себебі талпынған мақсатына жетпей тынбайды!
Қарағанды облысы,
Балқаш қаласы
