Аймақтар • 14 Тамыз, 2020

Нұр-Сұлтанда нөсер кәріздерінде заңсыз жалғанған байламдар анықталды

15 рет көрсетілді

Нұр-Сұлтан қаласында нөсер кәріздеріндегі заңсыз жалғанған байламдар мен оларға өндірістік, тұрмыстық қалдықтарды төгуді анықтау жалғасуда. Жеке үйлердің, кеңселердің және басқа ғимараттардың иелері көбіне өз нысандары кәрізінен қоқысты нөсерлі су жүйесіне ағызып жібереді. Осылайша нөсер мен кәрізді тазарту қондырғыларының жұмысын ауырлатады. Заңсыз байламдар Оңтүстік Шығыс, Агроқалашық, Көктал тұрғын алабы, Артем базарының аумағынан және басқа да жеке секторлардан анықталуда.

Рейд барысында 40 заң бұзушылық дерек анықталды. «Хан Шатыр» сауда ойын-сауық орталығы мен көше бойындағы нөсер кәрізі желісіне кәрізді төгудің 2 жағдайы тіркелді. Хусейн бен Талал көшесінде бірнеше рет бұзушылық деректері тіркелді. Нәтижесінде заң бұзушылар әкімшілік жауапкершілікке тартылып, жалпы сомасы 220 мың теңгеден астам айыппұл салынды.

Ағынды суларды, тұрмыстық қалдықтарды, құрылыс қалдықтарын және басқа да қоспаларды рұқсатсыз ағызу сорғыларды бітеп тастайды. Нөсер суларын тазарту қондырғыларының арнайы сүзгілері тек жаңбыр, еріген және жер асты суларына арналған, бірақ тұрмыстық және кәріз ағынды суларын соруға арналмаған. «Elorda Eco System» коммуналдық кәсіпорнымен бірлесіп рейдтер тұрақты негізде жүргізіледі.

Қала көшелерін су басудың алдын алу үшін нөсер кәріздері мен тазарту қондырғыларының 3 үлкен құрылысы жүруде. Ірі жобалардың бірі – Жастар шағын ауданында тазарту қондырғыларының құрылысы (Ташенов пен Амман көшелерінің қиылысы). Бұл Ташенов, Бараев, Уәлиханов, Иманбаев көшелері мен Республика даңғылын су басудың алдын алады. Жоба 2021 жылы толығымен аяқталады.

Алдағы күзде Б.Момышұлы көшесінің проблемалық учаскесінде басты нөсер кәріз коллекторының құрылысы аяқталуда (Дауылпаз көшесінен Елім-ай көшесіне дейін).

Осы жылдың соңына дейін Тельман тұрғын алабында тазарту қондырғылары мен басты коллектор салу бойынша жұмыстар аяқталады. Сыйымдылығы тәулігіне 36 мың текше метрден асады. Жобаны іске асыру Тельман тұрғын алабын, № 27 көше бойындағы перспективті даму аймағы және т.б. жер үсті ағындарын тартуға мүмкіндік береді.

2019 жылы Мыңжылдық аллеясы ауданындағы екі учаскеде нөсер кәріздері мәселесі шешілді.

Соңғы жаңалықтар

Шығысқа қар түсті

Аймақтар • Кеше

Ұқсас жаңалықтар