Қазақ театры 2000 жылдың 14 қыркүйегінде Тұңғыш Президент Нұрсұлтан Назарбаевтың қатысуымен ашылған болатын.
Архимед Мұхамбетов пен облыстық мәдениет басқармасының басшысы Ерлан Қалмақов театр жанындағы музейге арнайы кірді. Мұнда театр тарихына қатысты құнды экспонаттар сақталған.
– Осы уақыт ішінде театрдың шығармашылық ұжымы көрермендерін мазмұнды репертуарымен қуантып келеді. Әр жылдары республикалық, халықаралық фестивальдерге қатысып, ел аумағында және шетелдерде гастрольдік сапарлармен аралап қайтты. Театр ұжымына алдағы уақытта да зор шығармашылық табыстар тілеймін! – деді театр әртістерімен кездескен аймақ басшысы.
Кездесу барысында облыс басшысы театр әртістері Мейрам Жапаров, Бақытжан Таңатқанұлы, Олжас Бегайдаров, Азамат Шүкеев, Гүлнар Шаймердиноваларға «Мәдениет саласының үздігі» төсбелгісін, Марғайша Сабыржановаға «Еңбек ардагері» медалін, Шахарбану Есенғұловаға Мәдениет және спорт министрлігінің Құрмет грамотасын, Мөлдір Құбаш, Нұрлыбек Кенжеахметов, Бахыткүл Хамитқызы сынды жас әртістерге Мәдениет және спорт министрлігінің алғыс хатын табыс етті. Театрдың бірнеше қызметкері облыс әкімінің грамотасымен наградталды.
Салтанатты жиында облыс әкімі театр басшысына аудандарға гастрольдік сапарға жиі шығып тұруды тілек етіп, автобус сертификатын ұстатты.
Қостанай облысы
