Шағын және орта кәсіпкерлікке назар
Пандемиядан зардап шеккен экономиканы қалпына келтіру, індеттің ықтимал тәуекелдеріне дайындық жұмыстарын пысықтап, халықтың өмір сүру сапасы мен әл-ауқатын көтеру қажет. Егемен еліміздің 30 жылдық мерейтойында артық даңғаза мен ысырапшылдыққа жол бермей, халқымыздың ауызбірлігі мен ынтымағын нығайтып, өскелең ұрпақтың бойында Отанға деген сүйіспеншілікті арттыратын мемлекетіміздің құндылықтарын дәріптеуге басымдық берілуі тиіс.
Осы және өзге мәселелер қаралған алқалы отырыста алдымен Президентке еліміздің былтырғы кезеңдегі әлеуметтік-экономикалық көрсеткіштері баяндалды. Үкіметтің атқарған жұмысына қаныққан Мемлекет басшысы алда іске асырылатын негізгі міндеттер мен жіберілген олқылықтардың орнын толтыруға бағытталған жоспарларға тоқталды.
«Біріншіден, экономикалық белсенділікті қолдау. Пандемия мен карантин шектеулері, сауда қатынастарының бұзылуы еліміздегі іскерлік белсенділікке кері әсерін тигізді. Көптеген ірі кәсіпорынның көрсеткіші төмендеді. Әсіресе, шағын және орта бизнес қатты зардап шекті. Былтыр дағдарысқа қарсы бірқатар шара қабылданды. Оның ауқымы аса зор болғаны және жедел жүзеге асырылғаны баршаңызға белгілі. Бизнестің сұранысына ие болып отырған маңызды шаралар осы жылдың соңына дейін ұзартылды. Шағын және орта бизнес халықтың үштен біріне жұмыс тауып беріп отыр. Бір сөзбен айтқанда, оның ахуалы қандай болса, халықтың жағдайы соған пара-пар келеді. Биыл шағын және орта бизнеске қолдау көрсету ең басты назарда болуға тиіс. Үкіметке «Атамекен» ұлттық кәсіпкерлер палатасымен бірлесіп, бір айдың ішінде осыған қажет іс-шаралар топтамасын әзірлеуді тапсырамын. «Еңбек» мемлекеттік бағдарламасы – халықты жұмыспен қамтудың негізгі құралы. Оның «Бастау-бизнес» бағыты бойынша 150 мыңнан астам адам оқып шықты. Бірақ тек 10 пайызы несиеге, 19 пайызы грантқа ие болды. 100 мыңнан астам адам мемлекет қолдауынан тыс қалды. Әсіресе, бағдарламаның ауылдағы түлектеріне қаржы жетпей жатыр. Сондықтан бағдарламаның қаржы көлемін ғана емес, оны жүзеге асыру ұстанымдары мен тетіктерін қайта қарауымыз керек. Халыққа берілетін шағын несиелердің ставкасы 6 пайыздан аспауға тиіс», деді Қасым-Жомарт Тоқаев.
Жергілікті қамту үлесіне басымдық берілуі тиіс
Президент Үкімет мүшелері мен әкімдердің сатып алу бағытында жергілікті өнімнің үлесін арттыруда жүргізілген жұмыстарын сынға алды. Айталық, былтыр 9 айда тауарға, жұмысқа және қызмет көрсетуге қатысты сатып алуларды реттеудің жалпы көлемі 12,5 трлн теңгені құраған еді. Алайда жергілікті тауарлар мен қызмет көрсетуге бар болғаны 6,4 трлн теңге немесе қаржының 52 пайызы бөлінді. Сәйкесінше, экономикаға аталған қаражаттың жартысына жуығы жұмсалмаған.
«Отандық тауарлар мен қызметтерді сатып алуға ең аз қаражатты мемлекеттік органдар жұмсайды. Жергілікті қамту тек 30 пайызды көрсетіп отыр. Инфрақұрылымдық бағдарламаларды іске асыру аясында мемлекеттік органдар осы көрсеткіш бойынша 90 пайыз деңгейге жетуі тиіс еді. Іс жүзінде қазақстандық қамту 83 пайыз ғана қамтамасыз етілді. «Нұрлы жер» жобасына сәйкес, сегіз өңірде жүктелген тапсырма орындалмаған. Нашар көрсеткіштер елордада 59 пайыз, Түркістан және Павлодар облыстарында 64 және 61 пайыз. «Жұмыспен қамтудың жол картасы» аясында жергілікті қамтудың үлесі 87 пайызды құрады. Жеті өңірде жоспарлы көрсеткіштердің бұзылуына жол беріліп отыр. Атап айтқанда, Алматы облысында 60 пайыз, Қызылорда облысында 73 пайыз және Маңғыстау облысында 80 пайыз.
