Мұны атам қазақ асар, асар салу деп атағаны белгілі. Бір-біріне жанашырлығы, қайырым-жақсылығы, бірлік-ұйымшылдығы жоқ халық «Көп түкірсе – көл» деп айта алмаса керек. Осы игі дәстүрдің бүгінде жаңаша түрге еніп, ауқымын кеңейте түскені көңіл қуантады.
Мәселен, Қостанай облысының Амангелді ауданына қарасты Байғабыл елді мекенінен түлеп ұшқан жастар бүгінде еліміздің әр өңіріне тұрақтап, сырт жерде еңбек етіп жүрсе де, туған ауылына заманауи спорт алаңын салып беріп, игі іске ұйтқы болып отыр.
Жан-жақта жүрген байғабылдық жастарды жақсы іске жұмылдырып, бастама көтерген Болат Жұмағалиев бүгінде Талдықорған қаласында тұрады.
– Өзім Талдықорған қаласындағы мешіттердің бірінде имамдық қызмет атқарамын. Осыдан бір жыл бұрын WhatsApp әлеуметтік желісі арқылы жерлестердің басын біріктіріп, «Тәуекел!» деп аталатын топ аштық. Мұны алғаш амандық-саулық білісіп, қысыр әңгіме, жалаң мақтау, құттықтау айтатын жер деп ойлағандар да болды. Кейін топ мүшелеріне мақсат-міндетімізді түсіндіріп, өзіміз өсіп-өнген туған ауылымызға пайдасы тиетін перзенттік борышымызды өтеуіміз керек деген үндеу тастадық. Абырой болғанда, игі бастама көпшілік қолдауына ие болып, әркім мүмкіндігінше өз қалтасынан қаржы қосып, ауқымды істі қолға алып, Байғабыл ауылында заманауи спорт алаңын аштық. Осылайша, әлемді індет жайлаған күрделі кезеңде ауылдағы артымыздан қаулап өсіп келе жатқан балалар үшін жүздеген жерлес азамат жинаған қаражатқа ауылда спорт алаңы бой көтерді, – деді Болат Жұмағалиев.
Спорт алаңының ашылу рәсіміне Амангелді ауданы әкімінің орынбасары Сүндет Ғаниев, аудан әкімдігіне қарасты бірнеше бөлім басшылары мен ауыл тұрғындары қатысты. Салтанатты жиында әкім орынбасары байғабылдықтарды жаңа спорт нысанынының ашылуымен құттықтап, футбол алаңының салынуына ерекше атсалысып, жастарды ұйымдастыра білген Бағлан Ерғазин мен Болат Жұмағалиевке аудан әкімінің Алғыс хатын тапсырды.
– Амангелді ауданында саламатты өмір салтын, бұқаралық спортты дамыту бағытында көптеген тындырымды істер атқарылды. Байғабыл ауылдық округіндегі футбол алаңының ашылуы – соның бір дәлелі. Жалпы, бұқаралық спортты дамыту облыс әкімі Архимед Мұхамбетовтің тікелей тапсырмасы. Өңір басшысы шалғай ауылдардағы әлеуметтік саланың дамуын қадағалап отырады. Ауданымызда мұндай шаралардың жиі өтіп жатқаны қуантады. Мысалы, күні кеше ғана Ақсай ауылында күрделі жөндеуден өткен спорт залы ашылды, – деді Сүндет Ғаниев.
Аудан басшылары Байғабыл ауылының жас футболшыларына ойын доптарын сыйға тартты. Одан кейін сөз алған Болат Жұмағалиев әлеуметтік шараға белсене атсалысқан ауыл азаматтарына алғыс хаттар мен бағалы сыйлықтарын табыс етті.
– Туған жерді көркейту ниетімен жасалған қайырымды іске «Тәуекел, жерлестер!» тобындағы азаматтар көп еңбек сіңірді. Аудан басшылығынан алған марапатты осы әлеуметтік желідегі топтың жетістігі деп қабылдаңыздар. Әлдебіреудің еңбегін бөле-жара айтудың өзі артық етеді. Әркімнің өз несібесі бар. Шыны керек, Байғабылдың бары да, бағы да – мектеп. Ауылға ат басын бұрып келгендерді қонақ қылып, әлек болатын да сол мектептің ұжымы. Осы жолы да үрдіс жалғасты. Мұғалімі мен оқушысы, басшысы мен күзетшісіне дейін осы қуаныштың басы-қасында жүрді. Кез келген игі бастаманың тәртібі мен тәліміне жауапты Қуандық Бақытұлы бастаған педагогтер қауымына алғысымыз шексіз. Оны бүкіл ауыл адамы көрді. Сонау Алматы облысынан Серік есімді әмбебап маманды шақыртып, спорт алаңының сапалы салынуына жағдай жасадық. Ол кісіні ауыл адамдары қонақ қылып, қазақы дәстүрмен лайықты шығарып салды. Жерлестер риза, ойын баласының қуанышында шек жоқ. Көптен күткен спорт нысаны бой көтерді. Міне, бізге бұдан артықтың қажеті жоқ, – деді Болат Сағынғалиұлы.
Ауыл спортының кешегісі мен бүгінін жақсы білетін ардагер спортшы Айтмұхамбет Биғабыловтың сөзінше, жасанды жамылғысы бар футбол алаңының сапасы жақсы. Құрылысы тез арада аяқталса да, жұмыстар жинақы, тиянақты істелген.
– «Уатсапта» ашылған топтың басты мақсаты – туған ауылдың кем-кетігін түзеп, гүлденуіне атсалысу. Осы мақсатта алдағы жылдары жаңа жобаларға жол ашылады. Оны қолдау – ауылдың әр азаматының абыройы. Болат, Қуандық, Бағлан сияқты белсенді жастар жоспарларымен бөлісе жатар, – дейді «Тәуекел, жерлестер» тобының мүшесі Мұрат Нұржанов.
Байғабылдық волонтерлер алдағы уақытта ауыл орталығынан саябақ ашып, ауыл маңындағы өзен жағасын абаттандыруды көздеп отыр.
Қостанай облысы
Амангелді ауданы
Байғабыл ауылы
