Саясат • 27 Қараша, 2020

Алдағы жылдың басты міндетін айқындады

9 рет көрсетілді

Орталық коммуникациялар қызметінде өткен онлайн баспасөз конференциясында Қостанай облысының әкімі Архимед Мұхамбетов Мемлекет басшысының Жолдауы аясындағы өңірді дамыту жұмыстары туралы баяндап, БАҚ өкілдерінің сауалдарына жауап берді.

Аймақ басшысының айтуынша, биыл облыста «Нұрлы жер» мемлекеттік бағдарламасы мен «Жұмыспен қамту жол картасы» шеңберінде ауылдарды ауыз сумен қамтамасыз ету мақсатында іске қосылған 37 жобаға 9,6 млрд теңге қаржы бөлінген. Бүгінге дейін бұл қаржының 81 пайызы игерілді.

Ауылды сапалы ауыз сумен қамтуды жеделдету мақса­тын­да соңғы жылдары облыс аумағындағы көптеген елді ме­кен­­дерге су тарату торабы орнатыла бастады. Қазір ауылды сумен қамтамасыз ету бойынша жалпы құны 35 млрд теңге болатын 41 жоба әзірленіп жатыр. Алдағы уақытта жалпы саны 75,5 мың адам тұратын 69 ауылға орталықтандырылған су құбыры тартылады. 22 ауылға су тазарту және тарату пункттері салынып, 9 елді мекеннің су құбыры жаңартылады.

– Осылайша, алдағы екі жылда жалпы саны 180 ауылды сапалы ауыз сумен қамтамасыз етуді жос­парлап отырмыз, – деді Архимед Мұхамбетов.

Қостанай облысында корона­ви­рустық инфекцияның алғашқы толқыны кезінде іс жүзінде өнер­кә­сіптік кәсіпорындардың бар­лығы дерлік әдеттегі режімде жұ­мыс істеді, шығарылатын өнім кө­ле­мі сақталды. Кәсіпо­рын­­дар­дың өндірістің іркілмеуін қам­­тамасыз ету, шикізат жеткізу, жұ­мыспен қамтуды сақтау жөнін­дегі шараларды көздейтін дағда­рыс­қа қарсы жоспарлары бар. Аграршылар да көктемгі дала және егін жинау жұмыстарын уақ­тылы жүргізді. Нәтижесінде жалпы өңірлік өнім шамамен 3%-ға өседі деп күтілуде.

Аймақ басшысы биыл облыс­тың ауыл шаруашылығы толық­тай мемлекеттік қолдауға ие болғанын айтты. Жыл басында облыстың ауыл шаруашылығын дамытуға субсидия және бюджеттік несие түрінде 38,4 млрд теңге бөлінген. Егін шаруашылығына 13,8 млрд теңге, мал шаруашылығына 6,9 млрд теңге бөлініп, өзге бағыттарды дамытуға 17,7 млрд теңге тиген. Биыл ауыл шаруа­шы­лы­ғы­на мемлекет өткен жылмен салыс­тыр­ған­да 5,4 млрд теңге артық қаржы бөліп отыр.

– Осы жылы облыста 4 млн 51 мың гектар алқапқа дәнді және дәнді-бұршақты дақылдар себілді. Оның ішінде 3 млн 438 мың гектарға бидай, 640,5 мың гектарға майлы дақылдар егілді. Жыл өткен сайын астық­ты өңірде майлы дақылдар алқа­бының көлемі ұлғайып келе­ді. Салыстырмалы түрде айт­сақ, жерді әртараптандыру сая­сатының тиімді жүргізілуі нәти­жесінде жыл ішінде майлы да­қыл­дар алқабы 130,4 мың гектарға ұлғайды, – деді әкім.

Архимед Мұхамбетов облыс­тың экономикалық даму көрсет­кіш­терінде өсім бар екеніне тоқ­тал­ды.

– Биылғы жылдың 10 айында негізгі макроэкономикалық көр­сеткіштер оң динамикаға ие: өнеркәсіп өндірісінің өсуі 6,9% – ды (оның ішінде өңдеу өнер­кәсібінде – 19,3%), құры­лыс жұмыстары 23%-ды, тұр­ғын үйді пайдалануға беру – 9,5%-ды, ауыл шаруашылығы 21,3%-ды, ал негізгі капиталға инвес­ти­ция­лар­дың өсуі 11,0%-ды құрады, – деді ол.

