Суретті түсірген Ерлан Омар, EQ
Қашықтан оқыту ісін ұйымдастыруда Үкіметтің жіберген қателіктерін жақсы білеміз. Ашығын айтқанда, әлі күнге дейін нақты бір онлайн-платформа жоқ. Мұғалімдер, оқушылар және ата-аналар күндіз-түні «WhatsApp»-тан бас көтермейтін болды. Толыққанды оқу үдерісі үшін қажетті барлық функциялары бар бірыңғай онлайн білім беру платформасын шұғыл әзірлеу қажет», деп қазіргі білім саласында қалыптасқан жағдайды ашық көрсетті. Бұл мәселе оқу сапасын жақсарту, ұстаздар біліктілігін арттыру, білім беруде жаңа технологияларды пайдалану мен жаңашылдық мәселелерін алға шығарды. Өйткені пандемия еліміздегі жұмыстары тоқырап кеткен бірқатар саланы жалаңаштаса, сол салалардың ең басында білім беру тұр.
Жолдаудағы «Балаларымыз қай жерде тұрса да, қандай тілде оқыса да сапалы білім алуы керек» деген тұжырым заманауи білімге қала мен даланың балаларының бәрі бірдей қол жеткізу міндетін алға қойды. Бұл ауылдарда сапалы интернет қолжетімділігі мен жаңа технологияларды қажет етеді.
Қазір елде қалыптасқан жағдай оқыту процесіндегі екі бағыттың ара-жігін анықтап берді. Біріншісі – білім орындары басқаруда жаңаша ойлайтын, істі жақсы ұйымдастыра алатын менеджерлерді қажет етсе, екінші жағынан оқу процестері білімді, ізденімпаз, шығармашылықпен жұмыс істейтін мұғалімдерді қажет етеді. Басы ашық жайт – мұғалім жұмысының нәтижесі шәкіртінің білім көрсеткіші болса, ал мектеп директорлары, білім бөлімдері мен білім басқармалары жұмысының нәтижесі – оқушы мен мұғалімнің оқу процестерін ұйымдастыра білуі. Сонда ғана білім сапалы деңгейге көтерілмек.
Бүгінде Ақтөбе облысында 402 мектеп болса, ондағы оқушы саны – 158 481. Биылғы жаңа оқу жылында бірінші сыныпқа 19 500 бала қабылданды. Елімізде эпидемиялық жағдайдың тұрақтанбауына байланысты 195 мектептің 143 мың оқушысы қашықтан оқытуды бастады. Бұл – Ақтөбе қаласы мен 12 аудан орталығындағы мектептер. Ауылдардағы 207 мектеп дәстүрлі түрде оқытылады. Мұндағы оқушылар саны – 15 448 бала.
Күрделі мәселе – қашықтан оқитын балаларды компьютер, ноутбук, планшеттермен қамтамасыз ету. Шілде-тамыз айында облыс әкімі Оңдасын Оразалиннің тапсырмасымен мектеп қорындағы бүкіл компьютер түгенделіп, тексерілгенде, облыстағы 402 мектептің қорындағы 12 550 компьютер ғана жарамды болып шыққан. Басқалары істен шыққан. Санда бар да сапасы жоқ жарамсыз компьютерлерді оқу кабинеттеріне көзбояушылықпен қойған. Сонда облыстағы мектептерде 13 оқушыға бір компьютерден келеді деген сөз. Өңірдің білім басқармасын бірнеше жылдан бері басқарып келе жатқан Ләззат Оразбаева осы кезге дейін мектептердің материалдық-техникалық базасын жабдықтауға бөлінген миллиардтаған мемлекет қаржысының қайда жұмсалғанын, 13 оқушыны неге бір компьютерге таластырып қою себебін түсіндірмей отыр. Есесіне, қашықтан оқытуға қолда бар мүмкіндіктерге қарап, ең алдымен көпбалалы, аз қамтылған отбасылар және ерекше қажеттілігі бар балалар компьютер, ноутбуктермен қамтамасыз етілмек. Бүгінде республикалық бюджеттен облыс оқушылары үшін 3 млрд теңге бөлініп, оған 20 мың компьютер жеткізіледі. Сондай-ақ жергілікті бюджет қаржысына 10 мың компьютер қосымша сатып алынатыны тамыз конференциясында мәлім болды. Осы жабдықтардың мектеп оқу базаларына келіп түскен-түспегені әлі белгісіз.
Осы оқу жылында облыста алты мектеп пайдалануға берілді. Ең басты мәселе – Ақтөбе облысында мектеп директорлары мен білім бөлімдерінің басшылары орындары ұзақ уақыт бос тұруы үйреншікті жайтқа айналды. Ешкім мұның себебін түсіндірмейді де, талап етпейді де. Оқу процестері қалай өтіп жатыр, неге қызметке маман табылмайды деген сауалға да ешкім жауап бермейді. Мәселен, Байғанин ауданының білім бөлімі басшысының орны жеті айдан бері бос тұр. Осы лауазымға құжат тапсырып, барлық сыннан өткен азаматтың жұмысқа неге қабылданбай отырғаны да түсініксіз.
Баянды СӘРСЕНБИНА
Ақтөбе облысы
