Әлеуметтік жобалар орталығы ашылды

Қоғам • 14 Қыркүйек, 2020

Әлеуметтік жобалар орталығы ашылды

28 рет көрсетілді

«Волонтер жылы» аясында Орал қаласында «Ашық жүрек» әлеуметтік жобалар орталығы ашылды. Шараға қала әкімі Абат Шыныбеков қатысып, орталықтың қызметімен, жоспарымен танысты.

Светлана ҒАЛЫМЖАНҚЫЗЫ

Әлеуметтік орталық Ақпарат және қоғамдық даму министрлігінің қолдауымен ашылып отыр. Дәл осындай жоба еліміздің 17 қаласында қолға алынған. Ұйымдастырушылардың хабарлауынша, орталық 7 бағыт бойынша «Birgemiz» жалпыұлттық тұжырымдамасы аясында жұмыс істейді.

– Қазіргі таңда «Еріктілер лигасында» жүзге жуық волонтер бар. Біздегі волонтерлерге де көмек қажет. Басты мақсатымыз – жастардың жаңа жобаларына қолдау білдіру. Біз алдын ала таңдап алған 7 бағыт бойынша жобалардың жүзеге асуына мүмкіндік береміз. Жалпы, Волонтерлер лигасы осындай орталықтар арқылы республикамызда волонтерліктің дамуына үлес қоспақ. Лига 2013 жылдан бері жұмыс істеп келеді. Осы жылдар ішінде атқарылған игі істер жеткілікті. Орталығымызға кез келген идеясы бар, қайырымдылыққа жаны жақын жас келіп жобасын ұсына алады. Яғни көмек сұрап келген болашағы бар жобалар назардан тыс қалмайтыны анық, – деді «Қазақстан волонтерлер лигасының» Батыс Қазақстан облысы бойынша директоры Алтынбек Бисенов.

Ауқымды жобаларды жүзеге асыруда еріктілер қозғалысының маңызы зор екенін атап өткен шаһар басшысы Абат Абайұлы:

– Биылғы жылдың ең басты жаңалығының бірі – Мемлекет басшысының бұл жылды «Волонтер жылы» деп жариялауы. Бүгінгі таңда Оралда 100-ден аса еріктілер ұйымы, 2 мыңға жуық волонтер жас бар. «Қазақстан волонтерлер лигасы» штабының біздің қаламызда ашылғаны қуантады. Еліне, жеріне жаны ашитын, қоғамдық өмірге белсенді атсалысып, жанашырлық танытып жүрген жастардың басын біріктіретін ұйымның ашылғаны ізгі істің алдағы уақытта да жалғасын табуына себепші болмақ. Ал мұндай бағыт-бағдар беруші орталық қайырымдылық санын арттырып қана қоймай, елімізде волонтерлік мәдениетінің қалыптасуына жақсы жағдай жасамақ. Президент кезекті Жолдауында да азаматтық қоғамды дамыту қажеттілігін, азаматтардың белсенділігін арттыру мәселесіне кеңінен тоқталды. Жастардың еңбекке қызығушылығын оятып, қай мамандықты болсын қадірлеу қажеттігін айтты. Волонтерлер пандемия кезінде де үлкен күш екенін дәлелдеп, алғы шепте аянбай еңбек етті. Осындай орталықтар азаматтық позициясы бар, белсенді жастардың шоғырлануына, идеяларын айтып, жоспарын бөлісетін алаңға айналады деп сенемін, – деді.

Лига волонтерлерін өңірдегі жастар ұйымдарымен тығыз байланыста жұмыс істеуге шақырған облыстық жастар саясаты мәселелері басқармасы басшысының міндетін атқарушы Нұрхат Ораш орталық жұмысына сәттілік тілеп, бірлескен жұмыстардың жемісті боларын атап өтті.

Орал қаласының волонтері, Лиганың мүшесі Маржан Мырзағалиева орталыққа келіп өзі сияқты достар тапқанын, ең маңыздысы өзінің мақсатын түсінгенін айтады. «Халқымыз үшін сынға айналған пандемия кезінде басқа волонтерлермен бірге жұмыс істедік. Дәрігерлер мен полицияларға тамақ тасыдық, мұқтаж жандарға көңіл бөліп, оларға азық-түлік себеттерін жеткіздік. Сол кезде қанша мұқтаж отбасының барын көрдік. Оларды көріп, біздің көмегіміз қажет екенін түсіндім. Сондықтан волонтерлікті өмірімнің бөлігіне айналдыруды жөн санадым. Конкурстарға қатысып, өзімнің жобамды да ұсынсам деген жоспарым бар», деді ерікті.

Жиын барысында алдағы уақытта аталмыш жоба аясында шағын гранттар берілетіні белгілі болды. Орталық қызметкерлерінің айтуынша, 300 мың теңгеден басталатын барлығы 107 грант республика жастарының жаңа бастамаларын жүзеге асыруға мол мүмкіндік сыйламақ.

Шағын гранттар конкурсына үкіметтік емес ұйымдар, бастамашы топтар және жеке тұлғалар қатыса алады. Толық ақпаратпен liga.org.kz ресми сайтында танысуға болады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз