Жазушыны еске алуға арналған конференцияның шымылдығы түрілерден бұрын облыстық мәдениет басқармасы дайындаған арнайы көрмеге келушілер назарына ұсынылды. Мұнда Әнуар Әлімжанов көзі тірісінде қолданған жазу машинкасы, тіршілік барысында тұтынған бұйымдары мен киімдері де көзайым тәбәрік ретінде қойылған екен. Көрмедегі зиялы қауым назарын аударған ерекше жәдігердің бірі ұлы ойшыл Әбу Насыр әл-Фараби ғұмырын арқау еткен «Ұстаздың оралуы» романының қолжазбасы болды. Сондай-ақ қаламгердің бірнеше очерк, әңгімелер кітабы, «Көгілдір таулар», «Отырардан жеткен сый», «Қарасұңқар көпірі», «Махамбеттің жебесі», «Жаушы», «Ұстаздың оралуы», «Адамдар жолы», «Таным» тәрізді повесть-романдары да кітап сөресінен орын тапты.
– Кәтепті қара нардай, қажымас журналист-жазушы соңына теңдессіз әдеби және публицистикалық мұра қалдырды. Шығармаларында халықтық тасқынды күш-қуат, ұлттық идеяны тың белеске көтерді. Анасы аштықтан көз жұмып, әкесі нақақтан «халық жауы» атанып, өмірден өткенін көрген жастың ақиқат пен күрес жолына бас тігуі заңдылық еді. Ұлттық сананы көтеру үшін алдымен тарихи сананы негіздеудің қажеттігін ерте түйсінген қаламгердің тарих тақырыбына, ел мен жердің кешегісіне құлаш сермеуінің сырын да осы өрістен іздеуіміз шарт. «Отырардан жеткен сый», «Махамбеттің жебесі», «Жаушы», «Ұстаздың оралуы» романдары рухты айрықша асқақтатты, – деді конференцияда жасаған баяндамасында ақын, Қазақстан Жазушылар одағы Алматы облыстық филиалының директоры Әміре Әрін.
Ал жазушының кіндік қаны тамған Жетісу өңірі Әнуар Әлімжановтың саналы ғұмырында Қазақ елі үшін атқарған өлшеусіз еңбегін үнемі дәріптеп келеді. Қайраткер қаламгердің 90 жылдығына орай өткізіліп отырған шара да соның айғағы.
– Әдебиетте өзіндік қолтаңбасымен, көркем дүниелерімен келешекке мол мұра қалдырған тұлға – Әнуар Әлімжанов. Жас ұрпақ үлгі тұтатын абзал азамат, талантты жазушы, қазақ халқының ұлы перзенті, көрнекті қаламгер облысымыздың Алакөл ауданына қарасты Қарлығаш ауылында дүниеге келген. Әнуар Әлімжановтың шығармаларында бүгінгі өмір кешегі тарихтың заңды жалғасы ретінде суреттеліп, халықтың жарқын болашақ жолындағы жасампаздық күресі, арман, мүддесі шынайы көрініс тапты. Қазақ әдебиетінде өзіндік орны бар қаламгер шығармалары ұлттық мұрамызға мол үлес қосты, оны жаңа мазмұнмен байытып, биікке көтерді. Әнуар Әлімжанов бір сөзінде «Қазақ қоғамы үшін ағарту дәуірі әлі аяқталған жоқ» деген екен. Жазушының бұл сөзі қазір де өзектілігін жойған жоқ, – деді жиында конференция қонақтарын құттықтаған облыс әкімінің орынбасары Рустам Әли.
Кезінде Әнуар Әлімжановтың халық алдындағы қызметіне риза болған заңғар жазушы Мұхтар Әуезов «Егер І Петр Еуропаға терезе тескен болса, Әнуар Әлімжанов – Азияға айқара ашты» деген екен. Әнуар Әлімжановтың өзі де Мұхтар Әуезовті ұстаз тұтып, шәкірті ретінде бас иіп өткен екен. Ал «Қарлығаштан» қанат қаққан қағілез бала бүкіл ғұмырын ұлт руханиятына арнады. Ол Қазақ мемлекеттік университетінің журналистика факультетін бітірген соң «Ленинская смена», «Огни Алатау» газеттерінде қызмет жасады. «Литературная газета» және «Правда» газеттерінің Қазақстандағы меншікті тілшісі қызметін атқарды. Еліміздің Жазушылар одағын басқарды. Сондай-ақ Мәскеудегі республикалар кеңесінің төрағасы қызметін атқарып, Қазақстанның тарих және мәдениет қорының төрағасы болып сайланған. Қазақ қаламгері Кеңес Одағының Азия және Африка жазушыларымен байланыс жасау жөніндегі комитеті төрағасының орынбасары, Бейбітшілік қорғау комитетінің мүшесі бола жүріп шығармашылықтан да қол үзбеген. Оның әдеби туындыларының даңқы ел, одақ көлемінен асып, әр жылдары халықаралық сыйлықтарға ие болып жатты. Жазушыға берілген Джавахарлал Неру, Агостиньо Нето атындағы халықаралық сыйлықтар соның айғағы.
– Әнуар Әлімжанов әлем аралаған саяхатшы, жолжазба жазған қарапайым жазушы емес, ол сонау Африка, Азия елдеріне сапар шегіп, бодандықтан бостандыққа ұмтылған тағдырлас ұлттардың тамыр соғысын, таным-пайымын зерттеген асқан қайраткер қаламгер еді. Оның шығармалары негізінен ұлттық рухқа бағышталса, әрбір туындысы тарихтан тамыр тартып, алты Алаштың аспанында бабалардың өр рухы жаңғырып тұрғанын тебірене термелеуді мақсұт тұтып, соны ұрпаққа аманат етуді көздеген мұратшыл тұлға болатын. Әдебиет саласында жалынды ақын Махамбет, шығыс данышпаны Әбу Насыр әл-Фараби туралы қалам тербесе, көрнекті қоғам және мемлекет қайраткері Мұстафа Шоқайды ақтап алу, Семей полигонын жабу туралы алғашқылардың бірі болып мәселе көтергені күні бүгінге дейін көз алдымызда сақталып, жадымызда жаңғырып тұр, – деді конференцияның құрметті қонағы, Қазақстан Жазушылар одағының төрағасы, Мемлекеттік сыйлықтың лауреаты, ақын Ұлықбек Есдәулет жиында сөйлеген сөзінде.
Ал конференция соңында жазушының қызы Динара Әлімжанова сөз алып, игілікті іске мұрындық болған облыс азаматтары мен зиялы қауым өкілдеріне шынайы алғысын айтты. Ғибраты мол шарадан кейін Әнуар Әлімжановтың мерейтойына орай Алматы облысы әкімінің қолдауымен жарық көрген естелік кітаптың тұсауы кесілді.
Алматы облысы
