Иә, біз бүгінде болашақ журналистерге тәлім-тәрбие беріп жүрген ұлағатты ұстаз, түркістандық сазгер Бекжігіт Сердәлі туралы әңгімелеп отырмыз. Ұстаздығы жөнінде ұзақ әңгімелеуге лайықты, ұстанымынан айнымайтын, көзқарасын ашық білдіріп, пікірін қаймықпай айтатын азаматтың жүректен шыққан әндерін де ел жоғары бағалайды. Солардың бірі де бірегейі «Жас жұбайлар» әнінің шығу тарихы да қызық.
– Студенттік шақ. Курстас дос Құлтөлеу үйленiп, бүкiл топ мұғалiмдердiң көзiне түспей, «Жезқазған, қайдасың?!» деп тартып кеттік. Жүрдек пойыз. Вагон толы студентпіз. Үстел үстiнде дастарқан етіп жайған «Лениншiл жастың» (қазiргi «Жас Алаш») қиындысы жатыр. Қиындыда – жарасымды екі жұпты бейнелеген фотоэтюд. Оған жазылған екi шумақ өлең. Авторы көрсетiлмеген. «Суреттi түсiрген Р.Ханалиев» деп қана тұр. Газет бетiндегi суретте бейнеленген бозбала мен бойжеткеннiң сезiмдерiн дәл көрсетiп, дөп басқан жыр жолдары маған қатты ұнады. Курстас құрбылардың бірі «Тойға апара жатқан сыйлығымыз қайда?» деп қалмасы бар ма? Соңғы тиынына дейін билетке жұмсаған студентте қайбір сыйлық болсын. Ойланып қалдық. Манағы өлең еске түсті. Оңашада әуен туды. Әлгi екi шумақты салып айтып көрiп едiм, әп-әдемi ән дүниеге келгендей болды. Тойға асығып, көңiлдерi алабұртып келе жатқан курстастарға тыңдатып көрiп едiм, бәрiне ұнай кетті. Жезқазғанға барғанша қосыла шырқап, жаттап та алдық. «Сендерге әрдайым орын бар, Ақ отау төрiне қоныңдар»...
«Жас жұбайлар» атты жаңа әндi сәлден кейiн бүкiл вагон, ал Жезқазғандағы тойдан соң бүкiл ауыл айтып кеттi. Кейiн ол студент жастардың аузынан тастамайтын сүйiктi әнiне айналды. Тыңдаушының да тыңдаушысы бар ғой. «Ой, бауырым, әнiң ән-ақ екен, бiрақ сөзiн кiм жазған?» деп қадала сұрап қоймайтындар да табылды. Расында да, әдемi әнге себепкер болған қос шумақ кiмдiкi екен? Өлең авторын «Лениншiл жастың» редакциясынан сұрап едiк, ешкiм бiлмедi. Бірде ҚазМУ қалашығындағы бесiншi жатақханаға «Лениншiл жастың» жiгiттерi кездесуге шақырылады. Болашақ журналистер мен осы шақ журналистерi бiр-бiрiне түрлi сұрақтар қойып, сұхбаттасып, сырласты. Кеш соңында журфактың студенттерi қонақтарға арнап ән айтады. Сол баяғы «Жас жұбайлар». Ән аяқтала бергенде «Лениншiл жастың» сол кездегi әдебиет бөлiмiнiң меңгерушiсi, кезінде Президент Әкімшілігінде жауапты қызметтер атқарған ақын Өтеген Оралбаев орнынан атып тұрып: «Бұл мен ғой! Менiң өлеңiм ғой!» деп айғай салды. Тамаша әннiң қос авторы арада екi жыл өткенде осылай табысқан едік, – деп еске алады сол бір күндерді Бекжігіт Сердәлі.
Оның көп әндері жол үстінде пойызда, не автобуста туған. Алдымен әуенді ыңылдап домбыраға не магнитофонға түсiреді. Автобус ішінде көкейге келіп, үйде магнитофонға жазылған әуеннің бірі «Неге, неге?» әні. Бүгінде журналистік не филологиялық салада ғана емес, жаратылыстану ғылымы мен мәдениет саласында да аянбай тер төгіп келе жатқан профессор, композитор, Түркістан және Кентау қалаларының құрметті азаматы, 100-ден астам ғылыми мақаланың, 20-дан астам оқу құралдарының авторы Бекжігіт Сердәлінің жуырда «Неге, неге?» әніне Қырғызстан, Өзбекстан, Армения және Қазақстанның жас әншілерінің қатысуымен түсірілген бейнебаянның тұсауы кесілді.