ТАЛАП КҮШЕЙТІЛУІ – ЗАҢДЫЛЫҚ

Мәжіліс Төрағасы Орал Мұхамеджановтың жетекшілігімен өткен палатаның сәрсенбі күнгі пленарлық отырысында қызмет мерзімдері аяқталған М.А.Сәрсембаев пен В.К.Фоос Орталық сайлау комиссиясы мүшелегіне қайта сайланды. Сондай-ақ депутаттыққа тағайындалған Қ.Ыдырысов Қаржы және бюджет комитетінің құрамына сайланды. Әдеттегі депутаттық сауалдар бұл жолы бір жарым сағатқа созылып кеткендігін айта кету керек. Тіпті спикердің өзі сауал­дар­дың қысқа да нұсқа болуын талап етіп отырды. Бұл жолы да депу­тат­тар Қызылағаш апатын айналып өт­кен жоқ. Қырғызстандағы саяси жағдайға байланысты да әңгіме қозғалды. Заң жобаларының ішінде “Қазақстан Республикасының әуе кеңістігін пайдалану және авиация қызметі туралы”  және соған жап­сар­лас заң жобалары депутаттардың ерекше қызығушылығын тудырды. Көлік және коммуникация ми­нистрі Әбілғазы Құсайыновтың ай­ту­ынша, ИКАО талаптарында елдің авиация жөніндегі заңнамасына  аза­маттық авиация қызметі мен оның мемлекеттік жүйесін қалып­тас­тыру үшін мықты іргетас қалып­тастырылуы тиіс деп жазылыпты. Олай болса, еліміз ИКАО-ның 11 мың стандартын қабылдауы және ұлттық заңнамаларға енгізуі тиіс екен. Қазіргі таңда аталған авиация ұйымы құрамында 192 мемлекет бар. Осы ұйымның мүшесі болып табылатын Қазақстанда 611 әуе ке­месі болса, соның 66-сы шетелдік өнімдер екен. Жолаушылар тасы­ма­лының 85 пайызын осы әуе ке­ме­лері жүзеге асыратын көрінеді. Ми­нистр әуе компанияларына бір­қатар талаптардың күшейтілген­дігі­мен бөлісті. Мәселен, енді уәкілетті орган келісім бермей, қару-жарақ пен әскери техника және өзге де маңызды жүктер тасуға рұқсат етіл­мейді. Сонымен бір мезгілде шағын авиацияға жол ашылмақ. Әуе ке­ме­сі­нің ұша алатындығы туралы сер­ти­фикат пен ұшқыш куәлігі болса, кез келген жеке тұлға төмен биік­тер­де самғай алады. Ол үшін өңір­лік аэроклубтар ашу көзделіп отыр екен. Осы ретте министр депутат­тар­дың көптеген сұрақтарына да жауап берді. Оның мәліметіне қарғанда, қазіргі кезде елімізде 20 әуежай бар көрінеді. Соның тек 5-еуі ғана жекеге тиесілі екен. 2020 жылға қа­рай барлық әуежайлар халықара­лық талаптарға сай жарақтан­ды­ры­луы тиіс. Кадр мәселесінде өткен жылдың ақпан айында Азаматтық авиация комитетінде 35 ұшқыш тіркеуде болса, қазір олардың саны 51-ге жетіпті. “Әр жыл сайын АҚШ-тың Флорида штатында он­даған қазақстандық курсант оқы­тылып жатыр”, дейді министр осы орайда. Арнайы инженерлік-тех­никалық құрамды даярлау мақ­са­тында Қазақстанда Рига авиация институтының филиалын ашу ту­ра­лы келісімдер жүргізілуде көрінеді. Негізінен кәсіпқой ұшқыштар даяр­лау Астана қаласында жүргізі­ліп отырғаны да депутаттар назары­на салынды. Сөйтіп, екі заңдық құжат та де­путаттар тарапынан қолдау тауып, бірінші оқылымда мақұлданды. Асқар ТҰРАПБАЙҰЛЫ.