«Ауыл – Ел бесігі» бағдар­ла­­масы басталған екі жылға жуық уақыт ішінде Қостанай облы­сында 258 елді мекенде аурухана, мектеп, балабақшалар жөн­деуден өтіп, жүздеген көше бүтінделді. Былтырдың өзінде Әулиекөл, Меңдіқара, Қарасу, Сарыкөл және Федоров ауылдарында жалпы құны 2,2 млрд теңге болатын 72 жоба жүзеге асты. Ауылды дамытуға бағытталған инфрақұрылымдық жобалардың ауқымы биыл едәуір кеңейе түс­кен.

Биыл жыл соңына дейін «Нұрлы жер» тұрғын үй құры­лы­сы бағдарламасын іске асыру аясында облыста барлық қаржыландыру көздері есебінен 379,3 мың шаршы метр тұрғын үй салынады. Бұл көрсеткіш 2019 жылмен салыстырғанда 13 %-дық өсімді қамтамасыз етуге мүмкіндік береді.

«Цифрлы Қазақстан» мем­ле­кет­тік бағдарламасын іске асыру аясында Қостанай облысында 2020-2021 жылдарға арналған об­лыстық цифрландырудың жол картасы бекітілді, ол 91 іс-ша­ра­дан тұрады. Жобаларды іске асы­руға 11,5 млрд теңге, оның ішінде мемлекеттік бюджеттен 5,7 млрд теңге, жеке инвестициялардан 5,8 млрд теңге бөлініп отыр. Мемлекеттік бағдарлама бес ба­ғыт­тан тұрады. Оны орындау аясында экономика, әлеуметтік сала, ТКШ және қалаларды бас­қа­ру салаларында цифрландыру жүйелерін енгізу бойынша жұ­мыс­тар жүр­гі­зілуде.

Облыста автокөлік құрастыру саласының қарқынды дамып келе жатқанына ерекше тоқталған ай­мақ басшысы қазір өңірде 6 мың жаңа жұмыс орнын ашуға мүм­кіндік беретін, жалпы құны 1,5 трлн теңге тұратын 42 ин­вес­ти­ция­лық жоба жасалып жатқанын айтты.

– Мәселен, биыл наурыз айында «СарыарқаАвтопром» серік­тес­тігінде өзбекстандық әріп­тес­­терімізбен бірге «Chevrolet» авто­кө­ліктерін шығаратын өндіріс орнын аштық. «АгромашХолдинг KZ» АҚ-да ауылшаруашылық техникаларының бөлшектерін шығаратын локализациялық орталықты ұйымдастыру жұмысы жүріп жатыр. Облыстағы машина құрылысының үлесі бүгінде 43,4%-ға жетіп отыр. Ал машина өндірісі жыл басынан бері бір жарым есеге дейін ұлғайды. Алдағы жылы «КамАЗ» жүк көліктеріне арналған жетекші белдемелер шығаратын шойын зауытын ашу жоспарланып отыр. Бұлардың бәрі экспорт бағытындағы жобалар болып табылады. Өнімнің 90 пайызы Ресейдің «КамАЗ» зауытына жіберілетін болады, – деді А.Мұхамбетов.

Аймақ басшысы БАҚ өкілдері тарапынан қойылған сауалдарға жауап берді. «Қостанайда таяуда ғана ұлы ағартушы Ыбырай Алтынсаринге ескерткіш қойыл­ға­нын естіп қуанып қалдық. Бірақ осы ескерткішке жазылған ағар­тушының «Кел, балалар, оқы­лық!» өлеңінде бір емес, бірнеше қате кеткенін естіп, іштей өкіндік. Қате түзелді ме?» деген сауалға облыс әкімі:

– Мүсіншінің бастапқы жобасында бәрі дұрыс болған. Оны арнайы комиссия тексеріп, ма­құл­даған. Бірақ мүсін Ресейде жасалды. Қате сол жақта жібе­рі­ліп отыр. Біз бұл қатені түзеттік. Мұның сыртында, биыл облыс орталығында ұзындығы екі шақырым болатын Ыбырай Ал­тын­­сарин көшесі жөнделді. Оған 9 млн теңгеден артық қар­жы жұмсалды. Сонымен қатар осы көшеде орналасқан көп қа­бат­ты тұрғын үйлердің шатырла­ры ауыстырылып, қасбеттері жаңар­тылып, жылы әрі заманауи құрылыс материалдарымен қапталып, қаламыздың ажарын аша түсті, – деп жауап берді.

Соңғы жаңалықтар

26 қаңтардағы валюта бағамы

Қаржы • Бүгін, 12:46

Кобидің қазасы

Спорт • Бүгін, 10:47

Ұқсас жаңалықтар