Құрылыс арматурасын елімізде бес компания өндіреді. Жобалық қуаты жылына 1,42 млн. тоннаны құрайды.
Олардың ішінде еліміздегі ең ірі металлургиялық кәсіпорын - "АрселорМиттал Теміртау "АҚ, ұсақ сұрыпты прокат шығаратын "ЕвразКаспиан Сталь" ЖШС зауыты, "Кастинг" ЖШС көп салалы кәсіпорны, мұнай-газ саласына арналған жіксіз болат құбырлар шығаратын алғашқы отандық кәсіпорын - "KSP Steel "ЖШС және қара металдан жасалған бұйымдар шығаратын "FerrumVtor" ЖШС компаниясы.
Сонымен қатар, Қазақстан көрші мемлекеттерден 550,6 мың тонна арматуралық өнім импорттады. Жеткізу қашықтығына, арматураның түрі мен сыныбына байланысты Ресейден әкелінетін өнімнің бағасы 1 тоннасына 320 мыңнан 380 мың теңгеге дейін (Нұр-Сұлтан 320 - 340 мың тг/тн, Алматы 340 - 350 мың тг/тн және Шымкент - 350 - 380 мың тг/тн) құрайды. Бағаға қатысты жүргізілген салыстырмалы талдау көрсеткендей, Ресейден импортталатын арматуралық өнім отандық өнімге қарағанда 3-18% қымбат. Бағадағы айырмашылық орташа есеппен 1 тоннасына 9 мыңнан 69 мың теңгеге дейінгі аралықта.
Сонымен қатар, ҚР Ұлттық статистика бюросының деректері бойынша 2020 жылы арматура экспорты 195,2 мың тоннаны құрады. Өз елімізде өндірілген арматуралық өнімді және импортты қоса алғанда, жалпы ішкі тұтыну көлемі 1,12 млн. тоннаны құрады.
Биыл Тараз және Шымкент қалаларында жалпы қуаты жылына 280 мың тонна болатын ("Тараз арматуралық зауыты" ЖШС, "SinuanSteel" ЖШС) екі жобаны іске қосу жоспарланып отыр.
ҚР Индустрия және инфрақұрылымдық даму министрлігі үшін құрылыс арматурасын және болат өнімінің басқа да түрлерін өндіру үшін отандық металлургия кәсіпорындарын шикізатпен толық қамтамасыз ету - басым міндеттердің бірі. Осыған байланысты Министрлік отандық металлургиялық кәсіпорындарды шикізатпен қамтамасыз ету бойынша жүйелі шаралар қабылдауда.
