Құжаттардың қатарында саяси партияның жоғарғы органының партиялық тізімді ұсыну туралы хаттамасынан үзінді көшірме; партия өкілінің өкілеттіктерін растайтын құжат; партиялық тізім; азаматтардың партиялық тізімге енгізуге келісімі туралы өтініші; тізімге енгізілген әрбір кандидаттың өмірбаяндық деректері; партиялық тізімге енгізілген әрбір кандидаттың жеке куәліктерінің көшірмелері; уәкілетті адам қол қойған және саяси партияның мөрімен расталған саяси партияға мүшелігін растайтын құжаттар; саяси партияның Қазақстан Республикасы Әділет министрлігінде тіркелгені туралы құжаттың көшірмесі; партияның Қазақстан Республикасы Орталық сайлау комиссиясының шотына сайлау жарнасын енгізгенін растайтын құжат; кандидат пен оның зайыбының (жұбайының) кірістері мен мүлкі туралы декларациялар тапсырғаны туралы мемлекеттік кіріс органының анықтамасы бар.
Орталық сайлау комиссиясы Партиялық тізімдерге енгізілген Қазақстан Парламенті Мәжілісінің депутаттығына кандидаттардың Конституцияда және «Қазақстан Республикасындағы сайлау туралы» Конституциялық Заңында қойылатын талаптарға сәйкестігін тиісті органдарға сұрау салу негізінде анықтайды.
Парламент Мәжілісінің депутаттарын сайлау жөніндегі күнтізбелік жоспарға сәйкес партиялық тізімдерді ұсынуды саяси партиялар ағымдағы жылғы 10-30 қараша аралығында (сағат 18.00-ге дейін) жүзеге асырады. Партиялық тізімдерді тіркеу ағымдағы жылғы 10 қарашада басталып, 10 желтоқсанда сағат 18.00-де аяқталады.
