Қоғам • 26 Ақпан, 2021

Жақсылыққа жетелеген жоба

48 рет көрсетілді

Елбасы Нұрсұлтан Назарбаев 2019 жылғы 23 қаңтарда Жастар жылының салтанаты ашылу рәсімінде сөйлеген сөз­інде студенттер қауымының ерікті­лік пен қайырымдылықтың қуатты ресурсы екендігін айта келіп, Үкіметке волон­тер­лікпен айналысатын студенттердің стипендиясын арттыруды тапсырған болатын.

А.Байтұрсынұлы атындағы Қос­танай өңірлік университетінде былтыр волонтерлікпен айналысатын студент-жастардың саны екі еседен артық өскен. Бұған Елбасы тапсырмасына сәйкес аталмыш университетте тиімді жүзеге асырылып жатқан «Әлеуметтік студенттік кредит» жобасы және Қостанайға жұмыс сапарымен келген Мемлекет басшысы Қасым-Жомарт Тоқаевтың Жастар сарайында қостанайлық студенттермен кездесіп, былтырғы жылды «Волонтер жылы» деп жариялауы ықпалын тигізіп отыр. Аталмыш жоба бойынша студенттердің волонтерлік қызметіне ақы төленеді.

Жоғары оқу орнындағы волон­тер­лер қозғалысына «Аялы жас­тар» студенттік клубы жетекшілік етеді. Азаматтық ұстанымы қалып­тасқан, белсенді ерікті жастар осы клубтың айналасына бірігіп, түр­лі қайырымдылық шараларына қа­тысады. Былтыр қаңтар айынан бастап университет жастары Qazvolunteer.kz интернет порталына тіркеліп, түр­лі мекемелер ұсынған порталдағы бос вакансияларды таңдап алып, «Әлеу­меттік студенттік кредит» жобасына белсенді атсалыса бас­тады.

Аталған жоба аясында сту­ден­т­­тер көбіне жергілікті емхана­ларға ба­рып, қарт кісілер мен со­зыл­малы дерт­ке шалдыққан науқас­тардың мекенжайына дәрі-дәр­мектер, азық-түлік пакеттерін жет­кізіп беріп тұрған. Был­тыр індет асқынып кеткенде емдеу меке­мелеріне жан-жақтан келіп жат­қан оттегі баллондары мен гу­ма­нитарлық көмек заттарын түсіріскен.

– Сонымен қатар біздің волонтерлер инклюзивті білім беру, қазақ тілі, ағылшын тілі, компьютерлік сауаттылықтан қосымша сабақ беру, облыс орталығында ағаш көшеттерін егу, егде жастағы адамдарға қолқабыс ету жұмыстарымен айналысты. Біз «Қар­жы орталығы» акционерлік қоға­мына әрбір еріктінің нақты атқарған жұмысы туралы есеп беріп отырамыз. Олар есепті тексеріп, студенттердің жеке есепшотына төлемақысын жібереді. Волонтер 20 сағат жұмыс істесе, 20 мың теңге, ал 50 сағат жұмыс істесе, 50 мың теңге алады, – деді «Аялы жастар» студенттік клубының жетекшісі Виктория Гаан.

«Әлеуметтік студенттік кредит» жобасына қатысатын студенттер балалар үйі мен қарттар үйіне, басқа да әлеуметтік мекемелерге волонтер ретінде барып, көмек көрсетіп тұрады.

– Былтыр біздің гуманитарлық мамандықтар бойынша білім алып жатқан жоғары курс студенттері жыл бойы Қостанайдағы облыстық Балалар үйі мен Кәмелетке толмағандарға арналған бейімдеу орталығының тәрбиеленушілеріне онлайн сабақтар мен түрлі тренингтер өткізді. Олардың бәріне «Әлеуметтік студенттік кредит» бойынша ақы төленіп тұрды. Мысалы, өткен айда әлеуметтік мекемелерде сабақ беріп жүрген 34 студенттің 9-ы 50 сағат жүктеме орындап, 50 мың теңгеден алды, ал 25 студентке 20 сағаттық жұмысы үшін 20 мың теңгеден төленді. Біз Жастар ресурстық орталығымен ты­ғыз байланыста жұмыс істейміз. Сту­дент­терге жұмысты көбіне осы орта­лықтың мамандары тауып береді. Қазір олар бірнеше жаңа жоба ұсынып отыр, – деді университеттің жастар ісі жө­ніндегі комитетінің маманы Айнұр Қанатқызы.

