Дәрі-дәрмектің тұтынушыға жетуі маңызды

Бірінші кезекте ол Қостанай­дағы «СҚ – Фармация» ЖШС қой­масына барды. Аталмыш қой­ма Нұр-Сұлтан қаласындағы хаб­тан әкелінген дәрі-дәрмек, ме­ди­циналық құрылғылары мен қорғаныш бұйымдарын аймақ­тағы емдеу мекемелеріне жедел жеткізіп отырады. Мұнда түрлі ауруларды стационарлық және амбулаториялық емдеуді қам­тамасыз ету барысында меди­ци­налық мекемелерден келіп түскен өтінімдер бойынша, сондай-ақ коронавирустық инфекцияны емдеу бойынша тапсырыстарға қызмет көрсетіледі.

– Әкімдік дәрі-дәрмектер, дәрі­герлерге қажет қорғаныс құрал­дарын, сондай-ақ жан-жақ­тан келіп жатқан гуманитарлық көмек жүктерін қабылдап алудың ашықтықтығын толық қамта­масыз етіп отыр. Әрбір жүк келген сайын бақылаушы топ құрылып, оған қоғамдық ұйымдар белсенді түрде тартылуда. Пандемия әр­бір отандасымызға әсер етті. Сон­дықтан бармақ басты, көз қыс­ты жұмыс болмауы тиіс. Дәрі-дәрмек алаяқтардың табыс көзіне айналмай, тұтынушыға жетуі өте маңызды», деді Алик Шпекбаев.

Айта кетейік, бұған дейін мониторингтік топтар бірқатар ауданда дәрі-дәрмек пен қор­ғаныс құралдарының жет­кі­лікті емес екені туралы мәсе­ле қозғаған болатын. «СҚ – Фар­мацияның» Қостанайдағы фи­лиа­лының өкілдері бұған дейін логистикада орын алған кем­шіліктер жойылғанын, бүгінде өңірдің барлық аудандарына жеткілікті мөлшерде дәрі-дәрмек жеткізілгенін айтты.

Жергілікті атқарушы орган өкілдерінің мәліметінше, коронавирустық инфекцияға, ЖРВИ мен пневмонияға қарсы күрес мақсатындағы кешенді шаралар аясында облыстағы дәрі­­хана желілері мен фармацев­тикалық фирмалардың дистрибьюторларына 538 млн теңге демеу қаржы бөлінген. Агенттік төрағасы облыс бюджетінен бө­лін­ген қаржыға сатып алынған дәрілерді саудалайтын «Цветная» дәріханаларына да бас сұғып, дәрі-дәрмектердің бағасымен танысты.

Қостанай облысына жұмыс сапары барысында Сыбайлас жемқорлыққа қарсы іс-қимыл агент­тігінің төрағасы Алик Шпек­баев облыс әкімі Архимед Мұ­хам­бетовпен бірге Лисаков қала­сында болды.

Мемлекеттік органдар қыз­метінің азаматтардың қажет­тілігіне бейімделуіне ықпал ету  сыбайлас жемқорлыққа қарсы саясаттың маңызды бөлігінің бірі екендігі бұрыннан айтылып келеді. Осы тұрғыдан алғанда, ашық­тық, айқындық және есеп­тілік арқылы мемлекеттік аппа­рат­ты трансформациялау ма­ңызды рөл атқарады.

Сыбайлас жемқорлыққа қарсы ведомство басшысы әкім­­дік­терде «бір терезе» қағи­даты­мен азаматтарға сервистік және кедергісіз қызмет көрсетуге ар­нал­ған «Көмек алаңы» фронт-кең­селерінің жұмысымен танысты. Кез келген азамат каби­неттердің табалдырығында кезек күтпей-ақ жүгіне алады. Әкім­діктердің қызметкерлері тұрғын үй-ком­муналдық шаруашы­­лық, жер қатынастары, әлеумет­тік қорғау, ауыл шаруашылығы және басқа да салалар бойынша кеңес береді. Электронды қызметтерді алу үшін өзіне өзі қызмет көрсету бұрыштары да қарастырылған.

«Тұрмыстық сыбайлас жем­қорлық азаматтар үшін қолай­лы жағдай жасалмаған жерде таралады. Азаматтардың қа­жет­ті заңды көмек алу үшін мем­ле­кет­тік қызметшіге сыйлық беруі­не жол жоқ. Шенеуніктер мәсе­лені шешу жолдарын тарылтып, кеңселерде отырған қызмет­керлердің маңыздылығын жасанды түрде асыра көтермеуі тиіс. Әрбір мемлекеттік қызметшінің жұмыс барысында ұстанатын қағидалары – адалдық, тәртіп, қол­жетімділік, ашықтық пен әділдік. Әкімдіктердің ыңғай­лы фронт-кеңселерімен мегапо­лис­тердің ғана емес, шағын кент­тердің тұрғындары үшін де қам­тамасыз ету қажет», деп атап өтті Алик Шпекбаев.

Рудный мен Лисаков қала­ларында «Көмек алаңы» ашылған сәттен бастап оларға 12 мыңнан астам тұрғын жүгінген. Таяу ара­да облыста халық тығыз орна­ласқан барлық ауыл әкімдік­тері осындай жұмыс нысанына көшеді.

Агенттік төрағасы жергілікті мемлекеттік кірістер органдары қызметкерлерімен кездесіп, азаматтар мен кәсіпкерлерге қызмет көрсету залдарының жұмысымен танысты. Сонымен қатар, Лисаков қаласында Алик Шпекбаев пен Архимед Мұхамбетов күрделі жағдайларды шешуге көмек көрсету туралы өтініш білдірген аза­маттарды қабылдады.

 

Қостанай облысы