Мұны мен дәрігер ретінде ғана емес, ауылда туып-өскен, еңбек етіп жүрген азамат ретінде айтып отырмын. Көптеген ауылдағы тұрғындар қарапайым медициналық көмекке мұқтаж. Оның үстіне, дәріханалардың жоқтығы қиналтады.
Менің дәрігер ретіндегі арманым елді мекенде кабинет ашу болатын. Осыдан 4-5 жыл бұрын сол арманға қол жеткізіп, Қызылорда облысының Махамбет ауылынан кішкене ғана клиника мен дәріхана аштық. Өткенде ғана коронавирус пандемиясының ушығып тұрған кезінде қаншама ауыл адамы дәрі іздеп жан-жақты шарлап кетті. Сол кезде халық үшін дәріхананың қажеттілігіне тағы бір көз жеткіздім.
Сонымен қатар Президент алыс елді мекендерде көліктік медицинаны жаңғыртуды қолға алуды атап өтті. Бұрын бұл сала жақсы дамыған еді. Қазір қайта жаңғыртар болса, нұр үстіне нұр болады.
Жалпы, мемлекетіміздегі биліктің халықтың мұң-мұқтажын тыңдап, заман ағымына сәйкес өзгере білуі қуантады.
Қазір республика деңгейінде денсаулық сақтау жүйесінің мәз емес екені баршаға мәлім. Әсіресе, материалды-техникалық базаның жеткіліксіздігі, білікті мамандардың аздығы, медициналық қызмет сапасының төмендігі, ең бастысы дәрігерлер айлығының аздығы медицина саласына жаңа кадрлардың баруына кедергі.
Мысалы, АҚШ медицина саласына жылына ішкі жалпы өнімінің 16,4 пайызын жұмсайды, ал Швейцария 12,1 пайызын бөледі. Біздің еліміздегі бұл көрсеткіш 3,4 пайыз шамасында ғана.
Жалпы, кез келген елдің денсаулық сақтау жүйесін сол елдегі адам өмірінің ұзақтығымен өлшейді. Бұл жағынан Қазақстанның жағдайы мәз емес. Адам өмірінің ұзақтығы бойынша еліміз әлемде 111-орында. Бұған адамға дер кезінде шұғыл көмек беру, емнің көптеген түрін жергілікті жерлерде көрсету, тағы басқа факторлар әсер етері сөзсіз. Әрине, халықтың да өмір сүру салтына өзгеріс енгізу қажет. Саламатты өмір салты, таза ауа, дене шынықтыру, дұрыс тамақтану – өте өзекті.
Мемлекет медицина саласының инфрақұрылымын дамытуды, осы салаға мән беруді қолға алды. Ендеше, біз де өз тарапымыздан барынша қолдан келгенді аямайтын боламыз.
Махмұд ЕСЕНГЕЛДИЕВ,
дәрігер
