Облыстық Қоғамдық денсаулық басқармасының басшысы Марат Пашимовтың айтуынша, өңірдегі медициналық мекемелерде өкпені жасанды тыныстандыру аппараттарының саны 178-ден 332-ге дейін артып, өсім 46,4% болған. Ал оттегі стансасының саны 2 есе артып, 8-ге жетіп отыр. Сондай-ақ 80 бірлік оксигенация аппараты сатып алынды. Оттегі концентраторларының саны 890 бірлікке жетіп, өсім 95%-ды құрады. Оттегі нүктелерінің саны 9,7 есеге артып, 205-тен 2005 нүктеге дейін ұлғайды. Биыл облыстық бюджет есебінен 1 компьютерлік томограф пен 3 сандық рентген аппараттары орнатылды.
Сонымен қатар облыстағы медициналық ұйымдардың пульсоксиметрмен қамтамасыз етілуі 190-нан 3 879-ға дейін жетіп, 95,1%-ға артқан. Коронавирус инфекциясының екінші толқынына дайындық мақсатында облыстың медициналық ұйымдары дәрілік заттармен толық қамтамасыз етілген. Екі айлық қор қалыптастырылған. Облыс бойынша қазіргі таңда бір адам коронавируспен стационарлық ем қабылдауда, ал амбулаториялық жағдайда ем қабылдаушылар – 18. Қарым-қатынаста болған 116 адам – медициналық бақылауда. Әзірге Түркістан облысындағы эпидемиялық ахуал тұрақты, блок-бекеттер қойылмайды.
Дегенмен өңірде жеке азаматтардың той-мерекелерді атап өтуі тыйылар емес. Осы орайда облыстың бас санитарлық дәрігері Нұрбек Нышанов пандемия уақытында облыс тұрғындарын жалпыға ортақ тәртіпті сақтауға шақырды.
«Жаңадан қабылданған қаулыға сәйкес, 3 қарашадан бастап облыс аумағындағы мал базарлары санитариялық-дезинфекциялық режімді күшейтіп, 30%-дан асырмай толтырумен, аптаның жұмыс күндері жұмыс істеуіне рұқсат етілді. Түркістан облысы бойынша 31 мал базары бар. Infokazakhstan сайтына мал базарлардан ашылуға 16 өтініш түсті, оның 7-уі қаралып, төртеуіне жұмыс істеуге рұқсат берілді (Қазығұрт, Ордабасы, Келес, Төлеби), 3-уі қайтарылды, 9 өтініш қаралуда», дейді облыстың бас санитарлық дәрігері.
Жалпы, індеттің таралуына қарсы күрес шараларының аясында өңірдегі денсаулық сақтау мекемелерінің материалдық-техникалық базасы жаңартылуда. Мысалы, жуырда облыстың шалғай ауылдары 12 жылжымалы медициналық кешенмен, жедел жәрдем стансасының паркі 13 реанимобильмен толықты. Облыстық жедел-жәрдем қызметін жыл соңына дейін 122 автокөлікпен жабдықтау көзделген. Бұл медициналық жедел-жәрдем қызметі паркін 96%-ға жаңартуға мүмкіндік береді. Ал шалғай аудандар жылжымалы медициналық кешенмен толық қамтамасыз етіліп отыр. Көшпелі аурухана аудан орталығынан 100-200 шақырым жердегі ауылдарға барып, тұрғындарға қызмет көрсететін болады. Бұл өз кезегінде ауыл тұрғындарының медициналық қызметтерге қолжетімдігін арттырары анық. Заманауи медициналық кешен флюрография, ультрадыбыстық аппарат, зерттеулерге арналған анализаторлар, офтальмоскоп, глюкометр және тағы басқа құралдармен жабдықталған. Дәрігерлер азаматтарды толық тексеруден өткізіп, ауруды дер кезінде анықтай алады. Барлық емдеу мекемелерінде дәрі-дәрмектің 2-3 айлық қоры
қамтамасыз етілген.
