Аталған жобаға бастамашы болған облыстық Жастар ресурстық орталығы жоба арқылы жастарды өнер мен әдебиетке баулып, олардың театрға деген қызығушылығын оятуды көздейді.
Онкүндік аясында елге танымал театр және кино актерлері тікелей эфирде Түркістан жастарымен тілдесіп, театр мұрағатындағы үздік қойылымдарды тамашалады. Театр майталмандары күн сайын тікелей эфирге шығып, өздерінің жастық шағының естеліктерімен бөлісіп, қазіргі жас буынның көзқарасы мен танымы туралы әңгімелесті.
Тағылымды жобаның алғашқы қонағы Қазақстанның еңбек сіңірген қайраткері, танымал актер Ерлан Біләл болды. Ол «Мен жас кезде ешқандай ұсыныстан бас тартпауға тырыстым», деп жастарды қайсарлық пен табандылыққа шақырып, өмірлік тәжірибелерімен бөлісті. Ал Қазақстанның еңбек сіңірген қайраткері, театр және кино актрисасы Данагүл Темірсұлтанова Түркістан өңірінде театр мен өнердің қалыптасуында өзіндік сара жол, өшпес із қалдырған қайын атасы Райымбек Сейтметов туралы естеліктерін айтты.
Түркістандық жастар Қазақстанның еңбек сіңірген қайраткері, Қазақстан Жастар одағы сыйлығының лауреаты Асылбек Боранбай, театр және кино актрисасы Гүлшат Тұтова, Қазақстанның еңбек сіңірген қайраткері Шынар Жеңісқызы мен Шынар Асқаровалармен тілдесті. Олар жастарға тағылымды естеліктер айтып, театр тақырыбында ой қозғап, өз тәжірибесімен бөлісіп, тілек-ниеттерін білдірді. Тікелей эфирде салмақты әңгімелермен қатар, әдемі ән мен жарасымды әзілдер де болды. «Серпер» жастар сыйлығының лауреаты, кино және театр актрисасы Зарина Кармен көпшіліктің сұрауымен сөзін М.Шаханов жазған «Махаббат майданы» әнін орындаса, белгілі театр және кино актері Ғалымбек Оспанов ауылдағы әжеге пародия салып, жастарды күлкіге кенелтті. Ал «Адам шынайылығымен әдемі» деген ойын білдірген актриса Ажарлым Мағзұмқызы сұрақтарға жауап беріп қана қоймай, өлең оқып, кешті әйгілі композитор Ш.Қалдаяқовтың «Сыған серенадасы» әнімен тәмамдады.
Онкүндік аясындағы актерлермен сұхбат жүргізген Түркістан облыстық Жастар ресурстық орталығының басшысы Амалбек Өміртай да қызықты сұрақтар қойып, актерлерді жаңа қырынан таныта білді.
Бұл жоба түркістандықтардың көңілінен шығып, қызығушылығын оятқанын әлеуметтік желідегі пікірлерден де байқауға болады. Олар әр кейіпкерге арнайы сұрақ дайындап, асыға күтетіндерін жазып жүрді. Жастар ресурстық орталығы алдағы уақытта да мұндай рухани демалыс сыйлайтын жобалар жалғасын табатынын жеткізді.
