Банктердің активі ұлғайды

Маусым айында еліміздегі екінші деңгейлі банктердің жалпы активтерінің көлемі 28,59 трлн теңгеге жетіп, маусым айымен салыстырғанда 1,5 пайызға ұлғайды. Ал былтырғы шілде айымен салыстырғанда көрсеткіш 12,8 пайызға көбейді. Ең ірі он банктің активі бір жылда 13,4 пайызға артып отыр.

Ranking.kz хабарлағандай, жылдық өсім көрсеткіші бо­йынша Сбербанк топ бастап тұр. Оның активі бір жылда 33,7 пайызға ұлғайып, 2,65 трлн теңгеге жетті. Соңғы айдағы өсім бойынша да аталған қар­жы институты көш бастап тұр­ғанын айта кету керек. Жалпы, республикадағы екін­ші дең­гейлі банктердің актив кө­лемі бо­йынша Сбербанк Халық банктен кейінгі екінші орында тұр.

Жылдық өсім көрсеткіші бойынша екінші орын Kaspi Bank-ке тиесілі: +29,9 пайыз. Актив көлемі 2,48 трлн тең­ге. Одан кейінгі орындарға «Тұр­ғын­үйқұрылысжинақбанкі» (+28,5 пайыз), Ситибанк (+16,9 пайыз) және Jysan Bank (+16,5 пайыз) жайғасты.

Айлық өсімге келер болсақ, активі 44,9 млрд теңгеге ұлғай­ған ЦентрКредит алдыңғы орын­да тұр. Аталған банктің акти­ві бір жылда 1,2 трлн теңге­ні құра­ғанын атап өткен жөн.  Жалпы, респуб­лика бойынша екінші деңгейлі банк­тердің арасында ЦентрКредиттің актив портфелінің үлесі 8 пайызға жуық­тайды.

Несие портфелі бойынша да екінші деңгейлі банктердің жылдық динамикасында бірша­ма өсім бар. Бұл көрсеткіш 9,9 пайызға ұлғайып, 14,99 трлн тең­гені құрады. Алайда шілде айының көр­сеткіші бойынша несие портфелі 0,5 пайызға төмендегені байқалады.

Бір жыл ішінде активтері ең көп 5 банк­тің ішінде несиелеу көлемі бойынша Си­тибанктен басқаларының бәрі өсімге қол жеткізді. Дегенмен, коронави­рус дағдарысына байланысты мау­­сым, шілде айларында ең ірі бес банк­тің үшеуі ғана несие порт­фелін ұлғай­тыпты. Сбер­банк­тің несие портфелі 1,5 пайыз­­ға, Kaspi Bank-тің көр­сеткі­ші 0,4 пайыз­ға, «Тұрғынүй құ­ры­лысжинақбанкінің» берген не­сиелері 3,5 пайызға жоғары­лады.

Жалпы, екінші деңгейлі қаржы институттары үшін несие берудегі ең тиім­ді сегмент – тұтынушылық несиелер. Банктердің несие портфелі тө­мен­­де­геніне қарамастан, тұтыну­шылық несие көлемі бір айда 1,1 пайызға, ал жыл­дық көрсеткіш 13,7 пайызға өскені байқа­лады.

Ranking.kz-тің шолуына сү­йенсек, тұты­нушылық кредитті ең ұзақ уақытқа беретіндердің тізімін де Сбербанк бастап тұр – 60 ай. Одан кейінгі орындардағы Kaspi Bank – 48 айға, Jysan Bank – 36 айға беретіні айтылған. Екін­ші деңгейлі қаржы институттары ұсынған ең жоғарғы несиенің орташа көрсеткіші 5 млн теңге екенін айта кету керек.

Төлем мерзімі 90 күннен асып кеткен «нашар» несие­лер­дің үлесі шілде айында 72 млрд теңгеге азайып, 1,3 млрд теңге болды. Бұл жалпы сектордағы актив­тердің 9 пайызына тең қаражат. «Нашар» несиелердің көлемі бойынша да Сбер­банк, «Тұр­ғынүйқұрылысжинақ­бан­кі» және ЦентрКредит тізімнің басында тұр.

Бір жыл ішінде екінші дең­гей­лі қар­жы институттарының ипотекалық несие­лерінің үлесі 27,8 пайызға, яғни 413 млрд тең­геге ұлғайды. Осылайша ипо­­те­калық несиенің жалпы несие­дегі үлесі 14 пайызға жуық­та­ғанын атап өткен жөн.