Jas Otan жастар қанатының жиырма жылдығына орай ұйымдастырылған жарыс елорда базарлары мен сауда үйлерінде жұмыс істейтін жастарды жасыл алаңда жинады. 12 қазанда басталған жарыста қаланың сауда үйлері мен базарларында жұмыс істейтін жас қызметкерден құрылған он төрт команда бақ сынасты.
Сауда базарларының сатушылары, ТЖО қызметкерлері, әмбебап жұмысшылар мен курьерлер аз уақыттың ішінде футболшыларға айналып, өз командаларын жинақтап, бақ сынасты. Үздіктеріне кубок пен ақшалай сыйақы берілді. Турнирдің жалпы жүлде қоры 600 мың теңгені құрады. Жарыс талабы бойынша, ойыншылардың жасы 35-тен аспауы тиіс-ті.
Турнир қорытындысы бойынша, «Есіл» сауда үйінің командасы бірінші орынды иемденсе, екінші орынды «Астаналық» базарының командасы алды. Үшінші орын «Көк базар» командасына бұйырды.
Сонымен қатар турнир барысында көзге түскен ойыншылар «Үздік ойыншы», «Үздік шабуылшы», «Үздік қақпашы» аталымдарымен марапатталды.
«Жалпы турнир жоғары деңгейде ұйымдастырылды. Барлық командалар мықты болды. Әр ойын тартысты өтті. Мұндай турнирлер жиі өтіп, жүздеген жасты қаланың спорт алаңдарында жинаса екен деймін. Ұйымдастырушыларға рахмет!», деді турнир қатысушысы Серікбек Көкенов.
Ұйымдастырушылардың айтуынша, «Дүйсенбілік футбол-2020» турниріне екі ай көлемінде республиканың бес өңірінен 100-ден астам команда қатысқан.
«Турнир аясында 5 өңірде 100 команда арасында тартысты ойындар өтті. Олардың қорытындысы бойынша әр өңір жеңімпаздары анықталды. Турнир жұмысшы жастар арасында салауатты өмір салтын қалыптастырып, бос уақыттарын тиімді пайдалануға баулуды көздейді. Мұндай шаралар алдағы уақытта жалғасын табады», деді Jas Otan жастар қанатының жетекшісі Елнұр Бейсенбаев.
