Шымкент қаласындағы физика-математика бағытындағы Назарбаев Зияткерлік мектебінің 10-сынып оқушылары Бөрте Құрбанбай, Жібек Әлиақбар, Альмира Әбдіқадыр және Аида Маликова «U:hack» идеялар фестиваліне қатысып, соның аясында 24 сағаттың ішінде мектеп жасына дейінгі және мектеп оқушыларына қазақ тілін үйрететін онлайн-медиатеканы жасап шығарды. Олар әзірлеген «Ynta» жобасының мақсаты − қазақ тіліндегі медиа-файлдар, кітаптар мен фильмдер арқылы мектепке дейінгі және мектеп жасындағы балаларға қазақ тілін үйренуге қызықтыру.
Платформаның негізін қалаушылардың бірі Б.Құрбанбайдың айтуынша, жобаның идеясы − фильмді немесе сериалдың эпизодын қарау кезінде немесе подкасты, я аудиокітапты тыңдау барысында мәтіндегі беймәлім сөзді белгілеп, сол сөздің мағынасын, орыс және ағылшын тіліндегі аудармасын, синонимдерін және сөйлемде қолдану мысалын табу арқылы қазақ тілін үйрену, лексикалық және грамматикалық қолданысын кеңейту. Бұл үшін сайтта беймәлім сөздің мағынасын көрсету және сөздікті толтыру функциялары қамтылған.
Сондай-ақ қазақ тіліндегі контенттің жетіспеушілігі, қазақ тілінде аударылған әлемдік әдебиет пен әлемге әйгілі фильмдердің шектеулі тізімі мәселесі де қыздардың жобасында көрініс тапты. Бұл мақсатта қыздар әуесқой және кәсіби аударма, сондай-ақ дыбыстау мамандарымен ынтымақтастық орнатуды ұсынған.
«Біздің жоба – әрі танымдық, әрі қызық контенттің симбиозы. Өз бетімен тіл үйренудің қаншалықты қиын екенін бәріміз білеміз. Сондықтан тіл үйренуде жақсы нәтижелерге қол жеткізу үшін өзіңе қызықты нәрселерді қараған жөн», деп атап өтті А.Әбдіқадыр.
«U:hack» – инновациялық идеяларды іске асыруға арналған идеялар алаңы. Фестиваль аясында командалар 24 сағат ішінде ұйымдастырушылар берген тапсырмалардың оңтайлы шешімін тауып, оны жан-жақты ойластырып, өз жобасын ұсынады.
