Туризм • 05 Қазан, 2020

«Көлсай көлдеріндегі» экотуризм қалай дамиды?

999 рет
көрсетілді
4 мин
оқу үшін

Алматы облысындағы Саты ауылында «Көлсай көлдері» мемлекеттік ұлттық табиғи паркінің даму тұжырымдамасы қоғам өкілдеріне таныстырылды.

«Көлсай көлдеріндегі» экотуризм қалай дамиды?

 

Тұжырымдама бойынша паркте заманауи 3 визит-орталық, глэмпинг, кемпинг этноауыл салып, караванингке арналған орындар дайындау көзделген. Бұл ретте туристік маршруттар мен соқпақтарды дамытуға басты назар аударылады. Аймақта күрделі құрылыстың орнына жеңіл конструкциялар қолданылады.

«Көлсай көлдері» ұлт­­­т­ық мем­ле­кеттік табиғи паркінің директоры Да­­нияр Тұрғанбаев мұндағы экоту­ризм­ге арналған инфрақұрылым қор­ша­ған ортаға зиян келтірмес үшін не­­гіз­гі көлдерден алыс болатынын айт­­ты. «Қайыңды, Көлсай көлдеріне бір­­де-бір нысан жақын салынбайды. Ғи­­ма­раттардың бәрі төмен орналасады. Шатқалдың ішіне кірмейді. Бұл – табиғаттың сұранысы, қажеттілігі ескеріліп жасалған тұжырымдама. Концепцияның басты мақсаты – эко­жүйені бұзбау. Адамдар жаяу немесе вело­сипедпен жүріп, табиғатқа зиян ти­гізбей демалатын жағдайға келуіміз керек. Тағы бір мақсатымыз – елді мекен тұрғындарын жұмыспен қамту. Тек ірі бизнес өкілдері емес, жергілікті халық та туризмнің пайдасын көруі тиіс»,
деді Д.Тұрғанбаев.

Туризмді дамытудың мемлекеттік бағдарламасына сәйкес, экотуризм жобалары да 2020 жылы нәтижесін бере бастауы тиіс. «Алдын ала есептеулер бойынша туристік маршруттардың са­ны артады, жергілікті тұрғындар үшін жаңа жұмыс орындары пайда болады, қонақүй қоры кеңейеді және шатыр­лар мен лагерьлер үшін көбірек орын болады. Бұл ретте табыс жылына 150 млн теңгеге дейін өседі», деді «Көлсай көлдері» ұлттық мемлекеттік табиғи паркінің Бас директоры Данияр Тұрғанбаев.

«Даму тұжырымдамасын парктің жанынан құрылатын Қоғамдық кеңеске шы­ғарамыз. Сол кеңес жан-жақты қа­рап, талқылап болған соң әрі қарай заң­ға сәйкес әрекет жасаймыз. Үлкен инвес­тициялық жоба арқылы нысандар пайда болады. Тұжырымдаманы ертең бизнес өкілдері инвестициялық жобамен келгенде біздің талаптарды толық түсінсін деп жасап жатырмыз. Байқауға қатысқан кәсіпкер біз­дің тұжырымдамадағы идея болған жағ­дайда ғана жұмыс істеуге мүмкіндік алады», деп ескертті Экология, геоло­гия және табиғи ресурстар вице-ми­нистрі Ерлан Нысанбаев.

Осы саладағы отандық маман­дар­­­дың пікірінше, алдағы жылдары Қа­зақстан­да экотуризмге деген қы­зы­ғушылық күрт артады. Kazakh Tourism ұлт­тық компаниясының Бас­қарма төр­аға­сы Ержан Еркінбаев та осы пікір­ді қуаттайды. «Бұл тыңғылықты жа­сал­ған тұжырымдама. Оны Премьер-Ми­нистрдің және Экология, геология жә­не табиғи ресурстар, Мәдениет және спорт министрлерінің тапсырмасымен ұлт­т­ық парктің барлық шатқалдарын бір­неше рет аралап шығып, ұзақ уақыт да­йындадық», деді Е.Еркінбаев қоғам өкіл­дері қатысқан жиында.

Ол БҰҰ-ның Бүкіләлемдік турис­тік ұйымы ауылдық және экологиялық туризмді осы жылдың ұраны етіп ал­ғанын атап өтті. Себебі пандемия әсе­рінен экотуризм жаһандық туризм үле­сінің 30%-ын құраған.

«Экотуризм біздің еліміздегі туризм са­ла­сының ең келешегі зор ба­­­ғыты. Мем­лекет жерінің 10%-ы – ерек­ше қор­ға­латын аумақтар. Эко­ту­ризм­ге инфра­құрылым салып, жағ­­дай жа­сасақ та, жасамасақ та ол жақ­қа ба­­ратын адам­дар саны жыл сайын кө­бейе бе­реді. Сондықтан егер ту­ризм­ді дұ­рыс ұйымдастырмасақ, эко­жүйеге тү­сетін антропогендік жүк­те­ме артып, биоалуантүрлілікке қауіп тө­неді. Жа­ңа маршруттар ашпасақ, қа­зір­гі бар орын­дарға зиян келеді», деп тү­сін­дірді ол.

Сондықтан тұжырымдама бойын­ша ұлттық паркке келген турис­тер бұрынғыдай Көлсай, Қайыңды көл­дерінің жағасында ұзақ бөгелмейді. Жо­ба жеке инвестор тарту арқылы жүзеге асады. Оның жұмысын, талапқа сай жұмыс істеуін «Көлсай көлдері» ұлт­тық паркінде экотуризмді дамыту бо­йынша құрылатын қоғамдық кеңес ба­қылайды. Бас жоспарға сәйкес 2025 жылға қарай «Көлсай көлдеріне» ке­летін туристер саны 5 есе артады деген болжам бар. 2019 жылы ұлттық парк 87 мың адам қабылдаған.