Бұл ретте қазақстандық қамту үлесін арттыру жөніндегі міндетті ешкім алып тастамағанын тағы да ескерткім келеді. Бюджеттің триллиондаған қаражатын импортты субсидиялауға біздің құқығымыз жоқ. Сондықтан бюджет әкімшілері бұған жеке жауап береді», деді Мемлекет басшысы.
Әйтсе де бұл бағытта оң мысалдар да бар. Мәселен, пандемия кезеңінде «Самұрық-Қазына» холдингі жұмыс орындарын сақтауға кепілдік беретін ұзақ мерзімді оффтейк-келісімшарттар жасасу тәжірибесін қолдана бастады. Нәтижесінде, 200 мыңнан астам жұмыс орны сақталды. Бірақ та мемлекеттік сатып алуларда аталған тиімді құрал белсенді түрде қолданылмайды. Осыған байланысты Қасым-Жомарт Тоқаев 1 қыркүйекке дейін оффтейк-келісімшарттар арқылы, яғни өнімді кепілді түрде сатып алу жүйесімен өндірістерді құру мен оларды кеңейту жөніндегі кешенді жоспарды бекітуді тапсырды.
«Біз жұмыспен қамтудың жол картасын қабылдап, оған 1 трлн теңге бөлдік. Бұл қаражаттың 98,2 пайызы игерілді. Бағдарлама халықты еңбекпен қамтып, іскерлік белсенділікті қолдау үшін маңызды рөл атқарды. Алайда ондаған және жүздеген мың жұмыс орны ашылғаны туралы ақпаратты тексергенде, ол зейнетақы және салық төлемдерімен сәйкес келе бермейді. Азаматтарды қағаз жүзінде ғана жұмысқа орналастыру белең алып отыр. Бірыңғай ақпараттық жүйеге бір адам туралы мәлімет қайта-қайта енгізіледі. Дәл осындай 15 мың жағдай тіркелген. Жұмысқа орналасты деген адамдардың үштен бірі зейнетақы қорына қаржы аудармаған болып шықты. Мұндай жағдай, әсіресе Түркістан (79 %), Қызылорда (43 %) және Жамбыл облыстарында (36 %) анықталып отыр. Жалпы, еңбекпен қамтылғандардың 40 пайызға жуығы «көлеңкеде» қалып қойған. Мен бұған дейін осындай есептерді автоматты түрде қайта тексеру тәсілдерін енгізу туралы тапсырма бердім. Алайда Мемлекеттік кірістер комитеті мен Бірыңғай жинақтаушы зейнетақы қоры бұл тапсырманы әлі орындаған жоқ. Дағдарысқа қарсы шаралардың тағы бір кемшілігі – бюджетке түсетін салықтың аздығы. «Жұмыспен қамтудың жол картасына» бөлінген 1 трлн-нан небәрі 5,5 млрд теңге салық төленген. Бұл – жарты-ақ пайыз деген сөз! Мемлекеттік кіріске жауапты органдар мәселені қатаң бақылауға алуы керек. Қажет болса, құқық қорғау органдарын да осы жұмысқа тартамыз», деді Президент.
Жайылымдық жерлерді қайтаруды тапсырды
Сол секілді Мемлекет басшысы ауыл шаруашылығы саласындағы жер қатынастары мәселесіне ерекше тоқталды. Биыл Жер кодексінің жекелеген нормаларына жарияланған мораторийдің мерзімі аяқталады. Осыған қатысты Президент Жер жөніндегі комиссияның жұмысын қайта жандандыру қажет екенін айтты.
