2020 жылы әлемдік экономиканың даму қарқыны баяулап, өндіріс көлемі айтарлықтай құлдырағаны белгілі. Бұл жағдай «Қазақстанның даму банкінің» несие беру қызметіне әсер етпей қойған жоқ. Соған қарамастан банк өткен жылды оң көрсеткіштермен аяқтады. Алдын ала қорытындыларға сүйенсек, банктің таза табысы 25,4 млрд теңгені құрапты. 2019 жылмен салыстырғанда даму институтының меншікті капиталы 21 пайызға көбейіп, 516 млрд теңгеге жеткен.
«Қазақстанның даму банкі» АҚ басқарма төрағасы Абай Сарқұловтың айтуынша, банк коронавирус пандемиясына байланысты қалыптасқан күрделі жағдайға қарамастан, несие қоржынын ұлғайтуды жалғастыруда. 2020 жылдың алдын ала қорытындылары бойынша оның көлемі 1 трлн 974 млрд теңгеге жеткен. Көрсеткіш 2019 жылмен салыстырғанда 14,2 пайызға жоғары.
– 2020 жылы жалпы сомасы 195,4 млрд теңге болатын 9 инвестициялық жоба мен 4 экспорттық операцияны қаржыландыру мақұлданды. Оның қатарында Hyundai жеңіл автомобильдерін шығаратын зауыт құрылысы, Қарағанды қаласында кен байыту фабрикасын салу әрі құю өндірісін жаңғырту, агломерациялық фабрикасы бар Сарыарқа ферроқорытпа зауытын салу, «Керуен-Сарай» туристік кешенінің құрылысы, сондай-ақ Жамбыл облысы Қордай ауданындағы бес елді мекенге газ құбырын тарту сияқты ірі жобалар бар, – деп нақтылады Абай Сарқұлов Орталық коммуникациялар қызметінде өткен брифингте.
Басқарма төрағасының айтуынша, былтыр банк қаражатына 9 ірі кәсіпорын жаңғыртылып, пайдалануға берілген. Оның бәрі өңірлердің дамуына әлеуметтік-экономикалық тұрғыдан айтарлықтай серпіліс әкелген жобалар. Соның нәтижесінде республика бойынша 1 942 жаңа жұмыс орны ашылған. Сонымен қатар банк қолдау көрсеткен кәсіпорындардың республикалық бюджетке 17 млрд теңгеден астам түсім әкелгенін атап өткен жөн.
– Қайта жаңғыртылып, іске қосылған жобалардың ішінде өндірістік алыптардан бөлек, «жасыл» технологиялар да баршылық. Мәселен, Ақмола облысында «Астана ЭКСПО-2017» жел электр стансасының 50 МВт-тық екінші кешені мен Алматы облысында «Қаскелең 50 МВт» күн электр стансасының құрылысын атап өтуге болады. Сондай-ақ Маңғыстау облысында «Aktau Resort Hotel» көпфункционалды қонақүй-туристік кешені мен Алматыда Hyundai жеңіл автомобильдерін шығаратын зауыт пайдалануға берілді. «Транстелеком» АҚ теміржол желілері бойындағы байланыс платформасының аппараттық-бағдарламалық кешенін іске қосу жүзеге асырылды, – деді А.Сарқұлов.
Былтыр қор жинау көлемі 542 млрд теңгені құраған. Оның 74,9 пайызы – нарық қаражаты. Бұл ретте банк мемлекеттің әрбір теңгесіне 2,98 теңге нарықтық қарыз тартқан. «Қазақстанның даму банкі» қор жинау құрылымындағы мемлекеттік қаражат үлесін төмендету үшін ішкі және халықаралық капитал нарықтарынан қарыз тартудың түрлі көздерін пайдаланады.
– Мәселен, тартылған нарық қаражатының 35 пайызын банкаралық қарыздар, 15 пайызын теңгемен деноминацияланған еурооблигациялар, 40 пайызын жергілікті облигациялар, 10 пайызын басқа қаржы институттарының депозиттері құрады. Несие қоржынының құрылымындағы теңгедегі қарыздардың үлесі 2013 жылмен салыстырғанда 54,5 пайызға дейін немесе 1 трлн 76 млрд теңгеге дейін ұлғайтылды. 2013 жылы аталған көрсеткіш 20,5 пайызға немесе 78 млрд теңгеге тең еді, – деді басқарма төрағасы.
«Қазақстанның даму банкі» АҚ 2015-2019 жылдарға арналған индустриялық-инновациялық даму бағдарламасының негізгі операторы ретінде 544,2 млрд теңгеге 26 инвестициялық жобаны қаржыландыруды мақұлдаған. А.Сарқұловтың айтуынша, аталған жобалар елдің әлеуметтік-экономикалық жағдайына оң әсер еткен.
– 2015-2020 жылдары 5,5 мың жаңа жұмыс орны құрылды. Өткен жылдың 9 айының қорытындысы бойынша сатылған өнім көлемі 1 трлн 349 млрд теңгені, экспорттық өнім көлемі 1 трлн 44 млрд теңгені құрады. Бұл ретте бюджетке түсетін салық төлемдерінің көлемі шамамен 187 млрд теңгеге жетті, – деді ол.
«Қазақстан даму банкінің» стратегиялық жоспарына сәйкес, биыл 820 млрд теңгеге жобаларды қарастыру жоспарлануда. Сондай-ақ 460,8 млрд теңгеге қарыз беріледі деп күтілуде. Жалпы, банк осы жылы 10 өндірісті жаңғыртып, пайдалануға беруге ниетті.
