Коллажды жасаған Қонысбай Шежімбай, EQ
Мәселен, облыстық мәслихаттың депутаты Әділ Жұбановтың демеушілігімен жергілікті атқарушы органдарға 2 млн 300 мың теңгенің 10 тепловизоры алынды. Сондай-ақ Исатай, Махамбет аудандарындағы аз қамтылған, көпбалалы 90 отбасына азық-түлік себетін алып берді. Ал Атырау қалалық мәслихатының депутаты Әлібек Семғалиев жеке иелігіндегі 62 орындық «Пекин» қонақүйін медицина қызметкерлеріне ұсынды. Сөйтіп, онда дәрігерлер мен орта буындағы қызметкерлер жұмыстан кейінгі демалысын өткізді.
Карантиндік шектеулер аз қамтылған, көпбалалы отбасылар үшін оңайға соқпады. Осыған байланысты облыстық мәслихаттың депутаттары Гүлнар Садуахасова, Сабыржан Сұлтанов, Айбек Ғабдуллин, Серік Идранов бірнеше отбасына азық-түлік себетін алып беріп, игілікті іске өз үлестерін қосты. Тағы бір депутат М.Базарбай жергілікті кәсіпкерлерді ұйымдастырып, демеушілер есебінен Құлсары қаласында күнделікті дезинфекциялық жұмыстар жүргізуді қолға алды. Ал Е.Сапаров өңірлік тұрақтандыру қорына әлеуметтік маңызды азық-түлік өнімдерін жеткізуге демеушілік жасады. Сөйтіп, ол 400 тоннаға жуық жоғары сұрыпты бидай ұнын жеткізіп берді.
Қауіпті індет өршіген сәтте ауруханаларда жасанды тыныстандыру аппараттары жетіспейтіні байқалды. Осындай қиын сәтте облыстық мәслихаттың бір топ депутаты қалтасынан қаржы шығарып, Түркиядан аталған аппараттың бірнешеуін алдыруға бастама көтерді. Облыстық мәслихат депутаттарының бұл ұсынысына Мәжіліс депутаты Бақтықожа Ізмұхамбетов пен Сенат депутаты Ғұмар Дүйсембаев қолдау білдірді. Осылайша, депутаттардың демеуімен 15 дана жасанды тыныстандыру аппараты сатып алынып, аудандық ауруханаларға шұғыл түрде жеткізілді. Тұрғындар теңізге құйған тамшыдай болса да, депутаттардың халықтың дерттен айығуына үлес қосқанына қуанышты.
Қауіпті індет дендеген кезде азық-түлік пен дәрі-дәрмек бағаларының жөнсіз өсуі тұрғындардың ренішін туғызғаны даусыз. Осыған орай облыстық, қалалық, аудандық мәслихат депутаттарынан құрылған партиялық бақылау комиссиясы азық-түлік өнімдері мен дәрі-дәрмектің бағасына қатаң бақылау жүргізіп келеді. Сондай-ақ «Жұмыспен қамту-2020» жол картасының облыс көлемінде жүзеге асуын, осы бағдарлама аясында жергілікті тұрғындардың жұмысқа орналасуын бақылауға алып отыр. Өңірде іске асырылатын инфрақұрылымдық жобалардағы ваканттық жұмыс орындары жұмыссыздарға ұсынылып, жұмыспен қамту шаралары қолға алынды.
Қауіпті індетті жеңудің басты шарты – карантиндік режімді қатаң ұстану. Мұның дұрыстығын әлемдік тәжірибе анық көрсетіп отыр. Алайда халықтың әлі де отбасылық жиындардан бас тартпайтыны байқалады. Сол себептен, атқарушы органдармен бірлесе халықтық бақылау жүргізудің тиімділігі зор. Дегенмен әр азаматтың саналылығы, жоғары жауапкершілігі, тіпті сауаты мен мәдениет деңгейі шешуші рөл атқаратыны сөзсіз.
Сонымен бірге емдеу шараларын ұйымдастыруда кемшіліктер байқалып отыр. Облыстық мәслихатқа түскен хаттарды сараласақ, жергілікті жерде арнайы стационарлар ашу, медицина мамандарымен, науқастарды дәрі-дәрмек, жасанды тыныстандыру, рентген құрылғыларымен қамтудағы кемшіліктер айтылған. Бұл – барлық ауданға тән мәселе. Өйткені өңірде маусымның соңында қауіпті індет күрт өсіп, медицина саласының дайындығы жеткіліксіз екенін көрсетті. Мұның бір себебін отандық медицинада індетке қарсы жұмыс тәжірибесі болмауымен байланыстырған жөн шығар. Осыған орай бұдан бұрын аса қауіпті жұқпалы және карантиндік ауруларға қарсы атқарылған жұмыстар тәжірибесін қайта жандандыру қажет.
Жақынымызға жанашыр болу үшін індеттің кең таралу себебін жан-жақты зерделеп, кемшіліктен қорытынды шығару, денсаулық сақтау саласын эпидемияға тыңғылықты дайындау – басты міндетіміз.
Өмірзақ ЗИНУЛЛИН,
Атырау облыстық мәслихатының хатшысы