«Жайылымдар мәселесіне арнайы тоқталғым келеді. Бұл жерлер, ең алдымен ауыл тұрғындарына қолжетімді болуы керек. Жергілікті әкімдіктер жұмысты дұрыс ұйымдастырмай отыр. Соның салдарынан ауыл тұрғындары мал жаятын жайылым таппай қиналуда. Әсіресе Алматы, Түркістан облыстарынан арыз-шағымдар көп түсуде. Жайылымдардың 99 пайызы шаруа қожалықтарының иелігінде. Алайда оның 36 пайызында ғана мал жайылады. Қалған 46 млн гектар жайылымдық жер бос жатыр. Үкіметке Бас прокуратурамен бірлесіп, осы жылдың соңына дейін осындай жайылымдарды қайтарып алуды тапсырамын. Оны ауыл тұрғындарының игілігіне берген жөн. Менің тапсырмаммен Агроөнеркәсіп кешені туралы ұлттық жоба әзірленіп жатыр. Алдағы бес жылда бұл мәселені шешуге тиіспіз. Оны алдағы маусымнан қалдырмай Реформалар жөніндегі жоғары кеңестің отырысында қарауды тапсырамын», деді Қ.Тоқаев.
Президент су ресурстарын тиімді басқару мәселесіне де ден қойды. Бұл ұлттық қауіпсіздік пен орнықты дамуды қамтамасыз етуде маңызды мәселе екені даусыз. Сол себепті Мемлекет басшысының тапсырмасына сәйкес су ресурстарын басқарудың ұлттық жобасы дайындалмақ. Мысалы, қазір Жайық өзені айтарлықтай тартылып, экологиялық ахуалы күрт нашарлап барады. Былтыр желтоқсанда Қазақстан-Ресей ынтымақтастығының 2024 жылға дейінгі бағдарламасы қабылданып, бұл құжаттың негізгі мақсаты Жайықтың экожүйесін сақтауға бағытталды. Осы орайда Қ.Тоқаев Үкіметке оны сапалы жүзеге асыруды жүктеді.
Оқыту жүйесі сынақ жүргізетін алаң емес
Былтыр отандық білім беру жүйесі күрделі күйзеліске толы сынақтан өткен болатын. Білім беру саласына ерекше тоқталған Президент осы бағытта әлі де шешілмеген проблемаларды тізбектеді.
«900 мыңға жуық бала 11 мың мектепке дейінгі білім беру мекемелерінде тәрбиеленуде. Оның 36 пайызында кәріз жүйесі жоқ. 29 пайызы ыстық сусыз және 11 пайызында талапқа сай дәретхана қарастырылмаған. Шындығына келсек, балаларымыздың басым бөлігі өмірінің алғашқы алты жылын өмір сүру үшін арпалысумен өткізетіндей. Әкімдердің назарын осы күрделі мәселеге аударғым келеді. Мұндай жағдайда бәсекеге қабілетті ұлт қалыптастыру жөнінде айтудың өзі қиын. Мектепке дейінгі ұйымдардағы кезек мәселесі де әлі шешілмеген. 1-ден 3 жасқа дейінгі балаларды қамту үлесі төмен деңгейде. Небәрі 48 пайыз. Үкіметке әкімдермен бірлесіп, аталған проблемаларды шешу жөнінде кешенді жоспар әзірлеуді тапсырамын. Ол балаларды ерте жастан дамыту жүйесін, мектепке дейінгі оқытудың балама нысандарын құру, мектептен тыс қосымша білім беруде ваучер міндеттерін және басқа да мәселелерді қамту тиіс», деді Қ.Тоқаев.
Сондай-ақ Мемлекет басшысы отандық оқулықтардың сын көтермейтінін ескертіп, ондағы мәліметтер бұрмалаусыз жазылуы тиіс екенін жеткізді.
