Б. Сағынтаев Instagram-дағы парақшасында көктемнің алғашқы күні, Алғыс айту күнінде барша қала тұрғындарының атынан дәрігерлер мен санэпидемиологтарға, полиция мен әскери қызметкерлерге, еріктілер мен дезинфекциялаушыларға рахмет айтты.
«Сіздердің қажырлы еңбектеріңіздің арқасында біз коронавирус пандемиясына қарсы төтеп бере алдық. Қауіпті індет кезінде үй көрмей, бел жазбай жұмыс істеп, шегінуді білмедіңіздер. Таразының басында бүкіл мегаполис тұрғындарының денсаулығы тұрғанын түйсініп, сезіндіңіздер», деп атап өтті Алматы әкімі Б. Сағынтаев.
Оның айтуынша, ұйымшылдық пен ынтымақтың, өзара қолдау мен әлсіздерге көмектесудің арқасында қала сын-қатерді еңсерді. Қала тұрғындары бір-біріне жүрек жылуын сыйлап, жылы сөзбен жан жылытты.
«Пандемиямен күрес әлі аяқталған жоқ. Дегенмен біздің ең ауыр сынаққа төтеп бере алатынымыз, бұдан да күштірек, мейірімді әрі батыл бола алатынымыз анық», деп жазды қала әкімі.
Б.Сағынтаев түсіністік пен қолдау білдірген әрбір алматылыққа алғыс айтып, алматылықтарға зор денсаулық, амандық, бақ-береке және қаланың өркендеуін тіледі.
