Сергей Старков иелік ететін кондитерлік цехын бүкіл қала жұрты жақсы біледі. Қолы ашық азамат жерлестерінен қолынан келген жақсылығын аяп көрген емес. Әлемді жайлаған індет Лисаковқа да жетіп, қаланың үстін қауіп бұлты торлай бастағанда Сергей әкімдікке барып, қандай көмек керек екенін сұрапты.
– Лисаков әкімдігіне барып, ақылдасып-кеңесіп, сапалы тепловизор алу керек деген шешімге тоқтадық. Гуанчжоудағы медициналық құрылғылар шығаратын қытайлық зауыттардың бірімен жақсы байланыстамын. Тікелей тапсырыс беруге мүмкіндік бар. Бұл ойымызды Сергей Берваген, Роман Сухин, Алексей Аман, Әлихан Боранбаев секілді кәсіпкерлер де қолдай кетті, – дейді ол.
Кәсіпкерлер қолға алған игі бастамаға жергілікті әкімдік «Рухани жаңғыру» бағдарламасы шеңберіндегі «Көркейе бер, Қостанай» жобасы аясында қолдау білдірген. Әр тепловизордың құны 445 мың теңге тұрады. Құрылғы қол тазалайтын санитайзермен жабдықталған. Кәсіпкерлер Гуанчжоу зауытына ешбір делдалсыз тікелей тапсырыс беріпті. Бір айдан кейін үш тепловизор Лисаковқа жетіп, қала әкімдігінің фронт-кеңсесіне, халыққа қызмет көрсету орталығына және тұрғындар коммуналдық қызмет төлейтін орталыққа орнатылды.
Сергей Старковтың сөзінше, жаңа тепловизорлар адамның дене қызуын айна-қатесіз дәл көрсетеді екен және күннің ыстық-суығына қарамай, тіпті 40 градустық қақаған аязда да мүдірмей жұмыс істей береді.
– Бұл – «not touch» жүйесімен қамтылған «Sunchip» маркалы тепловизорлар. Кәдімгі компьютер сияқты жұмыс істейді. Дене қызуын тексерген әрбір адам туралы жеке мәліметтерді сақтап, суретке түсіріп отырады. Алдындағы адамның маска таққан-тақпағанына дейін тексеріп, нәтижесін сақтап қояды. Бұл тепловизордың тағы бір ерекшелігі – құрылғы өзінде сақталған мәліметтерді қажет жерге жібере алады. Мысалы, тепловизорды қалалық емханалармен байланыстырсақ, құрылғы өзіндегі мәліметтерді тікелей емханаға жіберіп отырады. Бұл ісі бастан асып жатқан дәрігерлердің де жұмысын сәл де болса жеңілдетеді, – деді кәсіпкер.
Тепловизорлардың бірі қала әкімдігінің жанынан ашылған фронт-кеңсенің кіреберісінде тұр. Фронт-кеңсеге келушілер ғимаратқа кірместен бұрын тепловизордың алдына тоқтап, экранға қарайды. Адамның бет-бейнесі компьютер мониторындағы шекара сызығына сыйып тұруы керек. Ақылды құрылғы дене қызуы қалыпты адамға «Сіздің температураңыз қалыпты» деп жауап қатып, экранда жасыл түс жанады. Егер нәтиже керісінше шықса, экран беті қып-қызыл түске боялып, робот «Дене қызуыңыз көтеріліп тұр! Маска тағыңыздар» деп айқайға басып, дабыл көтере бастайды. Лисаковтықтар тепловизор-роботтың адамды тексеруден өткізіп қана қоймай, көпшіліктің көңіл күйін көтеріп, жұртты күлдіретінін қызық көреді. Бағдарламашылар таяу күндері тепловизорлардың барлық мүмкіндігін іске қосады. Осыдан кейін «ақылды» роботтар көпшілік орындардың қауіпсіздігін қадағалайтын нағыз санитар-сақшыларша жұмыс істей бастайды.
Қостанай облысы,
Лисаков қаласы