«Мектептегі білімге қатысты айтар болсақ, халықаралық бағалау жүйесі көрсеткендей мектептердегі білім сапасының жүйелі түрде нашарлағаны байқалады. Бұл тұтастай ұлттың бәсекеге қабілеттілігіне қатер тудырады. Осыған орай түбегейлі шаралар қабылдау қажет. Бүгінде мектеп бағдарламасына жаңа пәндерді енгізуге арналған көптеген бастама көтерілді. Оқыту жүйесі бұл тәжірибе жүргізетін сынақ алаңы емес. Мұның барлығы негізгі пәндерді оқытуға бөлінген сағат санының азаюына әкеледі. Бұл ретте елімізде ең жоғары оқу жүктемесі, яғни 67 сағатты құрайтынын айта кеткен орынды. Финляндия мен Оңтүстік Кореяда ол небәрі 39 сағатты, ал АҚШ-та 55 сағатты құрайды. Оқулықтардың сапасына қатысты мәселелер де жеткілікті. Қазір мектептерде еліміздің және әлемнің тарихына қатысты оқулықтар қолданылып жүр, онда көптеген сәйкессіздіктерді байқауға болады. Бірнеше оқулықты өзім оқып, сапасының төмендігіне таңғалдым. Тарихи оқиғалар мен фактілер оқушыларға бұрмалаусыз жеткізілуі керек. Сондықтан Қазақстан тарихы мен Дүние жүзі тарихы бойынша бірыңғай мектеп оқулықтарын әзірлеп, енгізуді тапсырамын. Бүгінде ерекше білімді қажет ететін балалардың саны өсуде. Олар ерекше қамқорлықты қажет етеді. Үкіметке нақты қажеттіліктер мен заманауи стандарттарды ескеріп, қаржыландыру нормативтерін жаңарту жөнінде шаралар қабылдауды тапсырамын», деген Президент Nur Otan партиясының сайлауалды тұғырнамасы аясында 2025 жылға дейін 800 жаңа мектеп салу міндеті тұрғанын айтты.
Вакцина ұлт саулығын сақтайды
Пандемияның сынақ режімінде, әсіресе отандық денсаулық сақтау саласына әжептәуір салмақ түскені рас. Салада жүйелік кемшіліктер анықталып, медициналық қызметтер зардап шегіп, бұл халықтың денсаулығына бірден әсер етті.
«Былтыр 156 анадан айырылу өлім-жітімнің 2,8 есеге өскенін көрсетеді. Бұл статистика жай сандар емес, 156 отбасы үшін орны толмас қайғы. Ана өлімінің негізгі себептерінің арасында жылдан-жылға перзентханалардың нашар жарақтандырылуы түрткі болуда. Реанимациялық бөлімшелердің де жабдықталуы көңіл көншітпейді. Ауыр науқастарды емдеуге арналған жабдықтар мен арнайы материалдар жоқтың қасы. Үкіметке өңір әкімдерімен бірлесіп, кәсіби қауымдастықтарды тарту арқылы барлық денсаулық сақтау ұйымдарына керек-жарақ қондырғыларды түгендеуді тапсырамын. Бұл ретте босандыру және реанимация қызметтеріне басымдық беріп, сондай-ақ оларды медициналық жабдықтармен, дәрі-дәрмектермен және бұйымдармен жарақтандыру бойынша шаралар қабылдау маңызды. Азаматтардың жекелеген санаттарына заң бойынша тегін берілетін дәрі-дәрмектер мен құралдардың берілмей жатқан фактілеріне жіті назар аудару қажет. Көбінесе медициналық мекемелерде дәрі-дәрмек табылмай, салдарынан халық, оның ішінде аз қамтылған азаматтар дәріні өз есебінен сатып алуға мәжбүр. Ал шенеуніктердің есептеріне сенсек, барлығы сатылып, дәрі-дәрмек 100 пайыз игерілген. Бас прокуратураға осы мәселеге ішінара тексеру жүргізу тапсырылды. Оның нәтижесіне сәйкес кінәлі адамдарға шара қолдану керек. Жалғыз жаза арқылы мәселе шешілмейді Әр азамат өзіне не керек екенін біліп, дәрі-дәрмектерге тапсырыс беру кезінде оларды онлайн алынғанын растау үшін жаппай цифрландыруды енгізу маңызды. Бұл қызмет орталықтандырылған және белсенді болуы керек. Бюджет шығындарына өте мұқият болған жөн. Дәрі-дәрмек бағасын реттеудегі кемшіліктер, сондай-ақ бірқатар дистрибьютор-импорттаушылардың әрекеттеріндегі бағаға байланысты ымыраласу белгілері үнемі анықталып жатыр. Бағаның арзандауы медициналық бұйымдар мен препараттар сапасының төмендеуіне әкелмеуі тиіс. Денсаулық сақтау министрлігі мен Бәсекелестікті қорғау және дамыту агенттігіне бюджет есебінен сатып алынатын дәрілік заттардың барлық санаттары бойынша осы бағыттағы жұмысты жалғастыруды тапсырамын», деді Президент.
