Боранда жол бастаған полицей

Қостанай облысында 18 ақпан күні кәріне мінген ақтүтек боран дала түгіл, қаланың ішінде таяқ тастам жерді көрсетпей тастады. Сол күні күшейтілген қызмет тәр­тібіне көшкен құтқарушылар мен полиция қызметі дереу облыс жолдарын жауып, көлік қозғалысына шектеу қойды. Бірақ дүлей боран көпке созылмады. Келесі күні аспан шайдай ашылып, ауа райы түк болмағандай кейіп танытқанымен, жұрт аузын­дағы кешегі боранның әң­­гі­месі әлі басылған жоқ. Бірі аула­сына тау болып үйілген қар­ды айтса, енді бірі әлеуметтік желіге тарап кеткен Қостанайға кіреберісте ақтүтек боранның астында  көліктің алдына түсіп алып, аласұрып жүгіріп жүрген сары шекпенді полицей туралы видеоны айтады.                

Бұл полицейдің кім екені кейін анықталды. Ол былтыр сәуір айында өртеніп жатқан екі қабатты үйдің ішінен  15 адамды аман-есен алып шыққан қалалық патруль қызметінің инспекторы Амантай Байжанов болып шықты. Қызыл жалынға оранған үйдің қоршауынан секіріп түскен ол есікті теуіп сындырып, тарс ұйқыда жатқан адамдарды оятып, ояна алмағандарын далаға көтеріп шығарған. Ең алдымен 5 жасар баланы алып шыққан. «Тілсіз жаумен» арпалысып жүр­генде үстіндегі киімі жанып, қолын от қарып, иығына дейін күйдіріп алған. Оны елең қыл­маған полицей ертесі күні күн­делікті қызметіне кірісіп кеткен. 

Енді, міне, ақпанның ақ боранында дүйім жұртқа ел амандығы үшін отқа да, суға да түсуге даяр екенін дәлелдеген Амантайдың есімі –  тағы да ел аузында.   

– Әріптесім екеуміз қала ішін­­де патрульдік қызметімізді ат­қарып жүр едік, кезекшіден Федоров ауданына шығар тұс­тағы жол-көлік оқиғасы болған жер­ге жетіңдер деген нұсқау ал­дық. Қаланың шетінде боран екі есе күшті. Жол мүлде көрінбейді, рульде отырған адамға тіпті қиын. Оқиға орнына келген соң, қалаға толассыз кіріп жатқан көліктер легін бастап келе жатқан бірнеше авто­көліктің жол шетіне шығып, қарға батып қалғанын көрдік. Олар кейінгілерге кедергі жасап, көлік кептелісі пайда болды. Сол жердегі жүргізушілердің көме­гімен әлгі көліктерді қолмен итеріп шығарып, жол қозғалысын ретке келтірдік. Одан кейін ақ­тү­тек боранға қарамастан, қала сыр­тына шығып бара жатқан бірнеше жеңіл  көлікті тоқтатып, кейін қайтардық. Әлеуметтік же­ліге тарап кеткен видеоны сол жүргізушілердің бірі түсіріп ал­ған шығар. Сол күні әр көліктің ал­дына түсіп,   жаяу жүгіріп жү­ріп жол көрсетуге тура келді. Өйт­­кені жол қардың астында қалды, қайда қарасаң да дала сияқты. Көлік жол шетіне шығып кетсе, оны шығару қиын. Мұндай боранда көп ойланып тұруға уақыт болмайды ғой. Арттағы көлікке қарайлап, ақырын ғана жүгірдім, – деді полиция инс­пекторы. 

Амантай ақтүтек боранда көліктерді қауіпсіз жерге дейін шығарып салу үшін әрлі-берлі күртік қар кешіп, жаяу жүгірумен болған.

Қостанай қар құрсауында қалған 18 ақпан күні ТЖД құт-^­қару­шы­лары да күшейтілген жұмыс тәртібіне көшті. Департа­мент­тің екі «КамАЗ 4318» арнайы техникасы сағат 18:00-ден 23:00-ге дейін қала көшелерін ара­лап, аялдамаларда автобус кү­тіп тоңып қалған 673 адамды үй­леріне жеткізіп тастады.

Қостанай облысы