– Аудандағы жастар ресурстық орталығында волонтерлер штабы құрылған. Мұнда аудан орталығындағы мектептерден және жергілікті агротехникалық колледжден 54 ерікті жас жұмыс істеп жатыр. Сондай-ақ жыл басында мемлекеттік мекемелер мен қоғамдық ұйым өкілдерінен 59 адамнан тұратын волонтерлер тобы құрылды. Волонтерлер штабы 409 адамды қамтитын 56 іс-шара өткізді, 617 адамға көмек көрсетілді. Сонымен қатар ауданның әр мектебінде волонтер жасақтары жұмыс істейді, онда 100-ден астам волонтер бар. Оқушылар өткізетін іс-шаралар еңбек ардагерлеріне, зейнеткерлерге және жалғыз басты адамдарға көмектесуге бағытталған. Тақырыптық концерттер мен экологиялық акциялар өткізіледі, – дейді Қарабалық ауданы Жастар ресурстық орталығының жетекшісі Ирина Алтынникова.
Бұқаралық іс-шараларды өткізуге тыйым салуға байланысты наурыз айынан бастап әлеуметтік желілерде белсенді волонтерлік жұмыс басталды. Оның ішінде жастар белсенді атсалысқан «Үйде бол!», «Бетперде киюді ұмытпа!», «Қашықтықты сақта!», «Уақытты пайдалы өткіз», «Мен Отанға қызмет етуге дайынмын!» сияқты бейнероликтерді атап өтуге болады. Мұның сыртында, дәрігерлерге қолдау көрсету мақсатында «Мың алғыс!» шарасы да ұйымдастырылған.
Ерікті жастар аудан тұрғындарына шектеу шараларын сақтаудың маңыздылығын түсіндіру жұмыстарына да белсенді атсалысып келеді. Өткен айда волонтерлер мен МОО қызметкерлері полиция қызметкерлерімен бірлесіп карантин шараларын сақтау туралы түсіндіру парақшаларын таратты. Волонтер жасақтары аудандық ауруханамен де тығыз байланыста болып, төтенше жағдай кезеңінде зейнеткерлерге және ауруханада есепте тұрған жалғызбасты адамдарға дәрі-дәрмек тасымалдауды ұйымдастырды.
– Сәуір айынан бастап зейнеткерлерге, мүмкіндігі шектеулі жандарға және ауданның әлеуметтік қызметкерлеріне бетперде тігу жұмыстары басталды. Волонтерлер тіккен мыңнан астам маска әлеуметтік қорғау бөліміне берілген, олардың бір бөлігін МОО қызметкерлері өз бетінше алып кетіп отырған. Елдегі қалыптасқан жағдайға байланысты мерекелік іс-шаралар әлеуметтік желілерге ауыстырылды. 6-8 мамыр аралығында волонтерлер 130 тыл еңбеккерін құттықтап, оларға Екінші дүниежүзілік соғыстағы Жеңістің 75 жылдығын мерекелеуге арналған естелік медальдарды тапсырды. Сондай-ақ бұл күндері әлеуметтік желілерде кент тұрғындарының қатысуымен «Жеңіс лентасы» және «Соғыс әндері» акциялары өткізілді. Мемлекеттік рәміздер күнін мерекелеуге орай «Мен патриотпын!» еріктілер мен кент тұрғындарының қатысуымен Қарабалық батыр мемориалында еліміздің Әнұраны орындалды, - дейді орталық жетекшісі.
Тамыз айында Қарабалық волонтерлері «Таза жағалау» экологиялық акциясын ұйымдастырды. Волонтерлер мен кент тұрғындары ортақ күш-жігермен Тоғызақ өзені жағалауының 15 шақырымын тазалап, 2 тіркеме қоқыс шығарды. Ауданда қалыптасқан эпидемиялық жағдайға байланысты Жастар ресурстық орталығы мемлекеттік әлеуметтік тапсырыс бойынша тек 1 жобаны «Волонтерлер мектебін» іске асырған. Жобаның негізгі міндеті – ауылдық жерлерде жастар бастамаларын дамыту. Бір ай ішінде ҮЕҰ мамандары волонтерлік жасақтарды қалыптастыру және әлеуметтік жобалардың негізгі қағидаттарын түсіндіру мақсатында ауылдық округтердің жастары үшін онлайн-тренингтер өткізді.
«Волонтерлер мектебі» жобасының аяқталуы 23 қазанда өткен Әлеуметтік еріктілер жобаларының жәрмеңкесі болды. Ауылдық округтер мен Қарабалық кентінен 10 бастамашыл топ өз жобаларын ұсынды. Жүлде қоры 900 мың теңгені құрады. Қарабалық кентінің «Хоккей кортын ішінара жөндеу» жобасын іске асыруға «Қарабалық волонтерлері» ақпараттық тобы 300 000 теңге көлемінде грант алды. Тоғызақ орта мектебінің волонтерлері «Мектеп телестудиясы» жобасына 200 мың теңге, Победа ауылының волонтерлері бұлақ аумағын абаттандыруға 200 мың теңге алды. 100 мың теңге Өрнек Мәдениет үйі үшін проектор сатып алуға және «Станционный ауылында туризм мен спортты дамыту» жобаларына берілді.
Ауданда желтоқсан айында Волонтер жылын қорытындылау шарасын өткізу жоспарланып отыр. Ауқымды шараға арнайы «Жыл волонтері – 2020» байқауының ережесі әзірленді. Белсенді волонтерлер мен бастамашыл топтарды марапаттау «Үздік волонтер», «Үздік волонтерлік ұйым», «Үздік волонтерлік жоба» аталымдары бойынша өтеді. Байқаудың ережесі мен өтінім нысаны ауылдық округтерге, ауданның мемлекеттік мекемелері мен ұйымдарына жіберілген.
– Биыл, ең бірінші кезекте, волонтерлерге деген қоғамдық көзқарас өзгерді, сондай-ақ облысымызда волонтерлік қозғалыстың қанаты кеңи түсті. Қазір ауданымызда волонтерлік орталық құрылмаған білім ошағы кемде-кем. Бұл жастардың әлеуметтік жауапкершілігінің артқанын көрсетеді, – дейді қарабалықтық жастар.
Қостанай облысы,
Қарабалық ауданы
