Түркістан облысының барлық аудандық ауруханалары мен емханаларында онкологиялық аурулармен күрес күніне орай қатерлі ісіктің алдын алу мақсатында «Ашық есік күні» өтті. Мысалы, облыстық клиникалық аурухананың құрамындағы №5 онкологиялық емханада өткен шарада облыс және қала тұрғындары онколог, маммолог, онкогинеколог мамандарынан кеңес алып, тегін тексерулерден өтті. Сондай-ақ облыстық клиникалық ауруханасының онкологиялық қызмет жөніндегі жауапты дәрігері М.Төлегенов бастаған онкохирургия және химиотерапия бөлімшелерінің қызметкерлері аталған диагноз бойынша емделіп жатқан пациенттерді қолдау іс-шарасын өткізді. Ал Төлеби аудандық ауруханасында өткен шарада білікті дәрігерлердің тексеруінен 57 тұрғын өткен. Жалпы, анықталған патологиялар саны 45 болса, 8 тұрғын қатерлі ісікке күдіктелді. Жергілікті дәрігерлер қатерлі ісікті ерте анықтап, алдын алу мақсатында тұрғындарға дер кезінде тексеруден өтіп, өз денсаулықтарына жауаптылықпен қарауға кеңес берді. «2018-2022 жылдары қатерлі ісік ауруларымен күресудегі кешенді жоспардың» нәтижесінде онкологиялық ауруға күдігі бар науқастар компьютерлік томография мен магниттік-резонанстық томографиядан тегін өтуге мүмкіндік алды. Сонымен қатар ісікті терең молекулярлық-генетикалық тексерістен өткізу, шетелдік мамандармен «телепатология» көмегімен кеңес алуға мүмкіндік жасалды. Бұл отандық онкологтерге дертпен күресуде үлкен көмек. Кешенді жоспар аурудың соңғы сатысындағы науқастарды да қамтыған, онда паллиативтік көмек көрсету үшін мобильді топтар құрып, олардың міндеттері көрсетілген.
– Түркістан облысы қоғамдық денсаулық сақтау басқармасының бұйрығымен аудандық ауруханаларда 20 мобильді топ құрылып, науқастарға үй жағдайында жан-жақты көмек көрсетуде. Кешенді жоспар арқылы облысымыз онкологиялық аурулар бойынша республикада соңғы 17-орында, ал қатерлі ісіктен өлім-жітім бойынша 16-орында тұр. Біздің басты мақсатымыз – аурудың алдын алу немесе дер кезінде анықтау. Былтыр Түркістан облысы бойынша сүт безі қатерлі ісігінен 72 210 әйел, жатыр мойны ісігінен 67 453 әйел, ал тік ішек қатерлі ісігінен 82 533 адам скринингтен өтті. Скринингпен қамту – 100%. Бірақ бұл алғашқы медициналық санитарлық көмек көрсететін мекемелердің орасан зор еңбегі арқылы жүзеге асты. Әрбір емханада әйелдерді және ерлерді қарау бөлмелері ұйымдастырылған, яғни биыл емханаға бірінші рет келген әрбір адам, осы дәрігерге дейінгі бөлмелерден тексеруден өтуге міндетті. Бұл профилактикалық тексеру көзге көрінетін қатерлі ісіктерді уақтылы анықтауға мүмкіндік береді, – дейді Түркістан облысының штаттан тыс бас онкологі Қарлығаш Омарова.
Өңірдің барлық емдеу мекемелерінде өткен акцияның нәтижесінде 360 адамға онколог, маммолог, гинекологтің кеңесі берілген. Сондай-ақ 152 адамға УДЗ жасалса, 25 адамға асқазанға эндоскопиялық тексеру жүргізіліп, 47 әйелдің жатыр мойнынан жағынды алынды. Тексерілу жұмыстарының қорытындысы бойынша 30 әйелден жатыр мойны қатерлі ісігі анықталса, өкінішке қарай 92 әйелден сүт безінің қатерлі ісігі нақтыланып отыр. Салаға жауапты мамандардың дерегінше, облыстың онкологиялық диспансерлерінде 8 436 науқас тіркеуде тұр. Пациенттердің 5 жылдық өмір сүру ұзақтығы – 53,2 пайызды құрайды. Облыс скринингтік қамту жұмыстары бойынша республиканың үздік бес өңірінің қатарында. Өткен жылы 11 аудандық аурухана мен емхананың маммографиялық паркі жаңарған. Бұл қауіпті дерттің алдын алуға үлкен септігін тигізуде.
Түркістан облысы