Өңірлік коммуникациялар алаңында өткен брифингте «Тобыл» әлеуметтік-кәсіпкерлік корпорациясы басқарма төрағасының орынбасары Байбосын Мурзин:
– Бірінші сұрыпты бидай нанының бағасын тұрақтандыру мақсатында 2020 жылдың 4 қарашасында «Вадиса М» ЖШС-мен арада шарт жасалды. Серіктестік 5000 тонна көлемінде бірінші сұрыпты бидай ұнын жеткізеді. Оған 600 млн теңге бағытталады. Бидай ұны наубайханалық кәсіпорындарға беріледі, бір бөлке нанның бағасы дүкен сөрелерінде 87 теңгеден аспауға тиіс, – деді. Айта кетейік, қазір облыс орталығындағы дүкендерде жұмыртқаның 10 данасы 350-380 теңгеден сатылып жатыр. Дүкен иелері бағаның қымбаттауын тасымалдаушыларға төленетін қаржымен және қосымша шығындардың көбеюімен байланыстырады.
– Биыл мемлекеттік сатып алу шарты бойынша «Жас-Қанат 2006» ЖШС-нан 8 млн дана жұмыртқа сатып алынды. Жұмыртқаның бір данасына 24,5 теңге төленді. Сол себепті дүкендер жұмыртқаның 10 данасын 270 теңгеден асырмауға тиіс, – деді Байбосын Мурзин.
Жергілікті әлеуметтік-кәсіпкерлік корпорациясының мәліметінше, жұмыртқаның 10 данасы 264 теңгеден, қарақұмық жармасының килосы 255 теңгеден аспауы керек. Сұйық майдың шекті бағасы литріне 388 теңге болса, нанның бір бөлкесі 82 теңгеден сатылуға тиіс.
Қостанай облысы
