Қоғам • 22 Қаңтар, 2021

Жануарлардың жанашыры

15 рет көрсетілді

Көп жағдайда айналамыз­дағы жандардың жеке өміріне қатысты ақпараттарға назар сала бермейміз. Өткен ға­сыр­­дың 80-жылдарында Алматы хайуанаттар бағында барыстың аланын бағып, аман алып қалған азамат Хусаин Бұрханов екенін әріптестері бүгінде зор ықыласпен еске алады.

Алматы хайуанаттар ба­ғы­ның архивінде сақталған мына бір сурет соның дәлелі болса керек. Осы мекемедегі қырық жылға жуық еңбек жолын табиғаттың бір бөлшегі – жануарларды күтіп-баптауға арнаған Хусаин Сахипұлы Ал­маты хайуанаттар бағына 1970 жылдардың басында келген.

Жарты ғасыр бойы Ертіс өзе­нінде жүзген «Роза Люк-сем­­бург» жолаушы кемесі 1966 жылы Алматы зообағына сый­ға тартылды. Зообақтың даму бөлімінің меңгерушісі Ақжәми Рахимованың берген қызықты мәліметтеріне сүйенетін болсақ, сол кеме қай­та жарақталғаннан кейін судағы хайуанаттар бағы қыз­метін атқарған. Еліміз ғана емес, Ресейдің шекаралас қа­ла­ларына да барып, мамыр-қазан айларында барыс, аю, қолтырауын, маймыл, тотықұс сияқты жануарлардың 120 түрі­мен таныстыру экскурсиялары өтіп тұрған. Осы ке­медегі көш­пелі зообаққа 1970-1974 жыл­дары Хусаин Сахип­ұлы же­тек­шілік етіпті. Көшпелі хайуанат­тар бағы он жылға жуық уақыт шамасында Ертіспен жү­­­зіп, көпшілікке қызмет көрсеткен.

Ал зообақтағы мына бір оқиғада Хусаин Сахипұлының еңбегі ерен. 1985 жылы туған аланға хайуанаттар бағының қызметкерлері «Альчик» деп ат қояды. Алайда алан әлжуаз болып туғандықтан, оның аяғынан тік тұрып кететініне ешкім сенбеген. Өз ісіне адал, жануарларға жан-тәнімен етене жақын Хусаин Сахипұлы аланның оңалып кетуіне бар­лық жағдайды жасап, қолдан азықтандырып, сүтпен қо­рек­­­тендіріп, күндіз-түні қада­ғалап отырды. Ерекше қамқор­лықтың нәтижесінде төрт айдан кейін кішкентай аң күш жинап, аяғынан нық тұрады. Қолға да үйретіледі. Осылай­ша 1985-1987 жылдары түсіріл­ген «Тигр снегов» фильміне Альчик таңдап алынған. Бұл жануар 1990 жылы BBC түсір­ген «Аспантаулар» деректі филь­­мінің де кейіпкері болға­ны белгілі.

Жануарлардың шынайы жанашыры бола білген кең жүректі Хусаин Сахипұлы көп жылдар бойы Алматы хайуанаттар бағында ветеринарлық бөлімде, одан кейін «Тұяқ­ты­лар», «Жыртқыш сүтқо­рек­тілер», «Жыртқыш құстар» секцияларында еңбек етті. Бүгінде Хусаин Сахипұлының жарқын істерін әріптестері сағынышпен еске алады.

Табиғатқа қорған, жануар­ларға жанашыр осындай ізгі ниетті адамдардың өмір жолы мен өнегелі істері кейінгі ұр­паққа үлгі.

 

АЛМАТЫ

 

Соңғы жаңалықтар

«Nissan Primera» көлігі жылқы соқты

Аймақтар • Бүгін, 13:25

Ұстаздар үйіндегі қайырымдылық

Аймақтар • Бүгін, 10:15

Ұқсас жаңалықтар