Жаңа зауыт іске қосылса, мұнда жылына 20 мың тоннаға дейін ет өңделетін болады. «Beef Export Group» серіктестігінің бастамасымен қолға алынған ауқымды жобаның құны – 5,1 млрд теңге.
Аймақ басшысы Архимед Мұхамбетов жаңа салынып жатқан нысанға барып, құрылыс барысымен танысты.
«Зауыт іске қосылса, 180-нен астам жаңа жұмыс орны ашылмақ. Жобаны бизнесті дамыту институттары қолдағанын және «Қарапайым заттар экономикасы» бағдарламасы аясында жүзеге асырылып жатқанын атап өткен жөн. Аталмыш жоба облысқа келіп жатқан ет импортын азайтып, негізгі шикізат көзі болып табылатын жергілікті шаруа қожалықтарын дамытуды көздейтінін атап өткім келеді», деді облыс әкімі.
Ет өңдеу зауытының әкімшілік-тұрмыстық ғимараты, автокөлік жуатын екі кешені, санитарлық-тұрмыстық ғимараты мен шеберханасы, ет өңдейтін негізгі өндіріс алаңы мен қосымша инфрақұрылымдық нысандары бар. Зауыт құрылғылары Еуропа елдерінен, атап айтқанда, Польша, Ресей, Италия мемлекеттерінне әкелінбек.
Қазір зауыт ғимаратының құрылысы аяқталып, негізгі өндірістік ғимаратта құрылыс-монтаждау жұмыстары жүріп жатыр. Ет өңдеу кешені биыл күзге қарай іске қосылмақ.
