Абай • 21 Қазан, 2020

Абайды іздеген қыз

57 рет көрсетілді

Қостанай облысы полиция департа­ментінің қызметкері, аға лейтенант Кира Гартман екі тілде еркін сөйлейді. Ұлы Абайдың бірсыпыра өлеңдері мен қара сөздерін де мүдірмей, нақышына келтіріп жатқа оқиды. Өзінің айтуынша, тілін орысша ашқан кішкентай Кира кейін мемлекеттік тілге ден қойып, телеарналардан қазақ тіліндегі фильмдер мен концерттік бағдарламаларды тамашалауды әдетке айналдырған.

– Алғаш Абайдың «Желсіз түнде жарық ай» әнін жаттап алып, отбасы қуаныштарында ата-анама, үйге келген қонақтарға айтып беріп жүрдім. Ондайда үлкендер қызық көріп, көтермелеп, қолпаштап, мақтау-марапат­тарын аямайтын. Әкем, тіпті «Менің қызым қазақтың атақты әншісі болады» деп қия­лыма қанат бітіретін, – дейді полиция аға лейтенанты.

Кира кейін Қостанай қаласындағы «Озат» мектебінде оқиды. Мектеп қа­бырғасында жүріп ұстаздарының ық­­палымен Абай лирикасын жаттап, көркемсөз сайыстарына қатысып, жүл­делі орындардан көрініп жүрді. Мектепті тәмамдаған соң арман қуып Алматыға барып, жолы болып өзі қалаған мамандық бойынша М.Есболатов атындағы Алматы академиясына оқуға түседі. 2019 жылдан бері облыстық полиция депар­та­ментінің ақпараттандыру және байла­ныс басқармасында инженер болып жұ­мыс істейді.

Қазір полицей қыз облыстық «Тіл­дарын» орталығындағы мемлекеттік тілді тереңдетіп оқыту курсында ла­тын әліпбиін үйреніп жүр. Абай өлеңде­рімен сусындап өскен К.Гартман таяуда «Мемлекеттік тіл –  тәуелсіздік символы» атты республикалық байқауға қаты­сып, жүлделі екінші орынды иеленді. Мәде­ниет және спорт ми­нистрлігінің ұйым­дастыруымен онлайн режімде өткен тіл бай­қауында рес­публиканың әр өңірінде мем­лекеттік қызмет саласында еңбек етіп жүр­ген 20 шақты өзге ұлт диаспоры сынға түсіпті.

– Бұл байқауға қатысуға «Тіл-дарын» орта­лығындағы ұстаздарымның кеңесі бойынша өтініш бердім. Онлайн-кон­курс екі кезеңнен тұрды. Бірінші турда өзім туралы қысқаша бейнебая­н жа­садым. Оның ішінде өзім, ата-анам, отбасым, туған жерім, білім алған мектебім, жұмыс орным туралы мә­ліметтер қамтылды. Одан кейін ауыртпалығы мол полиция қызметінің ерекшелігі мен қызмет барысында өзімнің күнделікті атқаратын міндетім жайлы ауызша әңгімелеп бердім. Өзім жатқа білетін Абай өлеңдерін мәнер­леп оқыдым. Екінші тур тікелей эфирде өтті. Бұл кезеңде қазылар алқасы қойған сауалдарға жауап беріп, еліміздің тәуелсіздік жылдарындағы жетіс­тіктері туралы баян еттім. Конкурсқа қатысқан әріптестерімнің осалы жоқ. Дегенмен жолым болып, қазылар алқасының шешімімен екінші орынға іліктім. Жалпы, менің өмірлік жолымды ашқан – Абай Құнанбайұлының шығармашылығы. Абай өлеңдері қаршадай кезімнен рухани серігіме айналды. Содан бері мен Абайды іздеп келемін. Ұлы ақынның қай шығармасын оқысам да, авторды көз алдыма елестетіп, дүниеге Абай көзімен қарап көруге тырысамын. Адам Абайды қайталап оқу арқылы ғана өзін өзі жыға тани түседі. Соның нәтижесінде талай белесті бағындырып, биік мұраттарға ұмтылып келемін, – деді байқау жүлдегері.

Кира Гартман биыл Абайдың 175 жыл­ды­ғына арналған челленджге қаты­сып, ұлы ақынның мұрасын өзге ұлт өкілдеріне насихаттау шараларына да белсенді атсалысты.

 

Қостанай облысы

 

Соңғы жаңалықтар

Саңлақтар сыр бермеді

Спорт • 27 Қараша, 2020

Тұрғын үй алаяғы қолға түсті

Қоғам • 27 Қараша, 2020

Алматы облысында жер сілкінді

Оқиға • 27 Қараша, 2020

Ұқсас жаңалықтар