Кировск қаласында Сұлтан Баймағамбетовтің мүсіні қойылды

С.Баймағамбетов атындағы гимназияның алдына қойыл­­ған ескерткіш уақыт өте тозыңқы­рап қалған еді, биыл Санкт-Пе­тербург қаласындағы қазақ ұл­ттық-мә­дени бірлестігі мен Ленинград облысының «Ата-мекен» бір­лестігінің жә­не Қазақстан­ның Санкт-Пе­тер­бургтегі бас кон­сул­дығының ық­пал етуі­мен, ес­керткіштің айналасы абаттандырылып, мү­сін қай­та жаңартылды. Батыр ес­­керткішінің бүтінделуіне Қостанай облысының к­ә­сіп­­керлері демеушілік етіп, 1 млн рубль көлемінде қаржы аударған.

Ескерткіштің ашылу рәсіміне Қазақстанның Ресейдегі елшісі Ермек Көшербаев пен Ленинград облысының губернаторы Алек­сандр Дрозденко қатысты. Сал­танатты жиын барысында Қазақстан елшісі мүсіннің ашылуы Сұлтан Баймағамбетовтің 100 жылдығы мен Жеңістің 75 жылдығына орайлас келгенін тілге тиек етіп, Ленинград об­лысының басшылығына, батыр атындағы білім ордасының оқушылары мен ұстаздарына алғыс айтты.

– Кеңес Одағының Батыры Сұлтан Баймағамбетовтің өш­пес ерлігі екі ел жастарының жадында мәңгі сақталады. Біздің батыр жерлесіміздің ескерткішін қастер­лі орындардың біріне ай­налды­рып, ерлігін кейінгі ұр­пақ­қа өнеге етіп, құрметтеп отыр­ған Кировск қаласының тұр­ғындарына риясыз жүрегіммен ал­ғыс айтамын. Көршілес екі мем­лекетке ортақ тарихи кезең­дер, ескерткіштер бар. Олар­ға құр­мет көрсету қос халық­тың ара­сындағы достық пен сый­лас­т­ықты бұрынғыдан да ны­ғай­та түсетіні анық, – деді Ермек Кө­шербаев.

Ленинград облысының губернаторы Александр Дрозденко Ленинград үшін болған кескі­лес­кен шайқаста ерлікпен қаза тапқан қазақтың қаһарман ұлы Сұлтан Баймағамбетовтің есімін жергілікті жұртшылық ешқашан ұмытпайтынын атап өтті.

– Осы жер үшін шайқасып, қаза тапқан жауынгерлер ұлтына қарап бір-бірін алалаған жоқ. Олар қай жерде туғанына қара­мастан, қан сасыған майдан даласында ортақ отан үшін соғысты. Мен үшін маңыздысы, сұрапыл соғыстың жаңғырығын жалғыз біз – ленинградтықтар ғана есте сақтап қалған жоқпыз, бізбен бірге қазақ халқы да осы топырақты мәңгі жастанған қаһарман ұл­да­рын жоқтайды, – деді губернатор.

Тағылымды шараның соңы­на таман Ермек Көшербаев пен Александр Дрозденко ескерт­кішке гүл шоқтарын қойып, батыр рухына тағзым етті.

1943 жылы Синявин биігі үшін болған ұрыста амбразура­ны денесімен тұншықтырып, ер­лікпен қаза тапқан батыр Сұлтан сол жерде қарулас бауырластар қорымына жерленген.

Қостанай облысы