– 2020 жылдың қаңтар-шілде айларында жаңа сойылған немесе салқындатылған құс етін өндіру көлемі 60,5 тоннаға өсті. Бұл өткен жылғы көрсеткішпен салыстырғанда 26,2 пайызға жоғары. Қатырылған құс етінің өндірісі де алты айда 8,9 пайызға ұлғайып, 66,5 мың тоннаға жетті, – дейді energyprom.kz.
Құс етін өндіруден республика бойынша Алматы, Ақмола және Шығыс Қазақстан облыстары көш бастап тұр. Алматы облысындағы – «Казрос-Бройлер» АҚ, Ақмола облысындағы – «Макинск құс фабрикасы» ЖШС және Шығыс Қазақстан облысындағы – «Айтас-МП» ЖШС-на қарасты кәсіпорындар еліміздегі ең ірі өндірушілердің қатарына жататынын айта кету керек. Ақмола облысындағы «Capital Projects LTD» ЖШС да құс еті мен жұмыртқа өндірісіндегі ірі экспорттаушылардың санатында.
«Макинск құс фабрикасы» ЖШС жылына 25 мың тонна құс етін өндіретін ауқымды кешен. Жыл соңына дейін кәсіпорынның 2-ші кезеңі іске қосылса, өндіріс екі есе ұлғаюға тиіс. Бұл да импорт көлемін азайтып, ішкі нарықты өз өнімімізбен қамтуға ықпал етеді.
Жалпы, биыл республика бойынша жоғарыда айтылғандарға қосымша тағы 8 құс фабрикасы ашылуға тиіс болатын. Жыл басынан бері Түркістан облысындағы «Шымкент құс» пен Қостанайдағы «КазАгрос» кешені ашылды. Қалған алтауы кезек күтіп тұр.
Былтыр алты айда өндірілген өнімнің 4,5 пайызы, яғни 5,2 мың тонна өнім сыртқы нарыққа шығарылса, биыл бұл көрсеткіш 2,8 пайызға төмендегені байқалады.
Еnergyprom.kz хабарлағандай, тамыз айында еліміздегі дүкен сөрелерінде тауық етінің килосы орташа 928 теңгеден сатылыпты. Бұл былтырғы бағадан 4,6 пайызға жоғары. Құс етінің, жалпы ет бағасының қымбаттығы бойынша Ақтау қаласы көш бастап тұр. Ал ең төменгі баға Қостанайда тіркелді.