Бұған қоса, Қ.Тоқаев коронавирус сырқатына байланысты өңірлер шынайы статистикалық деректерді ұсыну керектігін айтты және індетпен күресте вакциналаудың маңызы зор екенін жеткізді.
«Әлбетте, бұл жағдайды еңсерудің тиімді және жүйелі жолы – жаппай вакциналау. Бұл кейбір арандатушылар айтқандай, вакциналау мәжбүрлі түрде жүргізіледі дегенді білдірмейді. Бірақ халық вакциналау қиын жағдайдан шығудың жолы екенін түсінуі керек. Оны сапалы жүзеге асыру үшін барлық жағдайды қарастыру маңызды. Бұл науқан жоғары ұйымдасқан деңгейде жүргізілуі керек. Дайындық жұмыстарын талдау нәтижесі вакцинаны сақтауға арналған тоңазытқыш жабдықтарының жетіспейтінін анықтады. Әсіресе күрделі жағдай Батыс Қазақстан, Маңғыстау және Түркістан облыстарында қалыптасып отыр. Үкіметке әкімдермен бірлесіп, толыққанды дайындықты қамтамасыз етуді және жаппай вакциналауға 1 ақпаннан бастап кірісуді тапсырамын. Отандық вакцинаны тестілеудің оң нәтижесіне үміттенеміз. Бұл жағдайда өз басым қазақстандық вакцинаны қолданатынымды айтқым келеді», деді Мемлекет басшысы.
«Жасыл Қазақстан» жобасын әзірлеуді тапсырды
Бұдан басқа Қ.Тоқаев экология саласына да назар аударды. Оның халықтың тұрмыс сапасына ықпалы зор. Алайда Президенттің айтуынша, еліміздегі ахуал ойдағыдай емес. Сауалдама кезінде азаматтарымыздың 48 пайызы ғана экологиялық жағдайға көңіліміз толады деп жауап берген екен.
«Осыған орай жаңа Экологиялық кодекс қабылданды. Бұл жұртшылықтың талап-тілегін ескеріп дайындалған жүйелі әрі кешенді құжат. Сондай-ақ кодекс озық халықаралық стандарттарға сай келеді. Экологиялық қауіпсіздікті нығайтуға арналған тиімді бағдарламаларды жүзеге асырған жағдайда кәсіпорындар өндірістік қалдық үшін алынатын төлемнен босатылады. Үкімет және қоғам осы жұмыстың уақтылы және сапалы атқарылуын қатаң бақылауда ұстауға тиіс. Сонымен қатар менің тапсырмаммен 2 млрд түп ағаш отырғызылады. Бұл азаматтарымыздың тарапынан кең қолдау тапқан бастама болды. Жалпы, бұл мәселеге немқұрайды қарауға болмайды. Қоршаған ортаға ешқандай оң әсері жоқ, қаражатты құр игеруді көздейтін жасанды шараларға жол бермеу қажет. Сондықтан ағаш отырғызуға лайықты орындарды анықтау үшін ғалымдармен және жұртшылықпен бірлесіп, кәсіби талдау жүргізген жөн. Қоғамдық бақылау құралы ретінде интерактивті карта дайындау қажет. Сол арқылы экология саласында атқарылып жатқан жұмыстардың барысы мен тиімділігін қадағалауға болады», дей келе Мемлекет басшысы Үкіметке 2021-2025 жылдарға арналған «Жасыл Қазақстан» Ұлттық жобасын әзірлеуді тапсырды.
Мемлекеттік шаралар экономиканы құлдыраудан сақтады
Премьер-Министр Асқар Маминнің айтуынша, 2020 жыл жаһанды шарпыған індеттің салдарынан құлдыраған дүниежүзілік экономикалық дағдарыспен ерекшеленді. Бұл орайда Үкімет еліміздің экономикалық тұрақтылығын қамтамасыз етуге, халықтың өмір сүру сапасы мен деңгейін, әл-ауқатын сақтап қалуға, мемлекеттің халықтың алдындағы әлеуметтік міндеттемелерін толығымен орындауға, сондай-ақ еліміздегі санитарлық-эпидемиялық ахуалды тұрақтандыруға бағытталған нақты шараларды қабылдағанын жеткізді.