Волонтер студенттер Ахмет Бай­тұр­­­сын­ұлы атындағы университетке қарас­ты институттар мен кафедра­ларда ұйымдастырылатын қайырым­дылық шара­ларына да атсалысып тұрады. Мәсе­лен, қаңтар айында өткен «Мен – донор­мын» шарасына 50 шақты студент қатысып, қан тап­сырды. Университет жас­тары «Біз – біргеміз!» акциясы аясын­да ұлы ағарту­шы Ы.Алтынсарин кесене­сінің ау­мағын тазартып тұруды өз мо­йында­рына алған. Сондай-ақ тұрақ­ты түрде жалғызбасты қарттардың үйле­ріне барып, қар күреп, азық-түлігін әкеп беріп, қолғабыс көрсетіп тұрады. Бұған қоса, ерікті студенттер соңғы үш жыл ішінде туабітті дертке шалдық­қан 6 баланың емделуіне қол ұшын созып, қайырымдылық шараларын ұйым­дастыру арқылы қаржы жинап берген.

– Қазір, өкінішке қарай, пан­де­мияға байланысты волонтерлерге «Әлеуметтік студенттік кредит» жобасы бойынша жұмыс ұсынатын мекемелер азайып қалды. Соған қарамастан, көптеген студенттер волонтерлікпен жобадан тыс айналысып жүр. Оларға университет басшылығы да барынша қолдау көрсетіп отырады. Таяуда ғана өзімізбен бірге уни­верситетте оқитын Сұлтанмұрат Тәшенов қымбат ота жасатты. Біз өз тарапы­мыздан қайырымдылық акциясын өткіздік. «Теңіз тамшыдан құрала­ды» демекші, оқытушылар мен студент­тер болып Сұлтанмұраттың әрі қарай тез бейімделіп, аяққа тұрып кетуіне демеу болатын қаржы жинап бердік. Біз түрлі қайырымдылық шара­ла­рын жыл он екі ай бойы үзбей өткізіп тұра­­мыз. Қарттардың үй шаруасына кө­­мек­тесеміз, ал балалар үйіндегі балғындарға таңертеңгілік ойын-сауық шараларын, танымдық ойындар мен тре­нинг­тер ұйымдастырамыз, – деді Виктория Гаан.

Былтыр күзде А.Байтұрсынұлы атын­­дағы университет пен Ө.Сұлтан­ғазин атын­дағы педагогика институты қосылып, өңірлік университет болып қайта құрылғанда екі білім ордасының волон­терлік клубтары да бір ұйымға біріккен. Содан бері еріктілер саны едәуір көбейіп, шарапатты жұмыстың ауқымы да кеңейе түскен.

Қазір волонтерлер карантин талаптарына байланысты балалар үйлеріне бара алмайды. Алайда олар «Арнайы әлеуметтік қызмет көрсету орталығы» мен отбасылық үлгідегі «Жанұя» балалар үйіндегі балғындарға апта сайын ZOOM платформасы арқылы офлайн режіміндегі бейнеконференциялар ұйымдастырып, балалармен бірге түрлі ойындар ойнап, суреттер салады, бірнеше топқа бөлініп, викториналық ойындар ойнатады. Одан қалды, сергіту жаттығуларын жасап, би билеп, ән айтады. Балаларға керегі – үл­кендердің назары мен жылы қабағы ғой. Волонтерлер көп балалы отбасыларда тәрбиеленіп жатқан оқушы­лармен де онлайн байланысқа шығып, олардың үй тапсырмасын орындауына көмектесіп, танымдық мәні бар дамыту сабақтарын өткізіп тұрады.

Бүгінде Қостанай университетінде оқитын ерікті жастардың көбі қа­шықтан білім алып жатыр. Ал облыс ор­талығында қалған волонтерлер қалалық ардагерлер кеңесінен тыл еңбек­кер­лерінің тізімі мен тұрғы­лықты мекенжайын алып, қамкөңіл қариялардың ауласын соңғы күндері жауған қалың қардан тазартуға кірісті.

 

Қостанай облысы

Соңғы жаңалықтар

Алматыда жер сілкінісі болды

Аймақтар • Бүгін, 10:55

Өңірлер бойынша эпидахуал қандай?

Коронавирус • Бүгін, 09:20

1731 адам коронавирустан емделіп шықты

Коронавирус • Бүгін, 09:07

6 өңір «жасыл» аймақта тұр

Коронавирус • Кеше

Депутатты пышақтап кетті

Әлем • 15 Қазан, 2021

Ұқсас жаңалықтар