Аймақтар • 25 Қыркүйек, 2020

Шағын ауылдың мәселесі шашетектен

203 рет көрсетілді

Өңірдегі шағын білім ордасының бірі – Қызылүй елді мекеніндегі негізгі мектеп. Былтыр NCOC компаниясының демеушілігімен Исатай ауданының орталығынан 35 шақырым қашықтықта орналасқан 80 орындық мектептің жаңа ғимараты пайдалануға берілген еді. Қазір мұндағы 1-9 сыныптарда 41 оқушы білім алуда.

Мектеп директоры Қабыл Ғұба­шев­тің мәлім етуінше, заманауи білім ордасында оқушылар 9-сыныпқа дейін оқиды. Өткен оқу жылының төр­тінші тоқсанында интернеттің болмауынан қиындық кездесіпті. Бір сыныпта екі, ең көбі алты оқушыдан оқиды. Мұнда 16 педагог жұмыс істейді. Бірақ орыс тілі мен химия пә­нінің мұғалімі жетіспейді. Екі мұғалім 40-45 шақырымдағы Тұщы­құ­дық округінен келіп дәріс береді. Тағы біреуі 50 шақырым қашықтықта орналасқан Нарын ауы­лынан келеді.

– Оқушылар санының аздығына байланысты сабақ штаттық режімде өтіп жатыр. Мектептің роботтехника, биология, көркем еңбек сыныптары соңғы үлгідегі жабдықтармен қамтылды. Қазір ұлдар еңбек пәнін­де станокта жұмыс істеуге машық­тан­ад­ы. Ал қыздар іс машинкасын пайдаланып, бетперде тігуді үйреніп жүр, – дейді директор Қ.Ғұбашев.

Оның айтуынша, қызылүйлік оқушылар бір айға жетпейтін уақытта 100-ге жуық бетперде тігіп үлгеріпті. Оларға көркем еңбек пәнінің мұғалімі Майдагүл Хайруллина дәріс береді.

– Мектептегі тігіншілік, аспаздық маман­дыққа арналған құрал-жаб­дық­тар оқушылардың мамандық таңдауына септігін тигізеді. Қазір 8-9 сыныпта оқитын қыздардың арасында тігіншілік мамандықты меңгеруге ниет білдіргендер бар. Олар бос уақытында көйлек, кеудеше тігудің қыр-сырын сұраудан жалықпайды, – дейді М.Хайруллина.

Қазір 30 отбасы мекен еткен Қызылүйдің әлі күнге шешімін тап­па­ған мәселесі шаш етектен деу­ге болады. Біріншіден, елді мекенге табиғи газ желісі тартылған жоқ. Осындағы негізгі мектепті ши­рек ғасырдан бері басқаратын Қ.Ғұбашевтің айтуына қарағанда, бұл мәселе жыл сайын көтеріледі. Табиғи газ желісін тартудың жобасы жасалып, сараптамадан өткізіліпті. Алайда тұрғындардың «көгілдір отын» игілігін қашан көрері белгісіз болып отыр.

– Рас, біздің ауылға ауыз су жеткізетін құбыр тартылды. Бірақ біз әлі күнге малдың тезегін жағып отырмыз. Басқа амалымыз жоқ. Бұл әсіресе қыста қиындық тудырады. Табиғи газдың желісін күте-күте көзіміз талып, тағатымыз таусылатын болды. Жолдың жоқтығы тағы бар. Осы мәселелер шешімін тапса, Қызылүйге көшіп келуге ниеттілер көп, – дейді Қабыл Ғұбашев.

 Екіншіден, Қызылүйдегі отбасыларда интернет желісі жоқ. Бұдан бірнеше жыл бұрын ауыл ортасына «Қазақтелеком» 20-25 метрлік мұнараны орнатқан екен. Бірақ оның еш пайдасы болмай тұр. Интернет желісі мектептің екі кабинетіне ғана қосылыпты.

– Интернеттің қиындығын айтпа­ған­да, мобильді байланыс желісімен сөйлесудің өзі әбігерге түсіреді. Біреу­мен сөйлесу үшін мобильді телефонымызды жоғарыға іліп қойып, даусын шығару әдісін қолданамыз. Кейде мүлдем сөйлесе алмайтын кезіміз болады, – дейді Қ.Ғұбашев.

Тағы бір ауыл интернеттің игі­лі­гі­нен шет қалып отыр. Бұл – Томан елді мекені. Мұнда 1970 жылы іргетасы қаланған бастауыш мектеп бар. Оған күрделі жөндеу жүргізілгенін жоққа шығаруға болмайды. Темір жол бо­йында орналасқан ауылдың 1-4 сыныптарда оқитын 33 оқушысы сөмкесін арқалап, күн сайын мектепке келеді. Өйткені қашықтан білім алудың реті жоқ.

– Біздің ауылда 481 тұрғын бар. Тұрғындардың күнделікті тұр­мы­сы­на қажетті ауыз су, табиғи газ же­лісін пайдаланып отыр. Осы кезге дей­ін ауылда интернет жоқ еді. Жа­қын­да «КазТранстелеком» арқылы ауылымыздың жартысына интернет желісі тартылды. Қазанның 1-іне дейін интернеттің толықтай іске қосылуын күтіп отырмыз, – дейді бас­тауыш мектептің меңгерушісі Жанаргүл Жанғалиева.

Оның айтуынша, биыл бастауыш мектепте ІТ-сынып толық жабдықталыпты. Бірақ әзірге оны толық пайдаланудың мүмкіндігі болмай тұр. Себебі мектепке интернет желісі тартылмаған.

– Ауылдың оқушылары 5-сыныптан кейін әр жақтағы ағайынын жағалап кетеді. Бірі Атырау қаласына, енді бірі аудан орталығындағы мек­теп-интернатқа, не өзге ауылдарға ба­рады. Бұл оқушылардың білім сапасына кері әсер етеді. Себебі бұрын үйінен жыраққа ұзап шықпаған бала­лар ата-анасын сағынары даусыз. Осыған орай ауылдағы білім ордасын негізгі мектепке айналдыру қажет секілді. Бұл балалардың ата-анасының жанында алаңсыз білім алуына жол ашар еді, – дейді Ж.Жанғалиева.

 

Атырау облысы,

Исатай ауданы

 

Соңғы жаңалықтар

Ұқсас жаңалықтар