Өңірдің қала, аудандарында да медициналық мекемелердің бүгінгі талапқа сай болуы, қажетті жабдық, дәрі-дәрмекпен толық қамтамасыз етілуі – басты назарда. Дәрігерлердің алаңсыз жұмыс істеуіне, бұл орайда еңбегінің адал бағалануына да ерекше мән берілуде. Мысалы, «Әлеуметтік медициналық сақтандыру қоры» КеАҚ Түркістан облысы бойынша филиалы коронавирус инфекциясының алдын алуға, диагностикалауға, емдеуге, эпидемияға қарсы іс-шараларға қатысқан медицина қызметкерлеріне үстемеақы төлеуге 12,7 млрд теңге бөлген. Қор филиалы медициналық қызмет көрсету сапасын мониторингтеу бөлімінің бас сарапшысы А.Ибрагимованың мәліметінше, биылдың наурыз-қыркүйек айлары аралығында 9,3 млрд теңге төленген. Оның ішінде эпидемияға қарсы іс-шараларға тартылған медицина қызметкерлерінің үстемеақысы 6,6 млрд теңге болып отыр. Сондай-ақ науқастарды провизорлық және карантиндік стационарларға емдеуге жатқызуды қаржыландыруға 1,8 млрд теңге жұмсалған. Облыс бойынша 395 мобильді бригада қызмет көрсетеді. Қор бригаданың әрбір шақыруға шыққаны үшін 5 400 теңге ақы төлейді.
Ал Түркістан қалалық орталық ауруханасының бас дәрігері, медицина ғылымдарының кандидаты Жанболат Ділдәбеков эпидемияға қарсы іс-шараларға тартылған медицина қызметкерлері ішінен коронавирус инфекциясын жұқтырған 11 маманға, оның ішінде 8 дәрігерге мемлекеттік әлеуметтік сақтандыру қорынан 2 млн теңге бір реттік төлемақы төленгенін айтады. Оның айтуынша, қазіргі таңда аурухана медициналық құрал-жабдықтармен толық қамтылған. Түркістан қаласындағы «Яссы» шағын ауданында 200 төсектік орынды модульдік типтегі жұқпалы аурулар ауруханасының жаңа ғимаратының құрылысы басталды. Дәрі-дәрмектер, дезинфекциялық заттар мен жеке қорғаныш киімдерінің екі айлық қоры қоймаға жеткізілді. Сондай-ақ қалалық әкімдіктің қолдауымен оттегі бекеті іске қосылды. Жалпы, аурухана өзінің кезекпен және кезектен тыс түскен науқастарына жоғары технологиялық қызметтер көрсетіп келеді.
Ауруханаларға қайырымдылық көмек көрсетушілер әлі де көп. Жуырда Шардара аудандық орталық ауруханасына жомарт жандардың демеушілігімен 10 оттегі концентраторы табысталды. Игі іске ықпал болған «ICC» мақта өңдеу компаниясы Қазығұрт және Төлеби аудандық орталық ауруханаларына да оттегі концентраторларын тарту еткен. Коронавирус инфекциясымен күресте аса қажетті дүниені қабылдап алған аудандық аурухананың бас дәрігері Нұржан Нөсеров демеушілерге бүкіл ұжымы атынан алғысын білдірді. Жалпы Шардара аудандық ауруханада оттегі концентраторларының саны 40-қа жетті.
Коронавирус індетінің таралуына қарсы күрес шаралары аясында аудандық ауруханаға жақында ғана жылжымалы медициналық кешен берілген болатын. Қазіргі таңда ауруханада коронавирус инфекциясымен ем қабылдап жатқан науқас жоқ. Ықтимал екінші толқынға дайындық тұрғысында аурухана 200-ге жуық пульсоксиметр, 9 дана өкпені жасанды тыныстандыру аппаратымен қамтылған. 100 төсектік орын орталықтандырылған оттегі нүктесімен жасақталған. Медициналық ұйымның қызметкерлері тарапынан коронавирусқа қарсы оперативті жоспар даярланды. Дезинфекциялық ерітінділердің, медициналық мақсаттағы бұйымдардың, жеке қорғаныс құралдарының және дәрі-дәрмек қоры толық жабдықталған. Індетке шалдыққан науқастарға медициналық көмекті көрсету үшін 16 мобильді топ құрылған.
Түркістан облысы
