Ынтымақтастыққа ұйытқы болған ұйым

Конференцияда қазіргі этно­саясат саласындағы, мәде­ниет пен жаһандану кезеңінде толе­ранттылықты қалыптастыру мәселелері бойынша халық­аралық іс-қимылдың өзекті мәсе­лелері, Қазақстан халқы Ассам­блеясының 25 жылдық жұмыс нәтижелері мен 2025 жылға дейінгі ҚХА даму тұжырым­да­масын жүзеге асырудағы перс­пективалар талқыланды. 

Ассамблея жұмысына қа­тысты пікір білдіргендер арасында Түркітілдес мемлекеттердің ынтымақтастық кеңесі (ТМЫК) Бас хатшысының орын­басары, Қырғызстанның халық жазушысы С.Раев, Парла­мент Мә­жі­лісінің депутаты С.Абдрахманов, ҚХА Төр­ағасының орынбаса­ры, «Аста­на қаласының өзбек этно­мәде­ни орталығы» ҚБ төр­ағасы Ш.Полатов, Ресей халық­тары­ның Ассамблеясы Кеңе­сінің төрағасы С.Смирнова, Қазақ­станның Оңтүстік Африка Рес­публикасындағы Төтенше және өкілетті елшісі Қанат Тұ­мыш болды. 

Ассамблея Төрағасының орын­басары Ж.Түймебаев алғы­сөзінде Елбасы Н.Назарбаевтың «Біздің барлық жетістігіміз бен жеңісіміздің мызғымас тұғыры – татулық пен тұтас­тық. Түрлі ұлт өкілдері бір шаңы­рақ­тың, бір тудың астынан табылып, бүгінгідей еңселі ел, іргелі мемлекет атандық», деген сөзін еске салып, «Қазақстан мемлекеті өзінің тұтастығы мен тұрақтылығын сақтай отырып, әлеуметтік-экономикалық дамуы жағынан еңселі белестерді бағындырды», деді.

Сонымен қатар конфе­ренцияның Қазақстан халқы Ассамблеясының 25 жылдығы аясында өтіп жатқанын айтып, оның еліміз үшін ауқымды және маңызды белес екенін атап өтті.

«Көпэтносты Қазақстан үшін этносаралық келісімді қамта­масыз ету аса маңызды басым­дық­тардың біріне айналды. Бі­ріншіден, мемлекет Конститу­циясында этносаралық және кон­фессияаралық қатынастар саласын реттейтін түбегейлі нор­­малар бар. Біздің еліміз әуел бастан-ақ мәдениеттердің, тіл­дер­дің, дәстүрлердің сан алуан­дығын тани отырып, азамат­тық қауымдастық құру жолын таңдады.

Мемлекет ұлттық саясаттың ойластырылған стратегиясын іске асыра отырып, этносаралық қатынастар саласындағы тұрақ­ты­лықтың кепілі ретінде дәйекті түрде әрекет етеді. «Қазақстан хал­­қы Ассамблеясы туралы» заң, Қазақстан халқы Ас­­сам­­-
блеясының 2025 жылға дейін­гі даму тұжырымдамасы және басқа да құжаттар қабыл­дан­ды.

1995 жылы құрылған Қазақ­стан халқы Ассамблеясы – ір­­ге­лі институт. Қазақстан халқы Ас­самблеясы құрылған күні­нен бастап маңызды қоғам­дық инфрақұрылым қалыптас­ты­рып, біріктірді. Этностар­дың мәде­ниетін, тілдері мен дәс­түр­лерін дамыту үшін жағдайлар жасалды. Ұлттық театрлар, этнос­тық БАҚ жұмыс істейді. Қазақ­стан­дық этностардың мәде­ниетін, дәстүрлерін және тіл­дерін дамытуға қолдау көрсету мақ­сатында мемлекеттік әлеуметтік тапсырыс бөлінеді», деді ол.

Ж.Түймебаев Қазақстанда этносаралық келісімді қамта­масыз етудің тиімді саяси-құ­қық­тық және институцио­налдық-бас­қару жүйесі қалып­тасқанын мәлімдей келе, Ассам­блеяның бас­тамасымен жүзеге асқан бағдарламаларға да тоқ­талды.

«Тұңғыш Президент – Елбасы Н.Ә.Назарбаевтың қоғамдық келісім мен жалпыұлттық бір­ліктің қазақстандық үлгісін қалыптастырудағы және бірегей қоғамдық институт – Қазақстан халқы Ассамблеясын құрудағы рөлі», «Біз – Қазақстан халқымыз» (этносаралық саладағы мемлекет саясатының негізіндегі «Бірлік көптүрлілікте» қағидасы) және «Саяси қуғын-сүргінге ұшы­раған, Қазақстанға жер аударылған халықтардың тағ­дыры» тақырыптарын қамтыған конференцияда тарихшылар мен жас ғалымдар баяндама жасап, этносаралық қарым-қатынас пен саясат төңірегінде ойларын ор­таға салды.