Тіл туралы айтқанда, мемлекеттік тіл – ана тіліміз үнемі ойымыздың бір бөлігінде тұратыны анық. Қазіргі таңда қазақ тілі өсіп-өркендеу жолында. Еліміздің барлық ұйымдарында іс жүргізу, құжаттар хаттау мемлекеттік тілде жүзеге асырылуда. Алматы қаласының Полиция департаментінде Қазақстан Республикасының «Қазақстан Республикасындағы Тіл туралы» заңының және Қазақстан Республикасының ішкі істер органдарында тіл саясатын іске асырудың 2020-2025 жылдарға арналған мемлекеттік бағдарламасын іске асыру жөнінде іс-шаралар жоспары талаптарын орындау бойынша белгілі бір бағытта біршама жұмыс атқарылуда. Алматы қаласының Полиция департаментінің Құжаттамалық қамтамасыз ету басқармасында (кеңселер) шығыс құжаттар қазақ тіліндегі нұсқасы болмаса қол қоюға, тіркеуге қабылданбайды да.
Полиция департаментінің басқармалары мен бөлімшелерінде мемлекеттік тілді жеделдете оқыту курстарында бес – қарапайым (А1), базалық (А2), орта (В1), ортадан жоғары (В2), жоғары (С1) деңгейлер бойынша оқытылады. Бір ғана мысал, оқыту курстарынан алған білімдері нәтижесінде мемлекеттік тілде іс жүргізіп отырған өзге ұлт өкілі, Криминалдық полиция басқармасы бөлімшесінің бастығы полиция майоры Алексей Стрельцов өзінің жұмыс нәтижесін қазақ тілінде баяндап, бұқаралық ақпарат құралдарына қазақ тілінде сұхбат беріп отырады.
Мемлекет басшысы Қасым-Жомарт Тоқаевтың биылғы 29 маусымдағы «Ана тілі» газеті тілшісіне берген сұхбатында ұлт басылымының ұлттық мүддеге беріктігін, ана тілімізге жанашырлық танытып келе жатқанына ризалығын білдіре отырып, қазақ тілінің мәртебесін арттыру мәселесі жөнінде өз ойларын ортаға салды. «Қазір – аз сөйлеп, көп іс тындыратын шақ» екенін, қазақ тілін дамыта түсу үшін мемлекеттік тілге деген қажеттілік тудыратын тетіктерді санамалап көрсете келе: «Мұндай астары қалың, ел тағдырын шешетін іргелі істе асығыстыққа жол бермеу керек. Қайта әрбір әрекетімізді ақылға салып, мойнымыздағы тарихи жауапкершілікті барынша сезіне отырып жұмыс істегеніміз дұрыс. Осындай өркениетті қадамдардың нәтижесінде ғана қазақ тілі ғылым тіліне айналады» деп, қазақ тілін білуге ұмтылған әр адамды, сонымен қатар қазақ тілінің деңгейін ұлтаралық қолданыс дәрежесіне көтеруге көмектесетін өзге ұлт өкілдерін де қолдай түсу керектігін қадап айтты.
Қазақ елінде, қазақ жерінде, қазақ тілі – мемлекеттік тіл өркендеуі қажет, оған тек қазақ халқының ұрпақтары ғана емес, бүкіл Қазақ елінде өмір сүріп жатқан адамдар да үлесін қосуы керек. Қазақстан Республикасы Үкіметінің 2017 жылғы 31 қазандағы №689 қаулысы бойынша бекітілген 5 қыркүйек – Қазақстан халқы тілдері күні мерекесіне орай Қазақстан Республикасы Ішкі істер министрлігінің Ішкі және сыртқы коммуникациялар департаменті басшылығының бастамасымен жыл сайын тіл саясатын насихаттау, полицейлерді отансүйгіштік рухта тәрбиелеу, тілге деген құрметін арттыру, қызметте және қызметтен тыс мемлекеттік тілдің қолданыс аясын кеңейту, сондай-ақ полиция мамандығының мәртебесін көтеру мақсатында «Парасатты полицей» республикалық байқауы өткізіліп тұрады. Биыл эпидемиялық жағдайға байланысты адамдар көп жиналатын іс-шаралар өткізуге тыйым салынған. Дегенмен де Қазақстан халқы тілдері күні мерекесі қарсаңында мемлекеттік тілдің қолданыс аясын кеңейтудегі атқарылған игі істер барлық бұқаралық ақпарат құралдарында жарық көруде.
Сөзімізді қорытындылай келе, қазақ тілі – қазақтың мәдениетімен біте қайнасып жатқан рухани қазына. Сондықтан ана тілі тірлік үшін керек, мемлекеттік тіл бірлік үшін керек. Соны әрбір Қазақстан азаматы жүрегімен ұққаны жөн. Қазақ тілінің өшпес рухы асқақтай берсін. Тіліміздің қадірін тек тіл мерекесінде ғана емес, күнделікті өмірде де көтерейік деген тілектеміз.
Гүлнұр ЗАМАНБЕКОВА,
қалалық полиция департаменті Ішкі және сыртқы коммуникациялар басқармасы ішкі коммуникациялар тобының жетекшісі
АЛМАТЫ
