Әулиекөл аудандық ішкі саясат бөлімінің тапсырысымен екі жылға межеленген әлеуметтік жобаны Қостанай облысының психологтер ассоциациясы жүзеге асыра бастады. Психолог Евгения Юринаның айтуынша, ауданның кез келген жастағы тұрғыны жаңа орталыққа келіп, басындағы жағдайға қатысты тегін кеңес ала алады. Орталық мамандары көбіне отбасында орын алып жататын зорлық-зомбылық, жанжалдарды шешуге дайынбыз деп отыр.
– Біз күйзеліске ұшыраған отбасылар мен балаларға психологиялық және әлеуметтік-құқықтық көмек көрсетеміз. Осы мақсатта аудандық пробация қызметімен және білім бөлімімен тығыз байланыста жұмыс жүргізіп жатырмыз, – деді жоба жетекшісі Юлия Калюжная.
Психологтерден құралған мобильді топтар 10 шақты шағын елді мекенді аралап, ауыл жастарының күйзеліске қарсы күрес дағдыларын дамытуға арналған арнайы тренингтер өткізіп, ата-аналарға психологиялық кеңес берді. Сонымен қатар ауданның жергілікті мұғалімдері мен психологтеріне отбасындағы зорлық-зомбылық мәселесіне қатысты семинарлар өткізіп жатыр.
Мамандардың сөзінше, орталыққа келушілердің көбі кәмелет жасқа толмаған жасөспірімдер екен.
– Олардың ішінде ата-анасымен немесе құрбыларымен жанжалдасып қалғандар, тұрмысы төмен отбасында тұрып жатқан жасөспірімдер бар. Біздің мамандарымыз оларға психологиялық тұрғыда қолдау көрсетіп, балалардың күйзеліс жағдайынан шығуына көмек көрсетеді. Қандай жағдайда болмасын, баланың мүддесін қорғап қалуымыз керек. Бұл мақсатта пробация қызметімен бірлесіп атқарған жұмысымыз өз жемісін беруде. Мысалы, осы ауданда тұратын кәмелетке толмаған бала өз туысының ықпал етуімен ұрлық жасаған. Аңдамай басып, қылмысқа барған жасөспірімнің өзі осыдан кейін терең күйзеліске түсіп, пробация қызметінің ұсынысымен біздің орталыққа келді. Мамандар балаға психологиялық көмек көрсетуде. Баланың анасы да бізге жиі бас сұғып тұрады.
Биыл мынадай оқиға орын алды. Бұрын балалар үйінде тәрбиеленген екі баланы туыстары асырап алған. Бірақ біраз уақыт өткен соң балалардың ол отбасынан қашып кеткені туралы хабар алдық. Жоғалған балаларды екі күн бойы іздестіріп жүріп әрең таптық. Олар содан бері біздің орталықта тұрып жатыр. Таяуда ғана балалардың жақын туыстары табылып, екі баланы да асырап алатындықтарын хабарлады, дейді Е.Юрина.
Психологтер қамқорлық мекемелерімен де тығыз байланыста жұмыс істеп келеді. Дағдарыс орталығының мамандары аталған мекемелердің өкілдерімен бірге тұрмысы төмен 30 шақты отбасын аралап, тұрмыстық, психологиялық кеңес берген.
Қостанай облысы
