Білім және ғылым вице-министрі Шолпан Каринованың айтуынша, аталған жобаның бастапқы бағыты әдебиетке арналады. Оқу көркем әдебиет арқылы жүргізіледі. Бұл ретте әдебиетті оқыту бағдарламасын өзгерту қажет.
«Әдиебетті тілден бөлек қарастыруға болмайды. Қазақ тілді және орыс тілді мектептерде оқытылатын қазақ тілі мен әдебиеті бағдарламасы бойынша үлкен жұмыс басталды. Осы бағытта жұмыс топтары құрылды. Сонымен қатар көркем әдебиетте елдегі, тарихтағы дәуірлік кезеңдер қамтылатынын ескере отырып, тарих пәнінің әдебиетпен байланысын сәйкестендіру бойынша тарих пәнінің бағдарламасына өзгерістер енгізіледі. Әр сыныпқа жас ерекшелігіне қарай сыныптан тыс оқылатын көркем әдебиеттер тізімі жасалды», деді вице-министр.
Сонымен қатар кітапханалардың жұмысы қайта қаралады. Барлық облыстардағы білім басқармаларына үлкен талаптар қойылды. Кітапхана оқушының кітапқа құштарлығын арттыратын орын болуы керек. Кітапханалардағы жалпы көркем әдебиеттің тізімі бекітіліп, оларды сатып алу мәселесіне басымдық беріледі.
«Оқулық» ғылыми-практикалық орталығының директоры Ғани Бейсембаев «Оқуға құштар мектеп» жобасының мақсаты еліміздегі кітапханалар ахуалын жақсарту және оқушылар мен жастардың көркем әдебиетке қызығушылығын арттыру екенін атап өтті.
«Бүгінде біздің зерттеу бойынша, жалпы мектеп кітапханалары қорында 200 млн-нан аса әдебиет бар. Оның ішінде 38 млн-ы – көркем әдебиеттер мен мерзімді басылымдар. Бұл басылымдар сапасына мән берер болсақ, көбі 80-90 жылдардың аяғында шыққан көркем әдебиеттер екені, оның ішінде 20-30 пайызы жарамсыз екені анықталып отыр. Соған байланысты шұғыл түрде мектеп кітапханаларын көркем әдебиетпен толықтыру мәселесі арнайы жол картасында көрсетіліп отыр», деді Ғ.Бейсембаев.
Оның айтуынша, жобаны жүзеге асыруға бес жыл уақыт қажет. Бес жылда барлық мектеп кітапханаларын көркем әдебиетпен толықтыру көзделген. Әр жыл сайын мектеп кітапханалары 20 пайызға көркем әдебиетпен толығып отырады. Бұл толықтыру тізімі төрт бағытта жобаланып, белгіленіп отырады. Оның ішінде бірінші кезекте отандық классиктердің үздік туындылары, екіншіден қазақ тіліне аударылған әлем әдебиетінің тізімі және заманауи ақын-жазушылардың үздік шығармалары енеді. Сондай-ақ түрлі анықтамалықтар, ғылыми-көпшілік басылымдар мен оқу-әдістемелік құралдармен жасақталады. Әдебиеттер тізімін бекіту бес түрлі іріктеуден өтеді. Ең соңғы тізімді бекіту процесі арнайы жасақталған комиссия арқылы іске асырылады. Бұл комиссия осы мектепке кіретін бес мыңға жуық атауы бар көркем әдебиет тізімін қалыптастырады.
Сондай-ақ елімізде балалардың кітап оқу дағдысын қалыптастыратын қосымшалар іске қосылды. Қазіргі кезде қанатқақты жобаға 9 мың оқушы қатысып жатыр. Бұл туралы «Білім-инновация» халықаралық қоғамдық қорының президенті Дархан Өте мәлімдеді.
«Қазіргі «Z» ұрпақ – ең ақылды буын. Соған сәйкес балаларға лайық жобалар ұсынылуда. Жалпы, әлемнің мықты университеттерінің барлығы ең бірінші баланың терең ойына қарайды. Бұл кітап оқу арқылы болады. Қазіргі пандемия кезінде «Кітап» мобильдік қосымшасы әзірленді. Бұл – «Z» ұрпақты кітап оқуға ынталандыруға бағытталған жоба. Олар – ең алғашқы цифрлы әлемнің тұрғыны, виртуалды әлемнің адамы. Бұл буынға беретін контент онлайн болмаса, жетістікке жету мүмкін емес», дейді Д.Өте.
«Кітап» жобасы осы балалардың қабілеттерін, ерекшеліктерін ескере отырып әзірленді. Бала үйінде әке-шешесінің бақылауымен күніне 20 минут кітап оқиды және күнделікті жетістігін көре алады. Мәліметтер оқушылар, сыныптар, жалпы, Қазақстан бойынша ұсынылады. Ойын тұрғысында әзірленген жобаның 6 деңгейі бар. Әр деңгейде ұпай беріледі. Ай соңында қорытынды шығарылып, баланың деңгейі анықталады. Сыйлықтар беріледі.
Тағы бір қосымша «Талап» деп аталады. Онда бала өз алдына күндік, апталық және айлық мақсаттар қояды. Осы онлайн қосымшалар арқылы баланың, ата-ананың белсенділігі тіркеледі.