«Дер кезінде қабылдаған шаралар Қазақстан экономикасының төмендеуін 2,6 пайызға дейін шектеуге мүмкіндік берді. Экономиканың негізгі салалары орнықты өсімнің басты факторына айналды. Тауарлар өндірісінің көлемі 2 пайызға өсті. Экономикалық белсенділіктің негізі – құрылыс саласындағы 11,2 пайыз, ауыл шаруашылығындағы 5,6 пайыз және өңдеу өнеркәсібіндегі 3,9 пайыздық өсіммен қамтылды. Пайдалануға берілген тұрғын үй көлемі 16,8 пайызға өсіп, 15,3 млн шаршы метрге жетті. Өңдеу өнеркәсібінде машина жасаудағы үлес 16 пайыз, оның ішінде автомобиль құрастыру 53 пайыз, фармацевтикада 47 пайыз, металлургияда 2,6 және жеңіл өнеркәсіпте 15 пайыздық өсім байқалды. Дегенмен ОПЕК+ келісімдерін орындау қажеттілігіне байланысты тау-кен өнеркәсібінде даму серпіні баяулады. Негізгі капиталға инвестициялар тау-кен өндіру өнеркәсібін қоспағанда 14,8 пайызға өсті. Сонымен бірге негізгі капиталға салынған инвестициялардың жалпы көлемі былтыр 3,4 пайызға қысқарды. Бұл ОПЕК+ келісімін орындау шеңберінде мұнай өндіру көлемінің қысқаруының және мұнайға әлемдік бағалардың төмендеуінің салдарынан еліміздің мұнай-газ саласының 3 ірі жобасы – Қашаған, ТШО («Теңізшевройл») және Қарашығанақ бойынша инвестициялардың қысқаруына байланысты болып отыр. Қызмет көрсету секторы карантиндік шектеу шараларының енгізілуіне байланысты 5,6 пайызға төмендеді. Жылдық инфляция 7,5 пайызды құрады. Жұмыссыздық 5 пайыз деңгейінде сақталды. Бұл Жұмыспен қамтудың жол картасын және дағдарысқа қарсы қабылданған шаралардың тиімді іске асырылуы арқылы орындалды. Жетекші халықаралық кредиттік агенттіктер және Халықаралық валюта қоры мен Дүниежүзілік банк ұлттық экономиканың орнықты екенін атап өтті. Мемлекеттік бюджеттің кірістері трансферттерді есепке алмағанда 9 трлн 751 млрд теңгеге жетті. Республикалық бюджеттің кірістері трансферттерді есептемегенде, жоспарға сәйкес 100,3 пайыз, ал жергілікті бюджеттер 108 пайызға орындалды. Халықаралық резервтер 94,4 млрд долларға жетіп, алтын-валюта резервтері 23,2 пайызға немесе 35,7 млрд долларға дейін ұлғайды. Ұлттық қордың шетелдік валютадағы активтері 58,7 млрд долларды құрады. Сыртқы сауда айналымы 11 айдың қорытындысы бойынша 77,7 млрд долларға жетіп, оның ішінде экспорт – 43,4 және импорт 34,4 млрд долларды құрады. Осы арқылы сыртқы сауданың оң сальдосы 9 млрд доллар деңгейінде сақталды», деді Асқар Мамин.
Үкімет басшысы Мемлекет басшысының тапсырмасына сәйкес, дағдарысқа қарсы шаралардың 3 топтамасы қабылданып, іске асырылғанын айтты. Бұл – халық пен бизнесті қолдауға бағытталған, сол секілді әлеуметтік-экономикалық тұрақтылықты сақтау жөніндегі жедел әрі экономикалық өсімді қалпына келтіруге арналған кешенді жоспар. Осы арқылы 700 мың кәсіпкер салықтық жеңілдік алып, зардап шеккен салалардағы қарыз алушылардың 80 пайызы кредиттерді төлеу мерзімін кейінге ауыстыруға жеңілдіктерді пайдаланды. Кәсіпкерлердің 40 мыңға жуық жобасы қаржыландырылып, Үкіметтің экономика мен халықты қолдауға арналған дағдарысқа қарсы шараларының жалпы көлемі 6,3 трлн теңгені құрады. Бұл ішкі жалпы өнімнің 9% пайызы.
