Әзірбайжан Мәдиұлы – ұлттық театр өнері мен режиссурасына өлшеусіз үлес қосқан қайраткер тұлға. Көзі тірісінде-ақ айрықша шығармашылық көзқарас, жаңашыл ойларымен театр әлемінде есімі аңызға айналған дарын иесінің, әсіресе астананың өнері мен мәдениетін дамытудағы еңбегі ерен. Бас қаланың Қ.Қуанышбаев атындағы академиялық қазақ музыкалық драма театрына 1999 жылы Елбасы Назарбаевтың арнайы шақырумен келіп, сол кездегі адымын апыл-тапыл басқан жас театрдың көркемдік тұрғыдан биік деңгейге көтерілуіне зор еңбек сіңірді. Талай буын әртістерді тәрбиелеп, өзінің шығармашылық һәм ұстаздық сара жолын қалыптастырды. Бүгінде аңыз режиссердің сол бір өлшеусіз еңбегі бас шаһар әкімдігі тарапынан бағаланып, қайраткер тұлғаның тағылымды жолы осылайша ұлықталды.
Салтанатты жиынға қала әкімі Алтай Көлгінов, Әзірбайжан Мәмбетовтің жары, Қазақстанның халық әртісі, белгілі опера әншісі Қорлан Қалиламбекова, режиссердің туыстары мен елорданың өнер қайраткерлері, сонымен қатар бас қаладағы театрлардың директорлары қатысты. Елорда басшысы мәлім еткендей, Nomad театры енді «Әзірбайжан Мәмбетов атындағы драма және комедия театры» ресми атауына ие болды.
Ресми ашылудан кейін театр ұжымы көрермен назарына Абай Құнанбайұлының 175 жылдығына арналған «Жас Абай» драмасының премьерасын ұсынды. Қойылым режиссері – Қазақстанның еңбек сіңірген қайраткері Нұрлан Жұманиязов.
Еске сала кетсек, Nomad театры – елордамызда бой көтерген мәдениет ошақтарының бірі. Қазіргі таңда театр талантты әрі өнерлі қыз-жігіттердің басын біріктіріп, бас шаһар тұрғындары мен қонақтарына мемлекеттік тілде әртүрлі жанрдағы спектакльдер мен қойылымдарды ұсынып, еліміздің мәдени дамуына үлесін қосып келе жатқан таланттар ордасы.
Енді міне, 2020 жылдың 18 желтоқсанынан бастап ресми түрде «Әзірбайжан Мәмбетов атындағы драма және комедия театры» атауына ие болған өнер ордасының алға қойған мақсаты мен шығармашылық жоспары көп. Басқаны айтпағанда, театрға Әзірбайжан Мәмбетов есімінің берілуі жас ұжым үшін үлкен жауапкершілік жүктейтіні сөзсіз.
