Мемлекет басшысы Қасым-Жомарт Тоқаевтың Қазақстанға шетелдік бизнесті тарту бойынша жұмысты күшейту қажеттілігі туралы тапсырмасын орындау мақсатында Kazakh invest тарапынан айтарлықтай жұмыс атқарылды.
«Пандемияға және бірқатар шектеу шараларына қарамастан, 2020 жылдың қорытындысы бойынша Kazakh invest қолдауымен сомасы 1,6 млрд доллар болатын 36 жаңа инвестициялық жоба іске асырылды. Оның ішінде Қарағанды облысында «Linde Group» неміс ТҰК қатысуымен техникалық газ өндірісі, Түркістан облысында «Polcotton» поляк компаниясының қатысуымен жылыжай кешені, Алматы облысында БАӘ ТҰК қатысуымен құрама жем өндірісі, сондай-ақ ел өңірлерінде жалпы қуаты 368 МВт ЖЭК 7 жобасы іске қосылды», деді Kazakh invest Басқарма төрағасының орынбасары Ғалым Өзбеков.
Карантиндік шараларды жеңілдету кезеңінде Kazakh invest еліміздің инвестициялық имиджін ілгерілету бойынша бірқатар іс-шара ұйымдастырды. Пікірталастарға Солтүстік Еуропа, БАӘ, Ұлыбритания, Германия, Түркия, ҚХР және Украина елдерінің іскер топтарының өкілдері қатысты. Онлайн форматта әлемнің 50-ден астам елінен 6 мыңға жуық адамды қамтитын 40-тан астам тақырыптық вебинар ұйымдастырылды.
Сондай-ақ жыл қорытындысы бойынша Қазақстанға Kazakh invest қолдауымен АҚШ, Германия, Ресей, БАӘ, Үндістан, Оңтүстік Корея және басқа елдерден 70-тен астам шетелдік бизнес-делегация келді. Инвесторлардың 2 мыңнан астам ауызша және жазбаша өтініші қаралды.
«Инвестицияларды тартудың үш деңгейлі жүйесінің жұмысын нығайту мақсатында 65 елдік инвестициялық бағдарлама әзірленді, оның шеңберінде инвестициялық жобаларды іріктеу және сүйемелдеу, сондай-ақ белсенді инвесторларды анықтау мәселелеріне нақты көзқарас бойынша жұмыс жүргізілетін болады. Олардың стратегиялық даму жоспарларын ескере отырып, біз ықтимал инвесторларды іріктеп алып, оларды Қазақстанда өз жобаларын іске асыруға шақыра аламыз», деді Ғ.Өзбеков.
Сонымен қатар инвестициялық саладағы институционалдық өзара іс-қимылды күшейтуге көп көңіл бөлінеді. Мысалы, 2020 жылдың күзінде барлық америкалық іскерлік қоғамдастықты біріктіретін АҚШ Сауда палатасы жанынан Қазақстан-америкалық іскерлік кеңесі құрылды. 2021 жылдың басында АҚШ, Қазақстан және Өзбекстан үкіметтері Орталық Азия инвестициялық әріптестігін құру туралы мәлімдеді. Бұл бастама аясында АҚШ-тың халықаралық қаржы даму корпорациясы (DFC) Қазақстан мен Өзбекстанға 5 жыл ішінде кемінде 1 млрд доллар инвестиция құюды жоспарлап отыр.
Сондай-ақ инвестициялық ахуалды жақсарту, құқықтық базаны жетілдіру және стратегиялық инвесторларды қолдау мақсатында инвесторларды қолдаудың жаңа құралы – инвестициялар туралы келісім енгізілді.
Халықаралық ұйымдардың жаһандық инвестициялық ағындардың төмендеуі туралы болжамдарын назарға ала отырып, Kazakh invest тарапынан инвестициялық мүмкіндіктерді жылжытуды күшейту, Қазақстанға инвесторларды тарту, сондай-ақ биыл 40-тан астам жаңа өндірісті іске қосуға жәрдем көрсету бойынша белсенді жұмыс жалғастырылатын болады.