«Үкімет «Атамекен» ұлттық кәсіпкерлер палатасымен бірлесіп, қазақстандық тауар өндірушілерді қолдау бойынша тұрақты негізде кешенді жұмыс жүргізуде. Былтыр «Қарапайым заттар экономикасы» бағдарламасын қаржыландырудың жалпы көлемі 1 трлн теңгеге дейін ұлғайтылды. Бағдарламаны іске асырудың екі жылында 710 млрд теңге сомаға 2 723 жоба немесе қаржыландырудың жалпы көлемінің 71 пайызын құрады. Аталған бағдарлама бизнестің сұранысын қанағаттандырып, 2020 жылы 494 млрд теңгеге 1 803 жоба мақұлданды. Оң шешім тапқан жобалардың өсімі 128 пайыздық межеде тұрақтады. Өңірлер бөлінісінде жобалардың сәтті іске асырылуы Алматы қаласы, сондай-ақ Жамбыл, Маңғыстау және Ақтөбе облыстарында байқалды. Ал Батыс Қазақстан, Павлодар, Атырау өңірлерінде баяу орындалып жатыр. Отандық өндірушілерді қолдаудағы жұмыстың маңызды бағыты – «Қарапайым заттар экономикасы» тауарларындағы жергілікті қамту үлесін бақылау. Былтыр жергілікті қамту үлесі 8 пайыздық тармаққа немесе 59%-ға дейін өсті. Бұл бағыттағы көшбасшы өңірлер Жамбыл, Шығыс Қазақстан, Қарағанды облыстары, сондай-ақ Алматы қаласы саналады. Осы көштің соңында Маңғыстау, Ақтөбе, Батыс Қазақстан облыстары қалып отыр. «Бизнестің жол картасы», «Еңбек» және «Қарапайым заттар экономикасы» бағдарламалары арқылы мемлекеттік қолдауды 15 мыңға жуық кәсіпкер пайдаланды. Мемлекеттік қолдаудың тиімділігін бағамдайтын талдау нәтижесі көрсеткендей, мемлекеттік қолдауды иеленгендердің салық аударымдары өскені байқалады», деді А.Мамин.
Ұлттық валютаны әлдендіру тетіктері қарастырылды
Ұлттық банк төрағасы Ерболат Досаевтың сөзіне сүйенсек, коронавирус пандемиясы әлем елдерінің экономикасын бұрын-соңды болмаған дағдарыс жағдайына әкеп соқтырды. Десе де Ұлттық банк Үкімет пен Қаржы нарығын реттеу және дамыту агенттігімен бірлесіп, макроэкономикалық тұрақтылықты қамтамасыз ету үшін уақтылы шаралар қабылдағанын жеткізді. Оның айтуынша, бас қаржы реттеуші органның былтырғы басты мақсаты инфляцияның өсуін белгіленген 8-8,5 пайыз деңгейінде ұстап тұруға бағытталды. 2020 жылдың қорытындысы бойынша оның мөлшері 7,5 пайыз деңгейінде тұрақтады. Теңгелік активтерді қорғау үшін шетел валютасын алыпсатарлыққа және ұсынысты қолдауға жол бермеу бағытында да шаралар кешені қабылданды деді еліміздің бас банкирі.
