Сөзімізге дәлел, күні кеше Денсаулық сақтау министрлігі «Отан соғысының мүгедектеріне арналған Орталық клиникалық госпиталінен» коронавирустық инфекцияны жұқтырған соңғы пациент емделіп шыққаны туралы ақжолтай хабар таратты. 24 маусымнан бастап аталған министрліктің бұйрығына сәйкес госпиталь Сovid-19 коронавирус инфекциясына күдік болған кезде пациенттерді тексере отырып, вирустың бар немесе жоқ екенін айқындау үшін, емдеуге жатқызатын провизорлық стационар болып бекітілген еді. Жеті апта ішінде госпитальге Covid-19 ықтимал жағдайы бар 730 пациент түскен, оның ішінде 335 пациент оң нәтижемен басқа стационарларға ауыстырылған, қалғандары госпитальден емделіп шықан. Орталықтағы мамандардың біліктілігінің нәтижесінде бірде-бір өлім оқиғасы тіркелмеген.
Госпиталь директоры Динара Оразалина пациенттердің жас ерекшеліктері 18 жас пен 90 жас аралығын қамтығанын айтады.
«Біз 50 күн бойы күні-түні тоқтамай жұмыс істедік. Әсіресе, алғашқы кезеңдері қиын болды. Себебі коронавирус инфекциясымен күресте бұрын тәжірибе болмаған. Орталық қызметкерлері жағдайы нашар науқастармен жұмыс істеп тәжірибе жинақтаған. Сол қызмет барысындағы жинаған тәжірибеміз септігін тигізді деп айта аламын. Біздің орталық мамандары аз уақыттың ішінде вирусқа қарсы күресте көп дүние үйренді», дейді ол.
Енді орталыққа зарарсыздандыру жасалады. Тиісті қорытынды шыққан соң госпиталь бұрынғы бейіні бойынша жұмысын жалғастырады. Госпиталь дәрігерлері, мейіргерлері мен санитарлары соңғы сауыққан 68 жастағы пациент Кенжетай Дүйсенбайұлын қошеметтеп шығарып салды. Ол журналистерге берген сұхбатында аталған орталыққа ауа жетпей, ентігіп келгенін жеткізді.
«Жасым – 68-де. Бұған дейін Жамбыл облысының Жамбыл ауданы Аса ауылында 10 күн ауруханада жаттым. Ол жақтағы дәрігерлер де аянбай еңбек етіп, қолдан келгеннің бәрін істеді. Оларға да рақмет. Кейін осы жерге ауыстырылып, тағы 12 күн емделдім. Ауа жетпей, ентігіп келіп едім. Өкпені жасанды желдету аппаратына қосып, дәрі-дәрмекпен емдеді. Осы қиындықтың бәрі артта қалсын. Дәрігерлер ұжымына алғысым шексіз», дейді емделіп шыққан соңғы пациент.
«Ауру батпандап кіріп, мысқалдап шығады» деген тәлімді тәмсіл бар. Жасыңа қарамайтын жасырын жау сияқты көрінген індет іргемізден ізін суытып, емделіп шыққандар енді қайтып емхана есігін көрмесе дейміз.
