Облыстық білім басқармасының басшысы Зәуре Байменова өңірлік коммуникациялар қызметінде өткен баспасөз жиынында білім беру үдерісінің үшінші тоқсанда қалай ұйымдастырылатыны туралы баян етті.
Басқарма басшысы өңірде жалпы саны 31 мыңнан астам бала білім алатын 114 мектептегі 1-5-сыныптарда 2 611 кезекші топ жұмыс істейтінін жеткізді.
«Оқытуды ұйымдастыру былайша жүргізіледі: оқу пәндерінің 70%-ы мектеп қабырғасында, 30%-ы қашықтан оқытылады. Мысалы, алгебра, геометрия, физика, химия, биология, тарих пәндері штаттық режімде, мектеп партасында оқытылады. 9, 11-сынып пәндері бойынша оқу жоспарының сағаттарын бөлу қайта қаралуы мүмкін. Жоғары сынып оқушыларының ата-аналарынан өтініштер талап етілмейтінін атап өткім келеді, бұл сыныптар толық құрамда аралас форматта оқитын болады», деді З.Байменова.
Өңірдегі қалған 114 мектептегі 38 мыңнан астам бала қашықтан білім алады. Сонымен қатар ата-аналар мен мұғалімдердің келісімі бойынша қосымша сабақтар мен оқушыға жеке кеңес беру үшін шағын топтар ашылуы мүмкін. Мұндай топтардағы оқушы саны бес баладан аспайтын болады.
Облыстағы колледждер де білім беру форматын өзгертті. Екінші семестрден бастап өңірдегі кәсіби білім беретін оқу ошақтарының 1-курс студенттері колледж партасына отыратын болады.
Қостанай облысы