«Ұлттық банк каржы нарығын дамытуға және көлденең кірістілікті құруға күш салды. Үкіметпен бірлесіп, ақша нарығындағы артық өтімділік бюджет тапшылығын қаржыландыруға бағытталды. Бұл ретте Мемлекеттік бағалы қағаздар шығарылымындағы нарықтық қатысушылардың үлесі 3,8 пайыздан 32,7 пайызға дейін ұлғайды. Экономикалық белсенділікті қолдап, дағдарысқа қарсы бастамаларды іске асыру үшін Ұлттық банк 2,3 трлн теңгеге дағдарысқа қарсы шараларды қаржыландырып, бұл дағдарысқа қарсы жалпы пакеттің 50 пайыздан астамын құрайды», деді Е.Досаев
Былтыр нарықтағы жоғары құбылмалылыққа қарамастан қаржы реттеуші органның жетекшілігімен активтердің жоғары табыстылығы қамтамасыз етілді. Ұлттық қордың кірісі 7,6 пайызға, зейнетақы активтерінің кірісі 10,9 пайызға ұлғайып, бұл инфляциядан 3,4 пайызға жоғары болды. Пандемияның өршуі мен электронды қызметтерге сұраныстың артқанына байланысты Ұлттық банк цифрландыру мен қаржылық технологияларды белсенді түрде дамытуды қолға алды. Цифрлы қызметтерді арттыратын жаңа сервистерді енгізумен бірге құзырлы орган қаржы технологиясы мен ұлттық төлем жүйесін дамытуға бағытталған бірқатар стратегиялық құжатты қабылдады. Ұлттық банктің болжамына сенсек, биылғы 2 тоқсаннан бастап Қазақстан экономикасы оң траекторияға шығуы тиіс. Осы жылдың қорытындысына сәйкес мұнай бағасы барреліне 45 доллар болған жағдайда, өсім 3,7-4 пайыз деңгейінде болады күтілуде. Биыл Ұлттық банк инфляцияны қазіргі 7,5 пайыз деңгейден 4-6 пайыз нысаналы дәлізге қайтару міндетін қойып отыр. Орта мерзімді перспективада бұл көрсеткіш мақсатты 3-4 пайызға жетуге мүмкіндік бермек.
Барлық күш коронавируспен күреске жұмылдырылады
Президенттің тапсырмасына сәйкес елімізде коронавирусқа қарсы жаппай вакциналау 1 ақпаннан басталады. Бұл туралы Үкіметтің кеңейтілген отырысында Денсаулық сақтау министрі Алексей Цой айтты. Министрдің айтуынша, COVID-19 вирусын жұқтырудың әлемдік рейтингінде Қазақстан 1 млн адамға шаққанда 221 мемлекеттің арасынан 109-орында тұр. Өлім-жітім бойынша 97-сатыда тұрса, COVID-19-ға тестілеу бойынша 69-орында келеді. Аурудан айыққан саны жағынан 87-орында, ал ауыр жағдайлар көрсеткіші бойынша 50-орында тұр.
«Пандемия басталғалы бері Қазақстанда COVID-19 оң нәтижесімен 179 720 науқас тіркелді. Науқастардың 87 пайызы сауығып кетті. Бүгінде инфекциялық стационарлардың жүктемесі – 31 пайыз, реанимациялық төсектердің жүктемесі – 19 пайыз. Денсаулық сақтау министрлігі күн сайын эпидемиялық жағдайға бағалау жүргізеді. 26 қаңтардағы жағдайға сәйкес «Қызыл аймақта» 8 өңір тұр. Атап айтқанда, Ақмола, Атырау, Қостанай, Павлодар, Батыс Қазақстан, Солтүстік Қазақстан облыстары және Нұр-Сұлтан мен Алматы қалалары. Бұл ретте Ақмола, Павлодар, Қостанай облыстарында эпидемиялық жағдайға тиісті бақылаудың жүргізілмейтіні байқалады. Соның салдарынан еліміздегі аурушаңдықтың 40 пайызы осы өңірлерге тиесілі. Осыған байланысты аталған өңірлердің әкімдері қосымша тиімді шектеу шараларын қабылдап, оның сақталуын бақылауды қамтамасыз етуі қажет. Науқастарға көмек көрсету үшін елімізде 74 мыңнан астам дәрігер жұмылдырылып, оның ішінде бейінді мамандар 28 мыңға жуықтады. Ауыл халқының медициналық көмекке қолжетімділігі қолда бар жылжымалы медициналық кешендер есебінен, оның ішінде былтыр жеткізілген 100 ЖМК есебінен қамтамасыз етіледі. Сондай-ақ былтыр өңірлер 1167 санитарлық автокөлікпен қамтылды. Инфекциялық стационарларға 5 мыңнан астам ӨЖТ аппараты жеткізіліп, шамамен 43 мың орын оттегімен қамтамасыз етілді. Бұдан бөлек 15 инфекциялық стационар салынып, қайта бейінделген 3 нысанның жөндеу жұмыстары аяқталды. 1 нысанның құрылысы ақпанда аяқталады деп жоспарланып отыр. Барлық өңірде жалпы сомасы 17 млрд теңгеге тұрақтандыру қорлары құрылды», деді А.Цой.